ՀԲՄ-Ն ՄԱՍՆԱՃՅՈՒՂ ՈՒՆԻ ԱՐՑԱԽՈՒՄ
Սրբուհի ՎԱՆՅԱՆ
Հայ մարմնակրթական ընդհանուր միությունը՝ Հոմենըթմենը, արդեն մասնաճյուղ ունի Արցախում։
Օգոստոսի 22-ին հանրապետության մայրաքաղաքի գլխավոր՝ Վերածննդի հրապարակում հանդիսավոր պայմաններում նշվել է նրա բացման արարողությունը, որին մասնակցել և նրա մուտքն Արցախ շնորհավորել են ԱՀ նախագահ Բակո Սահակյանը, Արցախի թեմի առաջնորդ Պարգև արքեպիսկոպոս Մարտիրոսյանը, պետնախարար Գրիգորի Մարտիրոսյանը, պետական այլ պաշտոնյաներ, ՀՅԴ Արցախի ԿԿ, ՀՄԸՄ Կենտրոնական Վարչության անդամներ, հյուրեր։
Նշենք, որ ՀՄԸՄ-ի Արցախի նորաստեղծ միավորումը նրա՝ թվով 111-րդ մասնաճյուղն է, որ բացվել է միության գործունեության 111 տարիների ընթացքում։ Մասնաճյուղի բացման նախապատրաստական աշխատանքները տևել են գրեթե երկու ամիս։
Հայ մարմնակրթական ընդհանուր միությունը ստեղծվել է 1918թ. Կ. Պոլսում։ Հոմենըթմենը համարվում է միջազգային կառույց, որը գործում է աշխարհի 24։
Կազմակերպությունը ոչ կառավարական միություն է, որը սկաուտական և մարզական թիմերով աշխատում է հայ երիտասարդի հետ, աջակցում բացահայտելու իր ֆիզիկական, մտավոր, զգայական, հասարակական ու հոգևոր ներուժը, որպեսզի հետո արդեն, որպես բարոյական բարձր արժանիքներով օժտված քաղաքացիներ, առողջ, քաջ, համագործակցության և ընկերասիրության ոգով դաստիարակված անհատներ իրենց ներդրումը բերեն հայրենիքին։
Հոմենըթմենի Արցախի մասնաճյուղի հրավերով Արցախում է Հայաստանի ազգային սկաուտական շարժումը, որի անդամները՝ միության՝ մասնաճյուղեր ունեցող երկրների դրոշներով և շեփորային նվագախմբով քայլով անցել են հրապարակով։
Արարողության ընթացքում Հոմենըթմենի կենտրոնական վարչության ներկայացուցիչներն Արցախի նորաստեղծ կառույցին են փոխանցել Հոմենըթմենի և սկաուտական դրոշներն ու կանոնադրությունը։ Դիմելով Հոմենըթմենի ներկայացուցիչներին, Գ. Մարտիրոսյանն նշել է, որ իրենք հայկական ավանդույթներով միավորում են աշխարհի մայրցամաքները՝ ավելի քան երկու տասնյակ երկրներում գործող մասնաճյուղերի և միավորների շնորհիվ։ Նա վստահություն է հայտնել, որ Արցախի մասնաճյուղն իր դերակատարությունն է ունենալու և ավելի է ամրապնդվելու Արցախ-Հայաստան-Սփյուռք եռամիասնությունը։
Միջոցառմանը ելույթ են ունեցել նաև Հոմենըթմենի կենտրոնական վարչության ատենապետ Գառնիկ Մկրտիչյանը, Հայ մարմնակրթական ընդհանուր միության արցախյան մասնաճյուղի ատենապետ Վրեժ Ասմարյանը, ՀՅԴ Արցախի Կենտրոնական կոմիտեի ներկայացուցիչ Դավիթ Իշխանյանը։
Գ. Մկրտիչյանն ասել է, որ Հայ մարմնակրթական ընդհանուր միության Արցախի մասնաճյուղի բացումը մեծ պատիվ է համայն հայության համար, իսկ ըստ Վ. Ասմարյանի՝ համայն հայության երազանքն այսօր դարձել է իրականություն՝ Արցախում Հոմենըթմենի մասնաճյուղի պաշտոնական ներկայացվածության շնորհիվ։
ՙԱրցախը, բացի աշխարհաքաղաքական վայր լինելուց, մեզ համար պատմություն է, հերոսական հայրենիք, դարավոր հպարտություն։ Հայրենիքի այս հատվածը պահելու և պահպանելու համար մենք ազգովի ենք վճարել, ամենաթանկ գնով՝ մեր զավակների արյամբ։ Տասնամյակներ շարունակ այս հողի վրա ապրողները պարտադրված են եղել զրկանքների, պայքարել ու շարունակում են պայքարել թշնամու դեմ։ Շնորհիվ արցախցիների կամքի, աշխարհի հայության զորակցության հայրենիքն ազատագրված է, անկախացած և լծված պետականաշինության գործին։ Անցնող 30 տարիների ընթացքում Արցախը եղել է համայն հայությանը միավորող օղակը, իսկ հայությունն էլ ոչինչ չի խնայել Արցախի հզորացման համար։ Հոմենըթմենը ևս Արցախը մշտապես ուշադրության կենտրոնում է պահել՚,- ասել է Գ. Մկրտիչյանը։
ՀՅԴ Արցախի Կենտրոնական կոմիտեի ներկայացուցիչ Դավիթ Իշխանյանն էլ իր խոսքում կարևորեց Հայ մարմնակրթական ընդհանուր միության արցախյան մասնաճյուղի բացման կապակցությամբ՝ հաջողություններ մաղթելով հետագա գործունեության մեջ։