Մայիսի 6-ին Ստեփանակերտի մշակույթի և երիտասարդության պալատի ճեմասրահում բացվեց սփյուռքահայ Արշակ (Մաքս) Սիվասլյանի լուսանկարչական ցուցահանդեսը՝ նվիրված ԼՂՀ պաշտպանության բանակի կազմավորման և Շուշիի ազատագրման 21-րդ տարեդարձին։Նախքան ցուցահանդեսի պաշտոնական բացումը, ճեմասրահում աժիոտաժ էր. հավաքվածներից շատերը ճանաչում, պատերազմի տարիներին շփումներ էին ունեցել ցուցահանդեսի հեղինակի հետ, մոտենում, ողջագուրվում, շնորհավորում էին։ Հաճախորդների մեջ էին Արցախյան պատերազմի վետերաններ, ովքեր հետաքրքրությամբ նկարից նկար էին անցնում, դիտում ծանոթ պատկերները, որ հուշեր էին արթնացնում։
Մայիսյան եռատոնին նվիրված միջոցառումների շարքում յուրահատուկ նշանակություն ունեցավ մայիսի 9-ին Շուշիի կերպարվեստի թանգարանի հանդիսավոր բացումը, որին ներկա էին ԼՂՀ նախագահ Բակո Սահակյանը, ՀՀ նախագահ Սերժ Սարգսյանը, բարձրաստիճան այլ պաշտոնաներ: Թանգարանի վերանորոգման աշխատանքները տևել են մոտ երկու տարի։