ԼՂՀ ՎԱՐՉԱՊԵՏԸ ԸՆԴՈՒՆԵԼ Է ԳԴՀ ՊԱՏՎԻՐԱԿՈՒԹՅԱՆԸ
ԼՂՀ վարչապետ Արա Հարությունյանը այսօր ընդունել է երկօրյա ճանաչողական այցով Արցախում գտնվող Գերմանիայի Դաշնային Հանրապետության Հեսսեն երկրամասի Բերգշտրասսեի մարզային խորհրդի նախագահ Մաթիաս Վիլկեսին և Հեսսեն երկրամասում ՀՀ պատվավոր հյուպատոս Բրայան Ֆերային:
Ողջունելով հյուրերին` վարչապետը կարևորել է տարբեր ոլորտներում Գերմանիայի Դաշնության հետ Արցախի Հանրապերության համագործակցությունը, նշելով, որ Գերմանիայի տնտեսական մոդելը արժանի է ընդօրինակման: Ա. Հարությունյանն անդրադարձել է գերմանական առանձին ընկերությունների հետ, մասնավորապես, գյուղատնտեսության ոլորտում, սկզբնավորված համագործակցությանը` հույս հայտնելով, որ այն ավելի կընդլայնվի:
Շնորհակալություն հայտնելով ջերմ ընդունելության համար` հյուրերը ափսոսանք հայտնեցին եվրոպական ազատականացման գաղափարները որդեգրած երկրի` ԼՂՀ-ի մասին սակավ տեղեկատվություն ունենալու վերաբերյալ: Նրանց կարծիքով` դա խոչընդոտում է ԼՂՀ միջազգային ճանաչման գործընթացին: Գերմանական պատվիրակության անդամները ԼՂՀ կառավարության ղեկավարին հրավիրեցին իրենց վարչական շրջան, որտեղ կկազմակերպվի ֆորում` Արցախի մասին մանրամասն տեղեկատվություն տարածելու նպատակով: Հյուրերը Ա. Հարությունյանին իրազեկեցին նաև Արցախի ուսումնական հաստատություններում գերմաներենի ուսուցման և ԱրՊՀ-ում գերմանական գրադարանի ստեղծման մտադրության մասին:
Հանդիպման ավարտին վարչապետ Ա. Հարությունյանը հյուրերին նվիրեց Արցախի Հանրապետության ատլասը:
Հանդիպմանը մասնակցում էին գյուղնախարար Անդրանիկ Խաչատրյանը, պաշտոնատար այլ անձինք:
ԼՂՀ կառավարության աշխատակազմի
տեղեկատվության և հասարակայնության hետ
կապերի բաժին