ԱՄԵՆ ԿԵՐՊ ՕԺԱՆԴԱԿԵԼ ՀԱՄԱՊԵՏԱԿԱՆ ՄԻՋՈՑԱՌՄԱՆԸ

Տեղեկացնելով, որ համապետական կարևոր նշանակություն ունեցող այս միջոցառումն Արցախում անցկացվում է երկրորդ անգամ՝ 10 տարի անց, Կ. Ներսիսյանը կարևորեց բոլորի մասնակցությունը: Ի տարբերություն 2005 թվականին անցկացված առաջին մարդահամարի, քաղաքացիները պետք է պատասխանեն 55 հարցի՝ նախորդից 5-ով ավելի: Բանախոսը համայնքների ղեկավարներին հորդորեց բացատրական աշխատանք իրականացնել բնակչության հետ՝ գիտակցելու մարդահամարի կարևորությունը: Նա նաև տեղեկացրեց, որ մարդահամարի աշխատանքներն իրականացնելու նպատակով մոտ 700 աշխատակիցներ (հրահանգիչ-հսկիչներ, հաշվարարներ) ընդգրկված են հանրապետությունում (աշխատանքները վճարովի են): Նրանց համար կազմակերպվել են սեմինարներ: Մարդահամարից հետո՝ 3 ամսվա ընթացքում, կհրապարակվեն ընդհանուր տվյալները: Անհատական տվյալները գաղտնի են մնալու: Վերջնական ու ճշտված տվյալները կհրապարակվեն 2016 թվականի վերջին: Կ. Ներսիսյանը նշեց, որ աշխատանքներին օժանդակում են նաև ՀՀ համապատասխան կառույցները: Համայնքների ղեկավարներին ու դպրոցների տնօրեններին շրջվարչակազմի ղեկավարի կողմից եղավ հանձնարարական՝ օժանդակել համապետական այս կարևոր միջոցառմանը: Համայնքների ղեկավարների կողմից հնչեցին հարցեր տրանսպորտային միջոցների վերաբերյալ՝ հաշվի առնելով Քաշաթաղի շրջանի մեծ ընդգրկվածությունը, նաև այն, որ որոշ համայնքներ իրենց կազմում ունեն մի քանի բնակավայրեր: Կ. Ներսիսյանը հավաստիացրեց, որ այս հարցում ԱՎԾ կողմից օժանդակություն կլինի: Կատարված աշխատանքի վերաբերյալ հանդես եկավ նաև ԼՂՀ ԱՎԾ Քաշաթաղի բաժանմունքի ղեկավար Անդրանիկ Եսայանը: Նա ավելացրեց, որ հաշվարարների հարցերին պատասխանելը պարտադիր է, իսկ խուսափելը ԼՂՀ օրենսդրությամբ սահմանված կարգով ենթադրում է պատասխանատվություն: Տեղեկացվեց, որ մարդահամարի անցկացման նպատակով շրջանում կազմավորվել են 1 տեղամաս, 6 հրահանգչային տեղամաս և 36 հաշվային տեղամաս: Նշանակված են հրահանգիչ-հսկիչներ և հաշվարարներ, որոնց հետ պարբերաբար կազմակերպվել են սեմինարներ: Օրակարգի հաջորդ հարցը նվիրված էր շրջանում աշնանացանի աշխատանքներին, որի վերաբերյալ զեկուցեց շրջվարչակազմի գյուղվարչության ագրոտեխնիկական բաժնի վարիչ Նարեկ Դավթյանը: Ըստ զեկուցողի՝ արդեն իրականացվել է 12000 հեկտարից ավելի հերկ, 10000 հա-ից ավելի ցանքս, որից ցորեն՝ մոտ 7000 հա, մնացածը՝ գարի: Վարելահողերում աշխատում է 70 և ավելի վար, ինչպես նաև 40 ցանքս կատարող տեխնիկա: Այս տարվա առատ բերքը բարենպաստ պայմաններ է ստեղծել մկնանման կրծողների զարգացման համար: Այդ պատճառով հերկին ու ցանքսին զուգահեռ՝ վարելահողերում պայքար է տարվում վնասատուների դեմ: ԼՂՀ գյուղի և գյուղատնտեսության աջակցության հիմնադրամից (ԳԳԱՀ) ստացվել է 500 կգ թունաքիմիկատ, 200լ իզոցին և 300լ ձեթ: Այս օրերին արդեն 2500 հա տարածքի վրա իրականացվել է պայքար կրծողների դեմ: Աշնանացանի կատարման նպատակով ԳԳԱՀ-ից ստացվել է 46,5 մլն դրամի փոխառություն և 5000 լ դիզվառելիք՝ սուբսիդավորված՝ 1 լիտրը 350 դրամով: Ն. Դավթյանն ասաց, որ վերջին օրերի բարենպաստ եղանակը լավ պայմաններ է ստեղծել, և շրջանի հարավային թևում հողօգտագործողներն աշխատում են օր առաջ ավարտել հացահատիկի ցանքսը: Ելույթի վերջում Ն. Դավթյանը տեղեկացրեց նաև, որ Ստեփանակերտի կենտրոնական շուկայում Քաշաթաղի շրջանի գյուղատնտեսական մթերքներ արտադրողների համար անվճար հատկացվել են տաղավարներ, և ցանկացողները կարող են իրենց ապրանքը վաճառել այնտեղ, անհրաժեշտության դեպքում կտրամադրվեն նաև հյուրանոցային համարներ: Ամփոփելով խորհրդակցությունը՝ Ս. Խաչատրյանը հանձնարարեց համայնքների ղեկավարներին օժանդակել մարդահամարի անցկացմանը և աշնանացանը կատարել ժամանակին: Եղան նաև պարգևատրումներ: ԼՂՀ վարչապետի հուշամեդալով պարգևատրվեց շրջանի ՙԱնասնաբուժական սպասարկման կայան՚ ՊՈԱԿ-ի տնօրեն Արմեն Էլբակյանը՝ Քաշաթաղի շրջանի զարգացման ու ամրապնդման գործում ունեցած ավանդի և բարձր մասնագիտական կարողությունների դրսևորման համար: Իսկ 4 հոգի պարգևատրվեցին ԼՂՀ գյուղատնտեսության նախարարի պատվոգրով: 

Զոհրաբ ԸՌՔՈՅԱՆ ք. Բերձոր