ՓՈՐՁԱԴԱՇՏՈՒՄ

Լարվածության մյուս օջախի՝ Իրանի նկատմամբ պատժամիջոցների խստացումը և Իրանի կողմից պատասխան գործողություններ իրականացնելու սպառնալիքը հակամարտությունը մեր սահմաններին մոտեցնելու անմիջական վտանգ են պարունակում: Նման պայմաններում, նենգադավ մարդասպանի հերոսացմամբ հակահայկական նոր հիստերիա ապրող Ադրբեջանում վերստին աշխուժացել են ռազմամոլները, ինչը մեծացնում է պատերազմը վերսկսելու սպառնալիքները կյանքի կոչելու վտանգը: Ուստի մեր հանրապետության պաշտպանունակությունը, Զինված ուժերի մարտունակությունը բարձրացնելու, հնրավոր մարտահրավերները ժամանակին դիմագրավելու նպատակով անցկացվում են հերթական մարտավարական զորավարժությունները կենտորանական ենթակայության զորամասերի հետ:

Տիգրանակերտի զորավարժարանը մեծ, եռացող կաթսա էր հիշեցնում: Տարատեսակ տեխնիկա, ամրաշինական աշխատանքներ կատարող զինվորների խմբեր, վրաններ և դրանց շուրջ զանազան  տնտեսական աշխատանքներ կատարող զինծառայողներ:

Վարչության վրանում ականատես եղանք ըստ զորավարժության իրադրության գնահատման շուրջ ծավալված բուռն քննարկումներին: Հրետանու պետ, գնդապետ Գ. Բաղդասարյանը օպերատիվ բաժնի պետ, գնդապետ Բ. Դավիդովին առաջարկություններ էր ներկայացնում, վերջինս ծանրութեթև էր անում դրանք, իր դիտարկումներն էր ներկայացնում, ապա համատեղ որոշում էր կայացվում:

Դաշտում տարբեր ստորաբաժանումներ կրակային դիրքեր ու խրամատներ էին փորում, նախապատրաստելով զորավարժության բեմագրով նախատեսված  խնդիրների կատարմանը: Գնդապետ Գ. Սահակյանի հրամանատարությամբ գործող զորամասի հակատանկային ստորաբաժանման դասակի հրամանատար, լեյտենանտ Միխայիլ Բալիյանը ղեկավարում էր ենթակաների աշխատանքները: 

ՙՍահմանված ժամկետի դեռ կեսը չանցած՝ մեր դասակը պատրաստ է լինում մարտի՚,- ասում է լեյտենանտ Բալիյանը: 

Կենտրոնական ենթակայության զորամասերից մեկի ականանետային դասակը ևս կրակային դիրքեր էր փորում: Նշանառու շարքայիններ Սերգեյ Բաբայանը և Սուրեն Սարգսյանը հմուտ են իրենց գործում և գիտեն իրենց անելիքը տարբեր իրավիճակներում: Ականանետի հրամանատար, կրտսեր սերժանտ Հովհաննես Վարդանյանը ևս զինակից ընկրների հետ համահավասար ամրաշինական աշխատանքներ է կատարում, որովհետև միայն համատեղ ջանքերով է հնարավոր հասնել առաջադրված նպատակին: 

Դաշտային խոհանոցում նյութաապահովման դասակի հրամանատար, ենթասպա Ռուդիկ Սարգսյանից տեղեկացանք, որ սննդի պատրաստման կետում ներգրավված  ողջ անձնակազմը անում է ամեն ինչ՝ անձնակազմին որակյալ սննդով ապահովելու համար։

Ջոկի տղաների՝ հրաձիգ-զենիթայիններ Նարեկ Հակոբյանի, Կորյուն Ռաֆայելյանի, վարորդներ Սերոբ Գրիգորյանի, Լևոն Բաբյանի, Ալբերտ Աբգարյանի, խոհարար Գաբրիել Եղիազարյանի տրամադրությունները բարձր են, մարտականին մոտ, մանավանդ որ մի քանի օր առաջ հանդիսավորությամբ նշվել է զորամասի կազմավորման 20-ամյակը և նրանցից աչքի ընկածները պարգևների են արժանացել. սերժանտ Գ. Մելքումյանը՝ ձեռքի ժամացույց, շարքային Ն. Հակոբյանը՝ պատվոգիր և այլն:

Զինվորական ծառայության արդյունքն արտահայտվում է զորավարժության ժամանակ, ուստի ամեն ինչ պետք է անեն, որ լավ ցուցանիշներ ունենան:

Ընդհանրականը բոլոր զինծառայողների համար առաջադրված խնդիրների կատարման վճռականությունն է, ինչը, համոզված ենք, օգնելու է սպասված արդյուքներն արձանագրելուն: 

 

Մ. ԱՀՅԱՆ