ԳԱՐՆԱՆԱՑԱՆԻ ՀԱՄԱՐ ՆԵՐԿԱՅՈՒՄՍ ԵՂԱՆԱԿՆ ԱՌԱՎԵԼ ՔԱՆ ՆՊԱՍՏԱՎՈՐ Է

Ընդհանուր առմամբ,  ընթացիկ գյուղատնտեսական տարվա  համար դեռևս վաղ է միանշանակ գնահատական տալը, միայն պետք է նշեմ, որ մարտ-ապրիլ ամիսներին տեղումները շատ սակավ էին, ինչի պատճառով հարթավայրային գոտու աշնանացան անջրդի ցանքսերից բերքը խիստ վտանգված է:

- Գարնանացանի ընթացքի մասին։ Ինչքա՞ն գումար է հատկացվել այդ նպատակով;

- Նախորդ տարվա նույն ժամանակաշրջանի համեմատ 20 տոկոսով ավելի ցանքս է իրականացվել՝ ունենք արդեն ավելի քան 8000 հա գարնանացան մշակաբույսերի ցանքատարածքներ: 

  ԼՂՀ  ԳԳԱՀ կողմից գարնանացանի և գարնան դաշտային խնամքի աշխատանքները կազմակերպելու նպատակով հողագործության զարգացմանն ուղղված աջակցության ծրագրի շրջանակներում առաջին եռամսյակում հողօգտագործողներին փոխառության կարգով տրամադրվելէ մոտ 990 մլն դրամ  գումար: 

- Խնդիրների մասին. հողօգտագործողներն ունե՞ն բավարար սերմացու, վառելիք,  տեխնիկա:

- Հանրապետությունում առկա գարնանացանի աշխատանքների համար գյուղտեխնիկան և սարքավորումները, ըստ գնահատման, իրենց քանակով ու սարքինության մակարդակով բավարար են  խնամքի աշխատանքները ագրոկանոններին համապատասխան իրականացնելու համար: Գյուղատնտեսական տեխնիկայի պարկի թարմացումն իրականացվում է մշտապես: Գարնանային խնամքը կազմակերպելու նպատակով 2014 թվականին ԼՂՀ ԳԳԱՀ-ի կողմից պահեստավորվել և շարունակվում են հանրապետություն ներկրվել տարբեր մշակաբույսերի սերմեր, պարարտանյութեր և թունանյութեր: Ընթացիկ տարում ներկրվել են մոտ 55 տոննա եգիպտացորենի, 253 տոննա կարտոֆիլի, 6,6 կիլոգրամ տարբեր բանջարանոցային մշակաբույսերի սերմեր, ինչպես նաև` 18  տոննա տերևային սնուցիչներ, 5120 լիտր  տարբեր թունաքիմիկատներ:

 - Եղանակային պայմանները թո՞ւյլ են տալիս սահմանված ժամկետներում ավարտել աշխատանքները:

-Եղանակային ներկա պայմանները խոչընդոտ չեն հանդիսանում, գարնանացանի համար եղանակն առավել քան նպաստավոր է, և այսպիսի ընթացքի դեպքում հնարավոր կլինի սահմանված ժամկետներում ավարտել այն:

- Ամեն տարի խոսվում է գյուղատնտեսական աշխատանքներին ճիշտ նախապատրաստվելու անհրաժեշտության մասին։ Հատկապես նշվում էր, որ ժամանակին չեն կատարվում  սև  ցելի աշխատանքները։ Ինչպիսի՞ն է իրավիճակն այս տարի։

- Գյուղատնտեսական բոլոր տեսակի աշխատանքներում ժամկետն ունի կարևոր նշանակություն: Ժամկետից շուտ կամ ուշացածումով կատարվող աշխատանքներն էապես ազդում են վերջնական արդյունքի վրա: Սև ցելի նպատակը հողում խոնավության կուտակումն է և մոլախոտերից մաքրումը: Այս առումով հողօգտագործողներին միշտ խորհուրդ է տրվում սև ցելն սկսել աշնանից, սակայն ոչ բոլորն են հետևում մեր խորհուրդներին և տարբեր պատճառաբանումներով ուշացնում են  աշխատանքները: Նախարարության մասնագետների կողմից ստուգվել են կատարված աշխատանքները և ԼՂՀ շրջվարչակազմերի կողմից նախապես հայտավորված տարածքներից մոտ 385 հեկտար ճանաչվել է խոտան և հանվել ծրագրից:

- Հողօգտագործողների հետ աշխատանքը` խորհրդատվություններ, մեթոդաբանական օժանդակություն, ինչպե՞ս է ընթանում: 

- ԼՂՀ գյուղատնտեսության նախարարության  և ՙԲույսերի պաշտպանության ծառայություն՚ ՊՈԱԿ մասնագետների կողմից պարբերաբար սեմինար-խորհրդակցություններ են կազմակերպվում շրջաններում: Անցած տարեվերջին այդ սեմինարներում լուսաբանվել են աշնանացան մշակաբույսերի մշակության, հացահատիկային մշակաբույսերի վնասատուների և հիվանդությունների դեմ պայքարի հարցերը: Մոտ օրերս նախատեսվում են նմանատիպ սեմինարներ`  նվիրված գարնանացան մշակաբույսերի մշակության, պտղատու այգիների և խաղողի վազի հիվանդությունների ու վնասատուների դեմ պայքարի կազմակերպմանը: Որպես մեթոդական օժանդակություն, առանձին տեղեկատվական թերթիկների ձևով, այս կամ այն մշակաբույսի մշակության կամ թունաքիմիկատի օգտագործման մասին նույնպես տեղեկություն ենք տրամադրում:

- Մեր բնակլիմայական պայմաններից դատելով, սելավներն ու կարկուտը դեռ առջևում են։ Ի՞նչ միջոցներ են ձեռնարկվում բերքը փրկելու համար։

- Թե ինչպիսին կլինի եղանակն առաջիկայում՝ սելավներ թե կարկուտներ, չենք կարող գուշակել: Շատ դեպքերում դեռևս անզոր ենք բնության արհավիրքներին դիմակայելու: Կարող եմ նշել, որ այսօրվա դրությամբ կարկուտից պաշտպանվելու մեր միակ միջոցը ՙԶենիթ՚ հակակարկտային կայանքներն են: Հուսանք, որ ընթացիկ տարում բնական աղետներ չեն լինի կամ դրանց հասցրած վնասը կլինի աննշան:

- Բազմիցս խոսվել է այն մասին, որ ապահովագրությունը լուրջ դրական զարգացում կարող է ապահովել ագրարային ոլորտում։ Միևնույն ժամանակ, ռիսկային գործոնը թույլ չի տալիս անցնել նման համակարգի։ Այնուամենայնիվ, որքան տեղյակ եմ, փորձնական ինչ-որ ծրագիր է ներդրվել։ Ի՞նչ արդյունքներ կան։

- Բուսաբուծության  ոլորտում ապահովագրական համակարգ չի գործում ինչպես մեզ մոտ, այնպես էլ ՀՀ-ում: Բացի շատ ռիսկային լինելուց, ոլորտը նաև շատ մասնատված է, տնտեսավարող սուբյեկտների թիվը հասնում է մի քանի հազարի՝ ԼՂՀ-ում, և մի քանի հարյուր հազարի՝ ՀՀ-ում, ինչը նույնպես խոչընդոտ է համակարգի ներդրման համար: Ապահովագրական համակարգ վերջերս ներդրվել է անասնաբուծության ոլորտում` ՙՏոհմային կայան՚ ՓԲԸ-ում` մեկ տարով` տոհմային անասունների ապահովագրման համար: Նշենք նաև, որ ապահովագրողներն առայժմ նախընտրում են գործ ունենալ կայացած, խոշոր տնտեսավարողների հետ, որոնց պարագայում ռիսկի գործոնը հասնում է նվազագույնի:

 

Սրբուհի ՎԱՆՅԱՆ