ՏԵՂԱՀԱՆՎԱԾ ԱՐՑԱԽՑԻՆԵՐԻ ՍՈՑԻԱԼԱԿԱՆ ԽՆԴԻՐՆԵՐՆ ՕՊԵՐԱՏԻՎ ՇՏԱԲԻ ՈՒՇԱԴՐՈՒԹՅԱՆ ԿԵՆՏՐՈՆՈՒՄ ԵՆ
Անի Մանգասարյան
Հարցազրույց ՀՀ-ում ԱՀ կառավարության օպերատիվ շտաբի պետ Միքայել ՎԻՐԱԲՅԱՆԻ հետ
-Պարոն Վիրաբյան, ներկայում որքա՞ ն է կազմում տեղահանված և Հայաստանի Հանրապետությունում ժամանակավորապես ապաստանած արցախցիների թիվը։
-2021թ. հունիսի 1-ի դրությամբ՝ տեղահանված և ՀՀ-ի տարբեր մարզերում ժամանակավորապես ապաստանած ԱՀ քաղաքացիների թիվը կազմում է 22 հազար177 մարդ, որից շուրջ 6300-ը անչափահաս. Անճշտությունը կազմում է 5 տոկոս։
- ՀՀ ո՞ր բնակավայրերում են հիմնականում կենտրոնացած տեղահանված արցախցիները։
-Առաջին քառյակում Երևանը, Սյունիքի, Կոտայքի և Արարատի մարզերի բնակավայրերն են։
-Ինչպիսի՞ գործառույթներ ունի և որո՞նք են ներկայումս օպերատիվ շտաբի գործունեության առաջնահերթությունները։
- Օպերատիվ շտաբի կարևոր գործառույթը՝ տեղահանված արցախցինների սոցիալ- տնտեսական խնդիրների համակարգումն է։
Առաջնահերթություններից է քաղաքացիներին օգնելը՝ օգտվելու կառավարությունների կողմից հաստատված շուրջ 2 տասնյակի հասնող ծրագրերից։ Նշեմ, որ շահառու արցախցիների 97 տոկոսը օգտվել է այդ ծրագրերից։
Երկրորդ՝ յուրաքանչյուր ամիս, շտաբին կից վարչակազմերի գրասենյակների միջոցով, օպերատիվ շտաբը հաշվառում է ՀՀ-ի տարբեր մարզերում ապաստանած մեր քաղաքացիներին։
Եվ երրորդ գործառույթը տեղահանված արցախցիների վերադարձի կազմակերպումն է՝ Արցախի Հանրապետության տարբեր շրջանների այն բնակավայրեր, որտեղ առկա է ազատ բնակֆոնդ։
-Ինչպիսի՞ առաձնահատկություններ ունեն Հադրութից, Շուշիից, Քաշաթաղից և Շահումյանից տեղահանված արցախցիների խնդիրները։ Ինչո՞վ են դրանք տարբերվում և ինչո՞վ են ընդհանրական։
-Կարծում եմ՝ սոցիալ-տնտեսական խնդիրները խիստ ընդհանրական են, իսկ հոգևոր-մշակութային և բարբառային երանգներ, իհարկե, առկա են։
- Այս ընթացքում որքանո՞վ է հաջողվել լուծել այդ խնդիրները։
-Այս պահին շարունակվում են 68 հազարականների 3-րդ ամսվա վճարումների ծրագրերը, որոնք կտրամադրվեն նաև 4-րդ ամսում։ Շարունակվում է նաև բնակվարձի փոխհատուցման ծրագիրը, կարծում եմ՝ այս 2 ծրագրերը շարունակական բնույթ կունենան նաև ապագայում՝ շրջաններից տեղահանվածների մասով։
Ձեռքբերված պայմանավորվածությունները գործում են կրթության, առողջապահության և այլ ոլորտներում ևս։ ԱՀ կառավարության կողմից ստեղծված են համապատասխան աշխատանքային հանձնաժողովներ՝ վարկերի զիջման և մարման, ինչպես նաև շարժական և անշարժ գույքի փոխհատուցման մասով։ Վերջին 2 ծրագրի դեպքում Օպերատիվ շտաբն օգնում է համապատասխան փաստաթղթերի հավաքագրման համար, իսկ ընդհանուր առմամբ Օպերատիվ շտաբը բաց է՝ բոլոր հարցերի քննարկման և լուծումներ փնտրելու համար։
-Այս փուլում Օպերատիվ շտաբի կողմից ընդհանուր առմամբ, քանի՞ տեղահանված արցախցու վերադարձն է կազմակերպվել ՀՀ-ից դեպի Արցախ՝ մշտական բնակություն հաստատելու համար։
-Օպերատիվ շտաբի կողմից 2021թ. հունվարի 1-ից մինչև այժմ, տեղահանվածների՝ Արցախի Հանրապետությունում վերաբնակեցման կազմակերպման շրջանակներում, Արցախի տարբեր բնակավայրեր են տեղափոխվել և մշտական բնակություն հաստատել՝ թվով 76 ընտանիք՝ 379 մարդ։
-Տեսանելի աշխատանք են իրականացնում նաև Օպերատիվ շտաբի իրավական ծառայությունների գրասենյակները։ Ո՞ր շրջաններից տեղահանված բնակչությանն են սպասարկում սոցիալական ծառայությունները, մասնավորապես ինչպիսի՞ ծառայություններ են մատուցում, ինչպե՞ս են ընտրվել առաջնահերթությունները և ինչո՞ւ, օրինակ, ծառայությունների վերջին տեղեկագրում արտացոլված չէին Շահումյանի շրջանի բնակչության ցուցանիշները։
-Այո, ճիշտ նկատեցիք, Օպերատիվ շտաբի աշխատանքների կազմակերպման առաջին իսկ օրերից հատուկ ուշադրություն է դարձվել սոցիալական և իրավական ծառայությունների մատուցման խնդիրներին՝ տեղահանված և ՀՀ-ում ապաստանած արցախցիներին սպասարկելու համար։ Այդ առումով Օպերատիվ շտաբի սոցիալական ծառայությունների գրասենյակը մատուցում է բոլոր այն ծառայությունները, որոնք առկա են ԱՀ սոցիալական ապահովության ոլորտում, իսկ իրավական ծառայություների գրասենյակը՝ համապատասխանաբար իրավական ծառայությունների։ Նշված գրասենյակներում աշխատում են Հադրութի, Քաշաթաղի, Շուշիի և Շահումյանի շրջանների համապատասխան կառույցների նախկին աշխատակիցները և գրասենյակների պարտավորությունն է առանց տարբերակման մեր տեղահանված քաղաքացիներին սպասարկելը։
-Որքանո՞վ է լուծվել տեղահանված և Հայաստանի տարբեր բնակավայրերում ապաստանած արցախցիների բնակարանային խնդիրը։ Այս ուղղությամբ ի՞նչ աշխատանքներ են ընթանում։
-Տեղահանված արցախցիների հիմնական մասը ապրում է վարձակալած բնակարաններում, որոշները դեռևս բնակվում են հյուրանոցներում և տարբեր հասարակական օբյեկտներում, որտեղ պարբերաբար են տարբեր խնդիրներ առաջանում՝ պայմանավորված տարածքն ազատելու պահանջով։ Առաջացած խնդիրներին փորձում ենք օպերատիվ լուծումներ տալ եռակողմ ձևաչափով։