ՙՖՐԱՆՍԱՀԱՅ ԿԱՊՈՒՅՏ ԽԱՉ՚ ԿԱԶՄԱԿԵՐՊՈՒԹՅՈՒՆԸ
Արմեն ԲԱԼԱՍԱՆՅԱՆ
Փարիզ
Հայ ժողովուրդն իր երկար պատմության ընթացքում ճաշակել է ինչպես հաղթանակների բերկրանքը, այնպես էլ հալածանքների դառնությունը և որպես հետևանք` սփռվել աշխարհով մեկ: Ապրելով տարբեր երկրներում` հայերը կարողացել են համախմբվել, իսկ հայկական սփյուռքը դարձել է այնպիսի էթնոմշակութային խմբի տիպար, որին հաջողվել է պահպանել իր ազգային ինքնությունը: Սփյուռքի գաղափարախոսության հիմքում դրված են ՙպատմական հիշողություն՚ և ՙպատմական ճակատագրի ընդհանրություն՚ հասկացությունները: Հենվելով դրանց վրա` հայկական առաջատար հասարակական կազմակերպություններն աշխարհով մեկ լուծում են ազգի վերածննդին միտված խնդիրներ:
Ֆրանսիայում գործում են երեք հարյուրից ավելի հայկական հասարակական կազմակերպություններ: Նրանցից մեկը ՙՖրանսահայ կապույտ խաչ՚ կազմակերպությունն է (ՙLa Croix Bleue des Armeniens de France՚): Այն ոչ կառավարական հասարակական կանանց բարեգործական կազմակերպություն է, որը զբաղվում է մարդասիրական և սոցիալական գործունեությամբ Ֆրանսիայի հայկական սփյուռքում, ինչպես նաև Հայաստանում ու Լեռնային Ղարաբաղում:
Նրա ստեղծման պատմության, նախագծերի և ծրագրերի մասին սիրով համաձայնել է պատմել կազմակերպության նախագահ Սևան ՄԱՐԴԻՐՈՍՅԱՆԸ:
-Հարգարժան Սևան, պատմեք կազմակերպության մասին: Հայտնի է, որ այն ծնունդ է առել Արշակ Ջամալյանի նախաձեռնությամբ և սկզբում կրել է ՙԵվրոպայի հայկական կարմիր խաչ՚ (ՙLa Croix Rouge armenienne d’Europe՚) անունը: Ինչու՞ է կազմակերպությունը վերանվանվել: Ի՞նչ կառույց է այն այսօր իրենից ներկայացնում:
-ՙԿապույտ խաչը՚ ստեղծվել է 1928թ. Ֆրանսիայում: Ի սկզբանե կազմակերպությունը հայտնի էր որպես ՙԵվրոպայի հայկական կարմիր խաչ՚, բայց Հայաստանում խորհրդային իշխանություն հաստատվելուց հետո որոշում կայացվեց այն ՙՖրանսահայ կապույտ խաչ՚ վերանվանել: Այն ստեղծվել է ՙԴաշնակցություն՚ խմբակցությունից Հայաստանի անկախ Առաջին Հանրապետության կառավարության անդամ Արշակ Ջամալյանի նախաձեռնությամբ ու ղեկավարության ներքո:
Բարեգործական կազմակերպությունը միավորել է հայ կանանց, որոնք մարդասիրական օգնություն էին ցուցաբերում ցեղասպանությունից տուժած հայրենակիցներին, որոնք այդ տարիներին զանգվածաբար Ֆրանսիա էին գալիս: ՙԿապույտ խաչի՚ առաջին մասնաճյուղը բացվել է Մարսելում: Կազմակերպության գործունեությունն աստիճանաբար սկսվեց տարածվել Ռոնի հովտի քաղաքների վրա և, ի վերջո, հասավ Փարիզ: Այսօր ՙՖրանսահայ կապույտ խաչը՚ ունի Ֆրանսիայի 35 քաղաքներում գործող 15 խմբերի բաժանված շուրջ 500 անդամ: Ղեկավար մարմինը Տնօրենների խորհուրդն է, որն ընտրվում է ամեն երկու տարին մեկ: 1986 թվականից ՙԿապույտ խաչը՚ Ֆրանսիայում ճանաչված է որպես հանրօգուտ գործունեություն իրականացնող կազմակերպություն, ինչը մեզ որոշակի կարգավիճակ և պետական աջակցություն է տրամադրում:
-Ի՞նչ կարևոր նախագծեր է իրականացրել կազմակերպությունն իր գոյության տարիներին:
-Մինչև 1950-ական թվականները ՙԿապույտ խաչի՚ գլխավոր նպատակը հայ երեխաների համար հանգստի կենտրոններ ստեղծելն էր և հայերին բուժօգնություն ցուցաբերելը, քանի որ Ֆրանսիայում այդ տարիներին դեռ սոցիալական ապահովություն չկար: Կամավոր հիմունքներով բժիշկները խորհրդատվություններ էին տրամադրում հիվանդներին, երեխաներին փոխպատվաստումներ անում: ՙԿապույտ խաչը՚ զբաղվում էր ամառային հանգստի կազմակերպմամբ, բացում էր ամառային ճամբարներ: Նման առաջին ճամբարն ստեղծվել է 1935թ. օգոստոսին Նիցցայում, որտեղ հանգիստ կազմակերպվեց անապահով ընտանիքների տասնյակ հայ երեխաների համար:
Առաջին տարիներին օտարության մեջ ապրող հայերի կյանքը շատ ծանր էր, նրանց մեջ հարուստներ չկային: 1939թ. պատերազմի պատճառով Սան-Ժորժ-դե-Դիդոնայի մոտ գտնվող ճամբարում երեխաները մնացին մեկ տարուց ավելի: Եվ այսօր մենք մանկական կենտրոն ունենք Յուրա նահանգում: Այսօր Յուրան դարձել է հանդիպման վայր ոչ միայն հայկական ծագմամբ ֆրանսիացի երեխաների, այլև Լիբանանից, Սիրիայից, եվրոպական երկրներից հաճախ այստեղ այցելող հայ երեխաների համար:
Ստեղծման օրվանից սկսած` կազմակերպության աշխատանքի առաջնահերթություններից մեկը հայկական մշակույթի, նրա յուրատիպության և Մաշտոցի լեզվի պահպանումն է: Այսօր Ֆրանսիայում կա տասը դպրոց, որտեղ հայոց լեզու են սովորում երեխաներ` սկսած մանկապարտեզի տարիքից մինչև ավագ դասարաններ, իսկ երբեմն նաև մեծահասակներ: Հայոց լեզու և պատմություն են դասավանդում փորձառու ուսուցիչներ: Երգը, պարը և թատերական ներկայացումները ներառված են ուսուցման մեջ: ՙԿապույտ խաչի՚ մանկավարժական կոմիտեն աջակցություն է ցուցաբերում հայկական դպրոցներին և վերահսկում ուսուցման գործընթացը, պարբերաբար սեմինարներ է անցկացնում ուսուցիչների համար:
ՙԿապույտ խաչը՚ մասնակցում է հայկական պատմության բոլոր հիշարժան տարեթվերի առիթով կազմակերպվող տոնակատարություններին: Մենք նաև հոբելյանական միջոցառումներ ենք անցկացնում հենց կազմակերպությունում: Անցյալ տարի կազմակերպության ստեղծման 90-ամյակի առթիվ տեղի ունեցավ հիանալի համերգ` հանրահայտ իսպանացի վիրտուոզ ջութակահար Արա Մալիքյանի, Սիրուշոյի, BERT d’Armeni թատերական խմբի մասնակցությամբ: Բոլոր այն քաղաքներում, որտեղ գործում են ՙԿապույտ խաչի՚ ստորաբաժինները, անց է կացվել հայ կանանց նվիրված դասախոսությունների շարք: Կին ակտիվիստներին, որոնք ՙԿապույտ խաչում՚ աշխատել են իրենց կյանքի ավելի քան 40 տարին, շնորհվել են մեդալներ:
-Հայտնի է, որ ՙԿապույտ խաչը՚ մասնակցել է բազմաթիվ մարդասիրական նախագծերի, օրինակ, Լիբանանում, Խորհրդային Միության նախկին հանրապետություններում: Հայրենակիցներին մեծ օգնություն է ցուցաբերվել Լեռնային Ղարաբաղում հակամարտության ամենաթեժ պահին, Հայաստանում տեղի ունեցած երկրաշարժիչ հետո: Աշխատանքը շարունակակա՞ն է:
-Լիբանանում ապրում է ավելի քան 145 հազար հայ, և մենք չէինք կարող դժբախտության պահին նրանց անօգնական թողնել: Լիբանանում սկսված պատերազմի ժամանակ դրամահավաք ենք կազմակերպել, հումանիտար օգնություն էին ուղարկում և ընդունում Ֆրանսիա եկած մեր հայրենակիցներին: Երբ 1988թ. Սպիտակում տեղի ունեցավ սարսափելի, ողբերգական երկրաշարժ, ողջ սփյուռքը ցնցված էր: Ինչպես հայերի, այնպես էլ ֆրանսիացիների առատաձեռնությունը բացառիկ էր և մեզ թույլ տվեց աղետի գոտի հասցնել հագուստ, դեղորայք, մասնակցություն ունենալ բնակելի տների, դպրոցների վերականգմանը: Ընդհանուր առմամբ Ֆրանսիայում կամավորները հավաքել ու Հայաստան են ուղարկել հումանիտար օգնությունով շուրջ հարյուր ինքնաթիռ: Նման օգնություն է ցուցաբերվել նաև Արցախին:
Այսօր մենք տարբեր ծրագրեր ունենք: Առաջին հերթին ՙԿապույտ խաչը՚ հովանավորում է Հայաստանում ու Արցախում ապրող ծնողազուրկ երեխաներին: Մենք լրիվությամբ կամ մասամբ ֆինանսավորում ենք Արցախում Սոսե Մայրիկի անունը կրող ութ մանկապարտեզ: Անցյալ տարի կազմակերպությունը բժշկական մահճակալներ է գնել մարտական գործողությունների ժամանակ տուժած հաշմանդամ զինվորների վերականգնման համար: Ըստ հնարավորության նաև օգնում ենք Գյումրիից ոչ հեռու գտնվող Ախուրյանի մոր և մանկան առողջության կենտրոնին: Կենտրոնում գործում են ատամնաբուժական կլինիկա, գինեկոլոգիական, մանկաբուժական, ծննդաբերական բաժանմունք: Կենտրոնը ստեղծվել է 1988թ. երկրաշարժից հետո` բնակչությանը բժշկական օգնությամբ ապահովելու նպատակով: Մերձակա գյուղերում ապրող կանայք կարող են այստեղ անվճար ծննդօգնություն ստանալ: 20 տարվա ընթացքում ծննդատանը լույս աշխարհ է եկել ավելի քան 1600 երեխա:
Դրանից բացի, ՙԿապույտ խաչի՚ հատուկ նախագծի շրջանակներում իրականացվում է կրթաթոշակային ծրագիր` ուսման նպատակով Հայաստանից Ֆրանսիա գնացող ուսանողների համար:
-Ի՞նչ միջոցներով է ՙԿապույտ խաչը՚ իրականացնում իր գործունեությունը:
-Կազմակերպության ֆինանսավորման աղբյուրները ՙԿապույտ խաչի՚ մասնակիցների անդամավճարներն են, մասնավոր և իրավաբանական անձանց նվիրատվությունները, ինչպես նաև տարբեր մշակութային-կրթական ակցիաների և միջոցառումների անցկացումից ստացված եկամուտները: Բոլոր ակցիաները և միջոցառումները միտված են նախագծերի հաջող իրագործման, հայ ընտանիքներին, հայ երեխաներին օգնություն ցուցաբերելու համար միջոցներ հայթայթելուն: Միջոցառումերի ժամանակ մենք հայտարարում ենք` ինչ նախագծերի և ուր կուղղվեն միջոցները:
www.noev-kovcheg.ru