ՀԱՅԱԶԳԻ ԲՆԱԿՉՈՒԹՅԱՆ ԴԵՄ ԱԴՐԲԵՋԱՆԻ ԲՌՆԻ ԳՈՐԾՈՂՈՒԹՅՈՒՆՆԵՐԸ ՀԱՄԱՊԱՏԱՍԽԱՆՈՒՄ ԵՆ ՑԵՂԱՍՊԱՆՈՒԹՅՈՒՆ ՈՐԱԿՄԱՆԸ
Էվիկա ԲԱԲԱՅԱՆ
Հարցազրույց Ադրբեջանից բռնագաղթված հայ փախստականների
Արցախի միության նախագահ Սարասար ՍԱՐՅԱՆԻ հետ
-Պարոն Սարյան, տարիներ ի վեր մեր թերթը համագործակցում է ձեր կազմակերպության հետ։ Մենք պարբերաբար լուսաբանում ենք կազմակերպության գործունեությունը, բարձրացնում օրախնդիր հարցեր։ Եկեք մեր ընթերցողին հիշեցնենք` որքա՞ն ժամանակ եք ղեկավարում փախստականների հասարակական կազմակերպությունը, որն այժմ կոչվում է Ադրբեջանից բռնագաղթված հայ փախստականների Արցախի միություն, և ինչո՞ւ ավելի քան 30 տարի առաջ բարձրացված հարցերը մինչ օրս չեն կորցրել իրենց հրատապությունը։
-Սկսենք նրանից, որ ճակատագիրն այնպես տնօրինեց, որ այսօրվա փախստականներս ծնվեցինք տարբեր վայրերում։ Ամեն ինչ սկսվեց 1988թ. փետրվարին, երբ ԼՂԻՄ-ի հայկական բնակչության` ինքնուրույնության և ինքնորոշման իրավունք տրամադրելու խաղաղ պահանջներին Ադրբեջանը հակադրեց կոպիտ ուժ և անգամ խնդիրը քննարկելու ցանկության բացակայություն։ Ավելին՝ 1988թ. փետրվարի 26-29-ը, Սումգայիթում կազմակերպվեցին հայազգի բնակչության արյունալի ջարդն ու հազարավոր մարդկանց բռնագաղթը, մարդիկ, ովքեր ոչ միայն ապրում էին այդ քաղաքում, այլև ամենաուղղակի մասնակցություն են ունեցել նրա շինարարությանը։ Այս հանցավոր գործողություններից Ադրբեջանում սկիզբ առավ այն քաղաքականության իրականացման նոր փուլը, որը միջազգային հանրության կողմից որակվում է որպես էթնիկ մաքրման քաղաքականություն։ Ադրբեջանի ողջ տարածքով մեկ ավելի քան 500-հազարանոց հայկական բնակչության դեմ սկսվեցին հիրավի բարբարոսական գործողություններ։ 1990թ. հունվարի 13-ից Ադրբեջանի մայրաքաղաքում սկսվեց հայերի զանգվածային ջարդը, ինչի արդյունքում նրանք ամբողջովին վտարվեցին Բաքվից։
Այդ օրերին Ստեփանակերտի, Լեռնային Ղարաբաղի շրջկենտրոնների փողոցները հեղեղված էին անտուն փախստականներով։ Մարդիկ գիշերում էին փողոցներում, անծանոթ ընտանիքներում։ Այն ժամանակ դեռ խորհրդային մարմինները շատ արագ արձագանքեցին այս իրավիճակին ու սկսեցին հնարավորության սահմաններում փախստականներին բնակեցնել հանրակացարաններում, ձեռնարկություններում, տարբեր հիմնարկներում, իսկ Շուշիից ու Բերձորից փախստականների մի հոծ խմբի բնակեցրին Ստեփանակերտի ՙՂարաբաղ՚ հյուրանոցում։ Այդ շրջանում փախստականներին հողատարածքներ էին բաժանում, նրանցից ոմանք վարկեր ստացան բնակելի տան շինարարության համար։ Շինարարական կազմակերպությունները, մասնավորապես՝ ՙԽարկովստրոյը՚, սկսեցին բնակարաններ կառուցել Արմենավան թաղամասում, կոշիկի ֆաբրիկայի շրջանում, Հասանաբադում, Մարտակերտում, այլ վայրերում։ Դա իսկապես մարդասիրական մոտեցում էր, որը հետագայում ունեցավ և իր բացասական անդրադարձը։ Բայց` այդ մասին հետո։
Այդ ժամանակաշրջանում փախստականների թվից ստեղծվեց ավելի քան 10 հոգուց բաղկացած նախաձեռնող խումբ, որն ստանձնեց փախստականներին տեղավորելու, նրանց առաջին անհրաժեշտության պարագաներով մատակարարելու և նման հարցերով զբաղվող առաքելություն։ Այլ խոսքով, կարելի է ասել, փախստականների հասարակական կազմակերպությունը ձևավորվել է 1988-89թթ., այսինքն` Ղարաբաղյան շարժման արշալույսին: Այն ստեղծվեց հանպատրաստից՝ ելնելով ժամանակի պահանջներից։ Բարենպաստ հանգամանք էր նաև այն, որ բռնագաղթած և Լեռնային Ղարաբաղ եկածների մեծ մասն ունեին ղարաբաղյան արմատներ, նշանակում է և բարեկամներ ունեին այստեղ։ 1989թ. քաղաքապետարանի շենքում բացվեց Փախստականների կոմիտեն, որի ղեկավար ընտրվեց Կիրովաբադից փախստական Լևոն Մելիք-Շահնազարյանը։
Ֆինանսական և նյութական օգնություն ցուցաբերելու հետ կապված բոլոր որոշումներն ընդունվում էին կոլեգիալ ձևով` աշխատակիցների և նախաձեռնող խմբի ներկայացուցիչների քվեարկության ճանապարհով։ Այդ կոմիտեում աշխատում էի որպես գործավար և շարունակում էի մնալ նախաձեռնող խմբի անդամ։
Մեծ աշխատանք ենք տարել քարոզչական-քաղաքական ուղղությամբ. շփվում էինք օտարերկրացի լրագրողների հետ, նրանց հետ շրջում փախստականներով առավել խիտ բնակեցված վայրերով, գրում էինք հոդվածներ, միջազգային այլևայլ ատյաններ էինք ուղարկում տարբեր փաստաթղթեր, նյութեր, այդ թվում` լուսանկարներ և փախստականների հետ հարցազրույցներ։ Փորձում էինք կազմակերպել նախկին բնակության վայրից մեր ունեցվածքի տեղափոխումը։ Բազմիցս օգնության համար դիմել ենք մեր կառավարող մարմիններին և Արկադի Վոլսկու գլխավորած Հատուկ կոմիտեի ղեկավարությանը։
Այդ շրջանը կարելի է անվանել մեր գործունեության սկիզբը, երբ, հակառակ ծանր իրավիճակին, կարողացանք գոնե ինչ-որ բանով օգնել փախստականներին։
Իմ աջակցությամբ Ստեփանակերտում բացվեց Փախստականների կոմիտեն, որը ղեկավարում էր Յուրի Դանիելյանը, իսկ մեր խումբը կոչվում էր քաղգործկոմին կից վերաբնակիչների հետ տարվող աշխատանքների բաժին։ Նշված կառույցները ևս որոշակի աշխատանք կատարեցին այս ուղղությամբ։ Այս ամենը տևեց մինչև ակտիվ մարտական գործողությունների սկիզբը։
1991թ. վերջին վերաբնակիչների հարցերով մեր բաժինը փակվեց և, ինչպես ասում են՝ ՙբոլորը մեկնեցին ճակատ՚։
Պատերազմից հետո նախաձեռնող խմբի անդամները, ովքեր որ մնացել էին, շարունակեցին աշխատանքը։ Իսկ Թերի Դևիսի՝ հանրապետություն այցելելուց և փախստականների նկատմամբ հետաքրքրություն ցուցաբերելուց հետո մենք ակտիվացրինք մեր գործունեությունը։ 2004թ. օգոստոսին պաշտոնապես գրանցվեց ԼՂՀ փախստականների հասարակական կազմակերպությունը։ ԼՂՀ բոլոր շրջաններից փախստականների ներկայացուցիչներն ընդհանուր ժողովում միաձայն ինձ ընտրեցին կազմակերպության նախագահ։
-Եթե չեմ սխալվում, հենց այդ տարում ընդունվեց ՙՓախստականների մասին՚ ԼՂՀ օրենքը։ Ասացեք, խնդրեմ, այդ օրենքի ընդունումն ի՞նչ տվեց փախստականներին։
-Այո, այն ժամանակ մեզ հաջողվեց նախաձեռնել փախստականների մասին օրենքի ընդունումը։ Օրենքը, ըստ էության, պաշտպանում է Ադրբեջանից բռնագաղթած փախստականների իրավունքները։ Այն ընդունելուց հետո պետությունը կարողացավ փախստականներին ոչ մեծ փոխհատուցում տրամադրել` ունեցվածքի տեղափոխման, բարոյահոգեբանական վնասի դիմաց։ Խոստովանենք, գումարը չնչին էր, բայց դա էլ մի բան էր։ Միաժամանակ նշված օգնությունը, դժբախտաբար, ներքին տեղահանվածների վրա չէր տարածվում։
-Ձեր կազմակերպությունը կապեր ո՞ւնի Հայաստանի Հանրապետության համանման կառույցների հետ։ Եթե այո, ինչո՞վ է դա արտահայտվում։
-Մենք համագործակցում ենք հայաստանյան բազմաթիվ կազմակերպությունների, մասնավորապես, Էլեոնորա Ասատրյանի ղեկավարած` Փախստականների ոչ կառավարական կազմակերպությունների ցանցի հետ։ Կազմակերպության աշխատակիցները մեր նախաձեռնող խմբի հետ համատեղ հավաքել են փաստաբանական ծավալուն նյութ Ադրբեջանի կողմից մեզ հասցված վնասի վերաբերյալ։ Այդ նյութն ընդհանրացվել և ուղարկվել է միջազգային շատ ատյանների, մասնավորապես` Փախստականների հարցերով ՄԱԿ-ի Գերագույն հանձնակատարի վարչություն։ Մենք բազմիցս հանդիպումներ ենք ունեցել ինչպես Հայաստանի ոչ կառավարական կազմակերպությունների, այնպես էլ արտասահմանյան կազմակերպությունների ներկայացուցիչների, օտարերկրյա լրագրողների հետ։ Հիմնականում բարձրացվել են մեզ մոտ, ի տարբերություն ադրբեջանցի փախստականների, միջազգային կարգավիճակի, հումանիտար օգնության բացակայությանը, մեր նախկին բնակության վայրերում թողած ունեցվածքին և նմանատիպ այլ խնդիրներին առնչվող հարցեր։
-Անցած ամսին Դուք հանդիպեցիք ԵԱՀԿ գործող նախագահ, Սլովակիայի արտաքին գործերի նախարար Միրոսլավ Լայչակի հետ։ Ինչի՞ մասին էր զրույցը, և, ի՞նչ եք կարծում՝ Ձեր, իսկ Ձեզ հետ մեկտեղ և Ադրբեջանից հայ փախստականների ձայնը լսվե՞լ է։
-Այո, ԵԱՀԿ գործող նախագահ, Սլովակիայի արտգործնախարար Միրոսլավ Լայչակին ներկայացրեցի Արցախում հայ փախստականների դրությունը՝ ընդգծելով, որ Արցախի Հանրապետությունում ապրում են մինչև 30 հազար հայ փախստականներ, ովքեր զրկված են միջազգային աջակցությունից և օգնությունից, այդ թվում և ադրբեջանական իշխանությունների դիրքորոշման պատճառով, որոնք խոչընդոտում են միջազգային մասնագիտացված կազմակերպությունների կողմից Արցախ կատարվելիք այցերին։ Նշեցի, որ դա խտրականություն է և փախստականների հիմնարար իրավունքների բացահայտ խախտում։ Պատմեցի փախստականների սոցիալական վիճակի մասին, նրանց ուշադրությունը հրավիրելով այն հանգամանքին, որ պաշտոնական Բաքուն փախստականների հարցը դիտարկում է բացառապես քաղաքական դիվիդենդներ շահելու համատեքստում, և վերջում ԵԱՀԿ գրոծող նախագահին առաջարկեցի տեղում ծանոթանալ Արցախում հայ փախստականների կյանքի պայմաններին։
-Որքանով հայտնի է մեզ, վերջերս եղել եք Ֆրանսիայում...
-Այո, Ֆրանկոֆոնիայի շրջանակներում ինձ հրավիրել էին մասնակցելու 20-րդ դարի ցեղասպանություններին նվիրված միջազգային համաժողովին, որտեղ պատմեցի 1991թ. Բաքվի ջարդերի մասին, ներկայացրեցի ականատեսների վկայությունները և փորձեցի ներկաներին փաստերով համոզել, որ հայազգի բնակչության դեմ Ադրբեջանի բոլոր բռնի գործողությունները համապատասխանում են ցեղասպանություն որակմանը։
Հանդիպումներ էին կազմակերպվել սփյուռքաբնակ հայերի, ինչպես նաև Արցախ այցելած ֆրանսիացիների հետ։
-Այսօրվա դրությամբ որո՞նք են փախստականների հիմնական խնդիրները։
-Ադրբեջանից բռնագաղթածների գլխավոր խնդիրը մնում է նրանց միջազգային կարգավիճակի բացակայությունը։ Այլ խոսքով, արցախցի փախստականները զրկված են կարգավիճակից, որից օգտվում են այլ փախստականներ, մասնավորապես, Ադրբեջանում, և որը նրանց մեծ արտոնություններ է տալիս։
Մեզ համար ոչ պակաս կարևոր երկրորդ խնդիրը բնակարանային հարցն է։ Հակառակ նրան, որ սոցիալական խնդիրներ ունեն Լեռնային Ղարաբաղի գրեթե բոլոր բնակիչները, փախստականներն առավել վատթար դրության մեջ են...
-Կներեք, որ ընդհատում եմ, այդ կապակցությամբ ինչպե՞ս կմեկնաբանեիք բնակարան ձեռք բերելու նպատակով փախստականներին 10 տոկոս կանխավճարով հիպոթեքային վարկ տրամադրելու մասին կառավարության որոշումը։ Նշեմ, որ մեզ մոտ՝ խմբագրություն, գալիս էին փախստականներ, ովքեր իրենց դժգոհությունն էին հայտնում այդ կապակցությամբ, նրանցից շատերը վճարունակ չեն։
Բացի այդ, մինչ այդ փախստականներին բնակարան ձեռք բերելու համար հիպոթեքային վարկ էին տրամադրում առանց կանխավճարի: Ստացվում է` փախստականների մի մասը (ով հասցրել է) կարողացել է օգտվել քիչ թե շատ մատչելի հիպոթեքից (եթե հիպոթեքն ընդհանրապես կարող է մատչելի լինել), իսկ մյուս մասը (ով չի հասցրել) պետք է կանխիկով վճարի 10 տոկոս կանխավճարը: Չե՞ք կարծում, որ սա արդարացի չէ:
-Այո, տեղյակ եմ։ Փախստականի համար այդ 10 տոկոսն էլ էական գումար է, անգամ 2-3 միլիոն դրամ կանխիկ վճարելն այս խմբի մարդկանց համար իրատեսական չէ: Բայց, եթե անկեղծ լինենք, նույնիսկ առանց 10 տոկոս կանխավճարի էլ խնդիրը չի լուծվում։ Հիպոթեքը տրամադրում են բանկերը, իսկ նրանք չեն աշխատում անվճարունակ քաղաքացիների հետ։ Փախստականների մեծամասնությունն էլ հենց այդպիսին է։ Փախստականներն ապահովված չեն աշխատանքով, նրանցից շատերն արդեն թոշակային տարիքում են։ Ստեղծված պայմաններում կարող է օգնել նպատակաուղղված բարեգործությունը կամ միջազգային կարգավիճակ ստանալը։ Մեծապես կօգներ մեզ Արցախի Հանրապետության միջազգային ճանաչումը։ Յուր ժամանակ ՄԱԿ-ի գծով Հայաստանում շատ փախստականներ, անգամ Գորիսում, բնակարաններ են ստացել։
Շատ կցանկանայինք, որ պետության կողմից նախանշված ծրագրերն ունենան իրենց շարունակությունը։