ԲՆԱԿԱՐԱՆՆԵՐԻ ԵՎ ԱՆՀԱՏԱԿԱՆ ՏՆԵՐԻ ՇՈՒԿԱՅԱԿԱՆ ՄԻՋԻՆ ԱՐԺԵՔԸ ՆՎԱԶԵԼ Է
Լուսինե ՇԱԴՅԱՆ
Ստեփանակերտ քաղաքում բազմաբնակարան բնակելի շենքերի բնակարանների 2020-2021թթ. առուվաճառքի /պայմանագրային/ գների և առաջարկվող գների վերլուծության համաձայն՝ 2021 թվականին բազմաբնակարան բնակելի շենքերի բնակարանների շուկայական միջին արժեքը՝ 1 քառակուսի մետր մակերեսի հաշվարկով նախորդ տարվա համեմատ նվազել է: Ինչպես նշված է Արցախի Հանրապետության կադաստրի և պետական գույքի կառավարման կոմիտեի հաղորդագրության մեջ, մասնավորապես առաջնային շուկայում 2021 թվականին այդ արժեքը կազմել է 350,3 հազար ՀՀ դրամ, նախորդ տարվա 380,4 հազ. դրամ, իսկ երկրորդային շուկայում՝ 247,8 հազ. դրամ, 2020-ի 264,4 հազ. դրամի փոխարեն (առաջնային շուկայում նախորդ տարվա համեմատ նվազել է 7,9 տոկոսով, երկրորդային շուկայում՝ 6,3 տոկոսով):
Ստեփանակերտում անհատական բնակելի տների /կառուցված մինչև 1980թ./ շինության 1ք.մ. մակերեսի շուկայական միջին արժեքը 2021թ․ նախորդ տարվա համեմատ նվազել է 5,7 տոկոսով, իսկ 1980 թվականից հետո կառուցված շինության 1ք.մ. մակերեսի շուկայական միջին արժեքը՝ 4,7 տոկոսով:
Կադաստրի և պետական գույքի կառավարման կոմիտեի հաղորդմամբ՝ հանրապետությունում 2021 թվականին իրականացվել է բազմաբնակարան շենքերի բնակարանների 193 և անհատական բնակելի տների 260 առուվաճառքի գործարքներից ծագող իրավունքների պետական գրանցում։
Ցուցանիշները 2020 թվականի համեմատ նվազել են համապատասխանաբար 14,8 և 32 տոկոսով: