ՀԱՅՏԱՐԱՐՈՒԹՅՈՒՆ

 ԼՂՀ ԱԺ ՄԱՄԼՈ ԾԱՌԱՅՈՒԹՅՈՒՆ 

ԼՂՀ ԱԺ պատգամավոր Վ.ԲԱՂՐՅԱՆ

Հավանաբար հիշում եք, որ 2010 թվականի հոկտեմբերին  այս բարձր ամբիոնից ես ահազանգել եմ, որ 11-րդ դասարանի աշակերտների համար նախատեսված  ՙՆախնական զինվորական պատրաստություն՚ դասագրքի ՙՀայ ժողովուրդն Արցախյան ազատամարտի ժամանակ՚ բաժնում տեղ են գտել աղաղակող սխալներ: Հիշեցնեմ դրանցից միայն երկուսը. ըստ այդ  վայ դասագրքի, Մոնթե Մելքոնյանը` լեգենդար Ավոն, Մարտակերտի պաշտպանական շրջանի հրամանատարն էր, իսկ Մարտունու պաշտպանական շրջանի հրամանատարը Արտյուշա Հարությունյանն էր: Այնինչ ակնհայտ է, որ հենց Ավոն էր Մարտունու պաշտպանական շրջանի հրամանատարը:Ով գոնե փոքրիշատե տեղյակ է Ղարաբաղյան պատերազմի պատմությանը, ապա գիտե, որ Ազատագրական բանակի հիմնադիր-գլխավոր հրամանատար Լեոնիդ Ազգալդյանը զոհվել է 1992 թվականի հունիսի 21-ին Մարտակերտի շրջանի Տոնաշեն գյուղի մատույցներում: Չարաբաստիկ դասագրքի հեղինակների կարծիքով, սակայն, Լեոնիդ Ազգալդյանը եղել  է  Քելբաջարի ռազմագործողության  ուղղություններից մեկի հրամանատարը, ռազմագործողություն, որն, ինչպես հայտնի է, տեղի է ունեցել 1993 թվականի մարտ-ապրիլ ամիսներին: 

Այս  և բազմաթիվ այլ սխալներ ես մատնանշել եմ իմ ՙԱնփութությու՞ն, անպատասխանատվությու՞ն, թե՞ ….՚ վերտառությամբ հոդվածում, որը տպագրվել է ՙԱզատ Արցախ՚ թերթում: Թեմային անդրադարձել  է նաև հայաստանյան մամուլը: Ի պատիվ ԼՂՀ կրթության և գիտության նախարարության պիտի ասել, որ 2011-2012 ուսումնական տարվանից Ղարաբաղյան պատերազմի մասին Արցախի դպրոցներում արդեն ուսուցանում են լրամշակված դասաթեմայով: Իսկ ահա Հայաստանի Հանրապետությունում, իմ տեղեկությունների համաձայն, շարունակում է գործել հին դասագիրքը: Ստացվում է այնպես, որ հայ երիտասարդների մի մասը մեր նորագույն պատմությունն անցնում է մի դասագրքով, մյուս մասն` ուրիշ, իրողություն, որն ուղղակի անթույլատրելի է:

Հուսանք, որ պատկան մարմինները կարձագանքեն և կուղղեն սխալը:

 

23.02.2012 թ.