[ARM]     [RUS]     [ENG]

ՙԱՎԱՆԴԱԿԱՆ ԱՐԺԵՔՆԵՐՆ ՈՒ ԱՐԴԻ ՄԱՐՏԱՀՐԱՎԵՐՆԵՐԸ՚

Մարտի 22-ին ՀՀ  Էջմիածին քաղաքում տեղի ունեցավ ՙԱվանդական արժեքներն ու արդի մարտահրավերները՚ վերտառությամբ 3-րդ միջազգային  գիտաժողովը, որը կազմակերպվել է   Սուրբ Աֆոն Լեռան Ռուսական սրբությունների պահպանման  բարեգործական հիմնադրամի նախաձեռնությամբ, Ռուս Ուղղափառ եկեղեցու, Հայ Առաքելական եկեղեցու, ՙՌազմավարական նախագծերի կենտրոն՚ ինքնավար ոչ կոմերցիոն կազմակերպության և Ռուսական գիտության և մշակույթի կենտրոնի (Երևան),  Հայաստանում ռուսական բուհերի ուսանողների ասոցիացիայի, Եվրասիայի ազգերի ասամբլեայի աջակցությամբ։ 

 Գիտաժողովի նպատակն է բացահայտել Ռուսաստանի և Հայաստանի ազգային ավանդական  արժեքների  դեմ ուղղված արդի հոսանքներն ու սպառնալիքները, որոնք առկա են ժամանակակից  լրատվական  դաշտում, ընդհանուր միասնական միջոցներ ձեռնարկել հակադրվելու արդի մարտահրավերներին,  ամրացնել հայ-ռուսական հարաբերությունների  քաղաքակիրթ հիմքերը,  նպաստել Հայաստանի և Ռուսաստանի հումանիտար և մշակութային համագործակցության ընդլայնմանը, Ռուս Ուղղափառ եկեղեցու և Հայ Առաքելական եկեղեցու օբյեկտիվ գիտելիքների տարածմանը,  պետական կենտրոնացված աջակցություն ցուցաբերել ընտանեկան ինստիտուտին, վեր հանել կրոնական աղանդների բացասական ներգործությունը, դատապարտել դրանց ապակառուցողական գործունեությունը, գործնական առաջարկություններ մտցնել` ուղղված ռուս և հայ ժողովուրդների շրջանում ավանդական և  բարոյական արժեքների պահպանմանն ու  զարգացմանը։  

Գիտաժողովում  հնչեցվեց  Հայաստանում Ռուսաստանի Դաշնության արտակարգ և լիազոր  դեսպան Իվան Վոլինկինի ուղերձը,  ելույթ ունեցան ՀՀ Ազգային ժողովի պատգամավորներ Հայկ Բաբուխանյանը և Կարեն Ավագյանը, Մայր Աթոռ Սուրբ Էջմիածնի սոցիալական գրասենյակի տնօրեն Տեր Մարկոս քահանա Մանգասարյանը, Հայ Առաքելական եկեղեցու ներկայացուցիչներ, հոգևոր, լրատվական, հասարակական, քաղաքական այլ գործիչներ։  Առանցքային թեմաները կապված էին ԶԼՄ-ներում ավանդական արժեքների քարոզչության, երիտասարդության վարքի վրա  սոցիալական ցանցերի անմիջական ներգործության, ԶԼՄ-ների օգնությամբ Ռուսաստանի և Հայաստանի ժողովուրդների շրջանում ավանդական քրիստոնեական արժեքների պահպանմանը, ընտանիքի ինքնավարության, Եկեղեցու և ԶԼՄ-ների փոխհարաբերություններին։ 

Գիտաժողովին հնչած առանցքային միտքն այն էր, որ այսօր Արևմուտքի կեղծ արժեքները երկկողմանի քայքայիչ ազդեցություն են թողնում հայ և ռուս ընտանիքների վրա։ Մի կողմից միասեռական ընտանիքի գաղափարը՝ որպես բնականոն երևույթ,  մյուս կողմից էլ ծնողներից երեխաների իրավունքների ՙպաշտպանությունը՚  փորձում են խցկել մեր իրականություն։ Մենք միասնաբար պետք է պայքարենք այս աղետի դեմ, օգտագործելով բոլոր ռեսուրսները։  Տեր Մարկոս քահանա Մանգասարյանը ԶԼՄ-ներին խորհուրդ տվեց ոչ թե ներկայացնել հասարակության հայելային պատկերը, այլ փորձել բարձր արժեքներ հաղորդել, կրթել ու դաստիարակել մատաղ սերունդը։  Երիտասարդներից  Մաքսիմ Սոկոլովը գործնական առաջարկներ ներկայացրեց այն մասին, թե ինչպես կարելի է սոցցանցերն օգտագործել ուղղափառ-առաքելական ճշմարիտ հավատքը երիտասարդներին փոխանցելու, աղանդավորական շարժումներին դիմագրավելու համար։ 

 Ամբողջ գիտաժողովի ընթացքում գործում էր հատուկ ցուցահանդես ՙԵկեղեցին՝ ընտանեկան և տոհմական հիշողության պահոց՚ թեմատիկայով։ Գիտաժողովին  արցախյան  ներկայացուցիչների մասնակցությունն ապահովեց ԱՀ մշակույթի, երիտասարդության հարցերի և զբոսաշրջության նախարարությունը։

Սոֆի ԲԱԲԱՅԱՆ

Ստեփանակերտ-Էջմիածին