[ARM]     [RUS]     [ENG]

Հանդիպում ԼՂՀ կառավարությունում

               Հուլիսի 12-ին ԼՂՀ վարչապետ Ա. Հարությունյանն ընդունել է Հայաստանի Ազգային ագրարային համալսարանի պատվիրակությանը` ռեկտոր Ա. Թարվերդյանի գլխավորությամբ:

Ողջունելով ներկաներին` կառավարության ղեկավարը նշել է, որ Ագրարային համալսարանի հետ համագործակցությունը տարիների պատմություն ունի:

 Ներկայացնելով Արցախում գյուղատնտեսության ոլորտի ձեռքբերումները, վարչապետը միևնույն ժամանակ ընդգծել է, որ անելիքներն այդ ուղղությամբ ևս բազմաթիվ են, քանի որ գյուղատնտեսությունը հանրապետության տնտեսության գերակա ճյուղերից մեկն է և պահանջում է մշտական առանձնահատուկ մոտեցում: Այդ նպատակով վերջին տարիներին Արցախում ներդրված գյուղատնտեսական նորագույն տեխնոլոգիաները մեծապես նպաստում են իրավիճակի բարելավմանը:

Շնորհակալություն հայտնելով ընդունելու և իրավիճակը հանգամանալի ներկայացնելու համար` բուհի ռեկտորը փաստել է, որ համալսարանի` ավանդաբար ակտիվ համագործակցությունը Արցախի հետ առաջիկա տարիներին զգալիորեն ընդլայնվելու է: Ներկայումս Շուշի քաղաքում կառուցվող` բուհի արցախյան մասնաճյուղի ժամանակակից պայմաններով մասնաշենքը հնարավորություն է տալու ապահովել ուսումնական պրոցեսի լիակատար արդյունավետությունը ոլորտում տարվող պետական քաղաքականությանը:

Այնուհետև հանդիպման մասնակիցները հանդես են եկել մի շարք հարցադրումներով, որոնց պատասխանելով` Ա. Հարությունյանը, մասնավորապես, անդրադարձել է Արցախում գյուղատնտեսության կոնկրետ ճյուղերում տիրող իրավիճակին, զարգացման հեռանկարներին և մեխանիզմներին:

Հանդիպմանը մասնակցում էին ԼՂՀ գյուղատնտեսության նախարար Ա. Խաչատրյանը, պաշտոնատար այլ անձինք:

 

 

ԼՂՀ կառավարության աշխատակազմի

 տեղեկատվության և հասարակայնության հետ կապերի բաժին