[ARM]     [RUS]     [ENG]

ԵՎՍ ՄԵԿ ԱՍՏԾՈ ՏՈՒՆ ԱՐՑԱԽՈՒՄ

Արցախի Հանրապետության նախագահ Բակո Սահակյանը եւ ՀՀ վարչապետ Նիկոլ Փաշինյանը Հայաստանի եւ Արցախի բարձրաստիճան պաշտոնյաների հետ հունիսի 16-ին  այցելել են Մարտունու շրջանի Ճարտար քաղաք, որտեղ տեղի է ունեցել նորակառույց Սուրբ Վարդանանք եկեղեցու օծման արարողությունը:

Հայ Առաքելական Եկեղեցու Արցախի թեմի առաջնորդ Պարգեւ արքեպիսկոպոս Մարտիրոսյանի  ձեռամբ  մատուցվել է Սուրբ պատարագ:  

Եկեղեցին  կառուցվել է  արմատներով ճարտարցի, ռուսաստանաբնակ   Վլադիմիր Ավագյանի բարերարությամբ:  

Հունիսի 16-ի առավոտյան ղողանջեցին Սուրբ Վարդանանք նորակառույց եկեղեցու զանգերը՝ ազդարարելով   երկար սպասված իրադարձության մասին: Ավարտվել է տարիներ առաջ մեկնարկած շինարարությունը. Աստծո տունն արդեն պատրաստ է իր հարկի տակ ընդունել հավատացյալներին:  Ճարտարեցիների ուրախությանը միանալու են եկել նաեւ շրջակա համայնքների բնակիչներից շատերը: Այնպես որ, եկեղեցու հրապարակը լեփ-լեցուն էր:  

Այս նախաձեռնությունը  Վլադիմիր Ավագյանի  բարեգործական նախաձեռնությունների շղթայի մի օղակն է: Արդեն 5 տարի նրա ստեղծած Հայկական գյուղերի զարգացման հիմնադրամը լայնածավալ շինարարություն է  իրականացնում ոչ միայն Ճարտարում, այլեւ հարեւան Գիշի գյուղում, Մարտունի քաղաքում: Հիմնադրամը գործում է 2013 թվականից: ՙԱյս տարիների ընթացքում կառուցվել են մանկապարտեզ, բազմաբնակարան շենք, վերանորոգել ենք հիվանդանոցի շենքը, ճանապարհներ,- թվարկում է կառույցի գործադիր տնօրեն Էդգար Վարդապետյանը:-Ամենաթարմ օրինակը եկեղեցու շինարարությունն է Ճարտարում՚:  

Վլադիմիր Ավագյանի արմատները Ճարտարից են: Նա չի ծնվել Ճարտարում, բայց հոգու թելերով կապված է  իր արմատներին ու ամեն ինչ անում է   պապերի օրրանը   շենացնելու   համար:  ՙԵս շատ ուրախ եմ, որ ամեն ինչ լավ ստացվեց, այս 5 տարիները եղել են շատ արդյունավետ: Արդյունքը տեսանելի է: Մեր Հիմնադրամի   հոբելյանին  կառուցվեց այս եկեղեցին, որն ամփոփում է մեր   5 տարիների աշխատանքը: Ուրախ եմ, որ  այն   դուր եկավ բոլորին, և գոհ եմ, որ    կարողացա  ուրախություն պարգեւել Ղարաբաղին՚,- ասում է բարերարը: 

Ուրախ են  նաեւ     ճարտարցիները: Եկեղեցու կառուցումը գնահատում են որպես իրենց քաղաքի բարգավաճմանն ուղղված եւս մեկ քայլ: 

Հանդիպումն առանց նվերների չանցավ: Բարերար Վլադիմիր Ավագյանը Հայաստանի վարչապետ Նիկոլ  Փաշինյանին նվիրեց  շինարարական  գործիք` մալա,  մաղթելով, որ այն  օրվա մեջ 24 ժամ աշխատի, իսկ  Նիկոլայ  Հրաշագործի սրբապատկերը օգնի նրան   հրաշքներ գործել   նոր  պաշտոնում:

Նորայր ՀՈՎՍԵՓՅԱՆ