ՇՈՒՏՈՎ ՈՒՂՂԱՓԱՌ ԵԿԵՂԵՑՈՒ ՊԱՏԵՐԻ ՆԵՐՔՈ ԿՀՆՉԻ ԱՂՈԹՔ՝ Ի ԲԱՐՕՐՈՒԹՅՈՒՆ ԲՈԼՈՐ ԶԻՆՎՈՐՅԱԼՆԵՐԻ
Էվիկա ԲԱԲԱՅԱՆ
Ինչպես գրել էինք, մարտի 27-ին Իվանյան ավանում Ուղղափառ եկեղեցու խաչի օծման արարողությանը Ռուս խաղաղապահ հավաքակազմի մայոր Սերգեյ Ժմուրինը նշել էր, որ շուտով այդ վայրում կսկսվի Ուղղափառ եկեղեցու շինարարությունը: Մեր ֆոտոթղթակցի հետ որոշեցինք այցելել զորամաս և տեղում ծանոթանալ եկեղեցու շինարարության ընթացքին, ինչպես նաև ստանալ այլ հարցերի պատասխաններ:
2020թ. նոյեմբերի 9-ի եռակողմ համաձայնագրից անմիջապես հետո մեր տարածաշրջան այցելած խաղաղապահների թվում էր կապիտան Բորիս Գրիշինը, ով նաև Ռուս ուղղափառ եկեղեցու քահանա է: Հենց նրա գալով էլ ուղղափառ հավատն Արցախում նոր փուլ թևակոխեց: Ստորև ներկայացնում ենք Ռուս ուղղափառ եկեղեցու քահանա Հայր Բորիսի հետ մեր զրույցը:
-Մեր զինված ուժերի ներկայացուցիչները հիմնականում Ռուս ուղղափառ եկեղեցու հետևորդներ են,- պատմում է Հայր Բորիսը: - Այս հանգամանքի հետ էլ կապված է իմ առաքելությունն այստեղ: Ես հաստիքային սպա եմ, ավարտել եմ տանկային ինստիտուտ, ինչպես նաև Օմսկի հոգևոր ճեմարանը: Կարելի է ասել՝ Արցախում ուղղափառ հավատի առաջամարտիկներից եմ, քանի որ վերջին ուղղափառ եկեղեցին Շուշիում ավերվել է 20-րդ դարի 30-ական թթ., իսկ 10 տարի առաջ Ստեփանակերտի Թումանյան փողոցում գտնվող Շառլ Ազնավուրի անվան մշակութային կենտրոնից ոչ հեռու տեղադրվել էր ուղղափառ խաչ, հետագայում այստեղ ուղղափառ եկեղեցի կառուցելու նպատակով, սակայն այդ նախաձեռնությունն կյանքի չկոչվեց… Եվ ահա 10 տարի անց այս հողի վրա կրկին ոտք դրեց ուղղափառ եկեղեցու քահանա:
Մեր ռուսական ավանդույթի համաձայն՝ երբ անձնակազմը մարտական հերթապահության է մեկնում կամ պատրաստվում է ինչ-որ հատուկ առաջադրանք իրականացնել, առաջին հերթին գալիս է քահանայի օրհնությունը ստանալու, որպեսզի բոլորը ողջ-առողջ վերադառնան: Երբ մեր հավաքակազմը տեղակայված էր Ստեփանակերտի թիվ 5 դպրոցում, սենյակներից մեկում պատից ուղղափառ օրացույց էինք կախել և աղոթում էինք այնտեղ: Ապա հոգևոր անկյուն ստեղծեցինք: Այդպես սկիզբ առան ամենօրյա հոգևոր ծառայությունները՝ աղոթքներ, ակաթիստներ (օրհներգություններ)՝ ի պատիվ սուրբ զինվորյալների, Նիկոլայ Հրաշագործի….
Ավելի ուշ, երբ ռուս խաղաղապահ հավաքակազմի տեղակայման համար սկսվեց մոդուլային ավանի շինարարությունը, դիմեցի հրամանատարությանը՝ ուղղափառ եկեղեցու կառուցման համար հողամաս հատկացնելու խնդրանքով: Սկզբից հավաքակազմի տեղակայման վայրում տեղադրեցինք ուղղափառ խաչ: Այդ հարցում մեզ օգնեցին տեղի վարպետները, և Աստծո օգնությամբ տեղադրեցինք այն: Այնուհետև, երբ 5-րդ դպրոցից պետք է տեղափոխվեինք, ինչ-որ տեղ էր հարկավոր սրբապատկերները տեղավորելու համար: Այդ ժամանակ խնդրեցի հատկացնել մեզ մոդուլներից մեկը, որը սկզբից ծառայում էր որպես մատուռ-աղոթատուն, ապա՝ փոքրիկ եկեղեցի: Այստեղ աղոթում ենք, պատարագներ մատուցում, մկրտում զինվորականներին: Մեր զինվորականները շատ են կարոտում իրենց ընտանիքներին, իսկ եկեղեցում նրանք կարող են աղոթել, մոմ վառել` բարօրության և հոգու խաղաղության համար: Այս երկու խնդրանքներով էլ զինծառայողներն իրենց հարազատների անուններով գրառումներ են թողնում տաճարում տեղադրված արկղերում: Ծառայության կամ պատարագի ժամանակ ես հիշատակում եմ այդ անունները: Ունենք 29 դիտորդական կետ, երբ ինձ հաջողվում է լինել այդ դիրքերում, տղաներն ինձ նմանատիպ գրառումներ են փոխանցում, և ես աղոթում եմ այդ զինվորականների ու նրանց հարազատների համար:
- Հա՜յր Բորիս, իսկ ո՞վ է Ձեզ օգնում եկեղեցու շինարարության հարցում և մոտավորապես ե՞րբ է այն պատրաստ լինելու:
- Եկեղեցու կառուցվածքը փոքր-ինչ բարդ ու աշխատատար է, դա է պատճառը, որ շինարարությունը մի քիչ ձգձգվում է: Նոր տաճարի համար արդեն Մոսկվայից բերել ենք մոմակալներ և հոգեհանգստի սեղան, կահույքը պատվիրել ենք այստեղ, իսկ մնացած ամեն ինչը՝ Սուրբ խաչվառը, ՙՔրիստոսի ծնունդ՚, ՙՍուրբ աստվածասեր իշխան Ալեքսանդր Նևսկի՚, ՙՏիրոջ մկրտություն՚, ՙԳողգոթա՚ սրբապատկերները, ինչպես նաև Վարշամակը ինքներս ենք պատրաստել, դրանք տպագրվել են տեղի տպագրատանը և ամրացվել նրբատախտակի վրա: Այս հարցում նույնպես մեզ օգնության են հասել տեղի վարպետները:
Կապված հարցի հետ, թե ո՞վ է ֆինանսավորում շինարարությունը, պատասխանեմ՝ ռուս խաղաղապահ հավաքակազմի բոլոր զինծառայողներն իրենց ներդրումն են ունենում սրբավայրի կառուցման գործում: Մեր զինվորներն ու սպաներն իրենց աշխատավարձի մի մասը (ով որքան կարողանում է) հատկացնում է եկեղեցու շինարարությանը, աշխատուժն էլ են նրանք ապահովում: Եկեղեցու շինարարության հարցում մեզ օգնում են ՙՀայշին՚ ՍՊԸ-ն և Արցախի Հանրապետության իշխանությունը: