ՄԻԱԲԱՆՎԵԼՈՎ Ի ՉԻՔ ԿԴԱՐձՆԵՆՔ ԲՈԼՈՐ ՄԱՐՏԱՀՐԱՎԵՐՆԵՐԸ
ՍԻՐՎԱՐԴ ՄԱՐԳԱՐՅԱՆ
Ս.թ. հոկտեմբերի 15-ին Ստեփանակերտի ՙԱրմենիա՚ հյուրանոցի կոնֆերենց-դահլիճում տեղի ունեցավ Արցախի հերոս, ՙՀանուն Արցախի՚ համազգային շարժման նախաձեռնող Վիտալի Բալասանյանի մամլո ասուլիսը։
Հրավիրված էին տեղական, ինչպես նաև Արցախում հավատարմագրված հայաստանյան և արտասահմանյան լրատվամիջոցների ներկայացուցիչներ։ Ողջունելով և շնորհակալություն հայտնելով լրագրողներին երկար ճանապարհ կտրելու և Արցախ հասնելու համար` Վ.Բալասանյանը կիսվեց մտահոգություններով։ Իրեն ու հասարակությանը հուզող հարցերի շուրջ նա ներկայացրեց իր տեսլականը։ Բանախոսը մանրամասն անդրադարձավ Ղարաբաղյան շարժման նշանակալից անցքերին, պատմությանն ու նախապատմությանը, հաջորդած իրադարձություններին և այդ համատեքստում` իր մասնակցությանն ու անձնական ավանդին։
Հատկանշելով, որ երբեք հեռու չի եղել քաղաքականությունից և լինելով ԼՂՀ առաջին գումարման Գերագույն խորհրդի պատգամավոր, իսկ հետագայում էլ զբաղեցնելով տարբեր ռազմաքաղաքական պաշտոններ` Վ. Բալասանյանն ասաց, որ Ղարաբաղյան խնդրի վերաբերյալ մշտապես ունեցել է նույն դիրքորոշումը։ Նրա խորին համոզմամբ` Արցախը միշտ լինելու է հայկական՝ նվազագույնը ներկայիս սահմաններով։ Ադրբեջանի տարածքային ամբողջականության մասին բարբաջանքներին, այդ մասին անընդհատ բարձրաձայնողներին (լինեն դրանք հասարակական, քաղաքական կազմակերպություններ, կուսակցություններ, թե պետություններ), նա խորհուրդ տվեց չտարվել սին պատրանքներով, քանզի Արցախն այլևս երբեք ոչ մի կարգավիճակով Ադրբեջանի մաս չի կազմելու։ ՙՅուրաքանչյուր ազգ, պետություն պարտավոր է իր և իր սահմանների ու բնակչության անվտանգությունն ապահովել...մենք ապահովել ենք մեր բնակիչների անվտանգությունը` լռեցնելով անմիջական վտանգ ներկայացնող բոլոր կրակակետերը,- ասաց Վ. Բալասանյանը՝ անդրադառնալով Ապրիլյան մարտագործողություններին ու նրա հետևանքներին։ Բանախոսը նաև մանրամասն անդրադարձավ ՀՀ և ԱՀ ներքաղաքական և արտաքին քաղաքական խմորումներին։ Նա շարադրեց նաև իր տեսակետը տարվող արտաքին քաղաքականության վերաբերյալ և քանիցս շեշտադրելով իր դիրքորոշումը` հռետորական հարց հնչեցրեց. ՙՈ՞վ, եթե ոչ ես...՚։ Մեկ այլ շեշտադրմամբ էլ նա հստակ ձևակերպեց հետևյալ միտքը, որ երբեք իր անձնական հարաբերությունների պատճառով չի հակադրվի պետության շահերին։
Լրագրողների` մի քանի տասնյակի հասնող հարցերում շոշափվեցին Ղարաբաղյան հարցի կարգավորման հեռանկարները, իշխող հասարակական տրամադրությունները, գալիք տարվա նախագահական ընտրություններին նրա մասնակցության նպատակահարմարությունը։ Անդրադարձ եղավ Հայաստան-Արցախ-Սփյուռք կապին ու հեռանկարային զարգացումներին, Արցախյան հարցի փակուղայնությանը, միջպետական պայմանագրի կնքման նպատակահարմարությանը։ Հանգամանորեն պատասխանելով լրագրողների կողմից հնչեցված բոլոր հարցերին, մեկ առ մեկ պարզաբանելով բոլոր հարցապնդումների ուղղակի իմաստն ու ենթատեքստերը` Վ. Բալասանյանը մամլո ասուլիսի ավարտին, որպես ի գիտություն, տվեց հետևյալ պարզաբանումը.
-Ես տարբեր տարիների տասնյակ առաջարկություններ եմ արել Արցախի քաղաքական իշխանություններին և հետամուտ եմ լինելու իմ ծրագրերի իրականացմանը։ Հետամուտ եմ լինելու օրակարգային հարցերի շուրջ քննարկումներին ու դրանց լուծման ճանապարհին ժամանակ, ջանք ու եռանդ չեմ խնայելու։ Ես օրենք խախտելու մտադրություն չունեմ, և եթե բոլորս հարգենք Սահմանադրությունը, ապա առճակատում ու տարաձայնություններ երբեք չեն լինի։ Ես հատկապես մտահոգված եմ Ապրիլյան պատերազմի շահարկմամբ։ Ինձ համար անընդունելի է պատերի տակ խոսելը, անհրաժեշտ է տեր կանգնել արժեքներին և թույլ չտալ, որ դրանք ոտնահարվեն։ Միայն միաբանվելով մենք ի չիք կդարձնենք բոլոր մարտահրավերները, իսկ Արցախում ձեռքբերված բոլոր հաջողությունները կլինեն համայն հայության ձեռքբերումները, որոնց մենք կհասնենք մեր միակամությամբ ու միաբանությամբ։
Եվ, որպես վերջաբան, նա որոշ լրատվամիջոցների ներկայացուցիչների հորդորեց չտրվել էժան սադրանքների, խորհուրդ տվեց նախ ուսումնասիրել փաստերը, ապա նոր եզրահանգումներ անել։