ՍԻՄՖԵՐՈՊՈԼԻՑ՝ ԹԱՅՎԱՆ. ՌՈՒՍ-ԱՄԵՐԻԿՅԱՆ ԼԱՐՎԱԾՈՒԹՅԱՆ ԱՂԵՂ
Վահրամ ԱԹԱՆԵՍՅԱՆ
Աշխարհաքաղաքական մրցակցության նոր թատերաբեմի՝ Հարավ-արեւելյան Ասիա-խաղաղօվկիանոսային տարածաշրջանի մասին կանխատեսումները, կարծես, չափազանցություն չեն։ Ամերիկյան ֆանտաստ գրողի վեպը, որ պատկերում է 2033 թվականին ամերիկա-չինական ռազմական բախում Թայվանի համար, բոլորովին էլ զուտ երեւակայության արդյունք չէ։ Մամուլում ավելի ու ավելի հաճախ են տեղեկություններ հայտնվում, որ Միացյալ Նահանգները ծրագրում են աշխարհի այդ տարածաշրջանում ստեղծել նոր, այսպես ասած, ՙասիական ՆԱՏՕ՚ պայմանական անվանումով ռազմաքաղաքական դաշինք։
Վերլուծաբանները սրված ուշադրությամբ են հետեւել ԱՄՆ պետքարտուղարի Հնդկաստան կատարած այցին, որի ընթացքում նա բանակցություններ է վարել երկրի վարչապետի, ապա եւ՝ արտաքին գործերի նախարարի հետ։ Ավանդաբար Հնդկաստանը խորհրդային, ապա եւ Ռուսաստանի հովանու ներքո համաձայնությունների եթե ոչ անմիջական, ապա առնվազն միջնորդավորված մասնակիցն է եղել։ Հնդկաստանը զգալի սպառազինություններ է ձեռք բերում Ռուսաստանից։ Բայց Հնդկաստանը լրջագույն խնդիրներ ունի Չինաստանի հետ այն պատճառով, որ Պեկինը տեխնոլոգիական աջակցություն է ցուցաբերում Պակիստանին՝ նպաստելով վերջինիս բանակի արդիականացմանը։ Հնդկաստանը եւ Պակիստանը փաստացի պատերազմի մեջ են՝ Քաշմիր նահանգի պատկանելության հարցով։
Ըստ երեւույթին, Հնդկաստանի հետ աշխարհաքաղաքական հարցեր քննարկելու ամերիկյան շահագրգռվածությունը կառուցվում է հնդկա-չինական հակասությունների վրա, եւ ԱՄՆ-ն փորձում է Հնդկաստանի միջոցով չեզոքացնել ռուս-չինական հնարավոր դաշնակցությունից ենթադրվող տարածաշրջանային զարգացումները։ Չինաստանը, կարծես, որոշել է անցնել կանխարգելիչ քայլերի այն բանից հետո, երբ անցյալ ամիս ամերիկյան օդուժի ռազմատրանսպորտային ինքնաթիռը վայրէջք է կատարել Թայվանի մայրաքաղաքում։
Մամուլում հրապարակվել է Թայվանի բանակի պաշտոնաթող գեներալ Գաոյի կոչը նախկին ծառայակիցներին եւ ԶՈՒ բարձրագույն հրամանատարական կազմին, որով նա առաջադրում է Թայվանը մայրցամաքային Չինաստանին խաղաղ ճանապարհով միավորելու խնդիր։ Թայվանում հաջորդ տարի սպասվում են տեղական կառավարման մարմինների ընտրություններ։ Ակնկալվում է, որ կհաղթի Չինաստանի հետ միավորման կողմնակից կուսակցությունը՝ ՙԳոմինդանը՚։ Վերջինս արդեն իսկ Թայվանի յոթ շրջաններում տեղական իշխանություն է։
Թայվանի բանակի պաշտոնաթող գեներալ Գաոյի կոչը հրապարակվել է, երբ Չինաստանում նշվել է կոմունիստական կուսակցության հիմնադրման հարյուրամյակը, եւ երկրի առաջնորդ Սի Ծինպինը հռչակել է Չինաստանի ամբողջականության վերականգնման ուղեգիծ։ Չինաստանի պետական խորհրդի պաշտոնական հաղորդագրության մեջ խիստ կոշտ անդրադարձ է արվել դեպի Թայվան ամերիկյան ռազմաօդային ուժերի թռիչքների կապակցությամբ եւ արվել զգուշացում, որ ՙՉինաստանը կարող է առաջինը հարվածել՚։
Իրավիճակն ավելի է լարվել, երբ Չինաստանի տարածքային ջրերի տասներկումղոնանոց չեզոք գոտում նկատվել է բրիտանական ռազմանավ։ Սա նույնն է, ինչ անցյալ ամիս բրիտանական ՙԴեֆենդեր՚ ռազմանավն արել էր Ղրիմի ափամերձ ջրերում։ Չինաստանի ժողովրդաազատագրական բանակի հրամանատարությունը բրիտանական կողմին եւ ԱՄՆ-ին զգուշացրել է, որ երկրորդ նման միջադեպ թույլ չի տա։
Հավանական այս զարգացումներին զուգահեռ Հեռավոր Արեւելքում լարված են ռուս-ճապոնական հարաբերությունները՝ կապված Կուրիլյան կղզիների հարցում տարածքային վեճի հետ։ Ռազմավարական իրավիճակի փոփոխությունը Սեւծովյան տարածաշրջանում, ինչին, կարծես, հետամուտ է Ուկրաինան, Աֆղանստանով պայմանավորված բարդությունը Կենտրոնական Ասիայում եւ չին-ամերիկյան սրացումն, անկասկած, Ռուսաստանից պահանջելու են նոր ձեռնարկումներ եւ ահռելի ֆինանսական միջոցներ։ Իսկ եթե դրան ավելացնենք նաեւ Սիրիան, Լիբիան եւ, առհասարակ, Աֆրիկայի հյուսիսը եւ Միջերկրականի արեւելքում հույն-կիպրա-թուրքական խնդիրները, ապա պատկերն ավելի հստակ կլինի։
Ստեղծված իրավիճակը եւ դրանից բխող մարտահրավերները չեն կարող շրջանցել Հարավային Կովկասը։ Տպավորությունը, որ ՆԱՏՕ-ն կտրուկ քայլերի չի դիմի, առարկայական չէ։ Հյուսիս-ատլանտյան դաշինքը Վրաստանում զորավարժություններ է անցկացնում, որոնց մասնակցում է նաեւ Ադրբեջանը։ Հարավային Օսեթիայի արտաքին գործերի նախարարությունը տարածել է Հայտարարություն, որտեղ հնարավոր զարգացումները համեմատված են 2008թ. ռուս-վրացական պատերազմին նախորդած ամիսների սուր լարվածության հետ։
Փաստացի դա Ռուսաստանի արձագանքն է, որ հնչեցվել է Հարավային Օսեթիայի ԱԳՆ միջոցով։ Տարածաշրջանում եւ նրա շուրջ բեւեռացումը շարունակվում է։ Օգոստոսի վերջին ԱՄՆ կայցելի Ուկրաինայի նախագահ Զելենսկին։ Բայդեն-Զելենսկի բանակցություններից հետո, թերեւս, հնարավոր լինի գոնե մոտավոր կանխատեսում անել ռուս-ուկրաինական դիմակայության դիվանագիտական հանգուցալուծման հնարավորության մասին։
;