ՄԵԾ ԹԱՂԵՐԻ ԿԱՐՈՏՈՎ ՈՒ ՀՈՒՇԵՐՈՎ
Թամար ԳՐԻԳՈՐՅԱՆ
Ջուլիետա և Զավեն Լալայաններն Արցախի Հադրութի շրջանի Մեծ Թաղեր գյուղից են։ Զավենը, որ պահեստազորի սպա է, մինչև վերջին պատերազմը հայրենի գյուղում գյուղատնտեսությամբ էր զբաղվում։ ՙԸնտանի կենդանիներ էինք պահում` կով, խոզ, հավ, հնդկահավ, ճագար, ամեն ինչ ունեինք։ Ցորեն, գարի էի մշակում։ Խնձորի նոր այգի էի հիմնել՚։ Ջուլիետան տնային տնտեսուհի է. ընտանիքը չորս երեխա ունի։
Մեծ Թաղերը, որ Հադրութի շրջանի ամենամեծ գյուղն էր ու շրջկենտրոն Հադրութ քաղաքից հեռու է 22 կմ, ապահով էր համարվում։ ՙՍկզբից մեր բարեկամներն էլ էին եկել մեր գյուղ՝ որպես ավելի ապահով տեղ՚,- հիշում է Ջուլիետան։
Սեպտեմբերին սկսված պատերազմն ու դրան հաջորդած իրադարձությունները մինչև այսօր էլ ամուսիններին անիրական են թվում։ ՙԵրազի նման մի բան էր։ Սեպտեմբերի 27-ի առավոտյան դեռ քնած էինք, երբ պայթյունի ձայներ լսեցինք։ Պարզվեց՝ պատերազմ է։ Մտածում էինք՝ սա էլ է մի քանի օր տևելու, չէինք պատկերացնում, որ ամեն ինչ կորցնելու ենք՚,- պատմում է Ջուլիետան։
Ընտանիքի չորս երեխաներին հոկտեմբերի 1-ին ուղարկել են Երևան. պայթյունների ձայներից վախենում էին։ ՙԵս հոկտեմբերի յոթին եմ դուրս եկել։ Համոզված էի, թե մի քանի օր է տևելու, վերադառնալու ենք մեր տուն։ Եթե իմանայի, որ էլ տունս չեմ տեսնելու, գոնե երեխաների համար մի քանի շոր ու մի քանի լուսանկար կվերցնեի՝ հիշատակի համար՚։
Ամուսինը գյուղում է մնացել մինչև Մեծ Թաղերի ընկնելու օրը՝ հոկտեմբերի 22-ը։
ՙՄեր գյուղը գրավվել է հոկտեմբերի 22-ին։ Մինչև այդ տղամարդկանցով կազմակերպել էինք գյուղի ինքնապաշտպանությունը, հերթապահություն էինք անում, հսկում մեր գյուղը։ Վերջին օրը սկսեցին գյուղը ռմբակոծել։ Բոլոր տները հերթով խոցեցին, հարևանիս տունն աչքիս առաջ վառվեց՚,- պատմում է Զավենն ու հիշում՝ երբ հասկացել է, որ ստիպված են նահանջել, կերակրել ու ազատ է արձակել բոլոր ընտանի կենդանիներին։ ՙՉէի ուզում, որ գոմի մեջ մնան, վառվեն՚։ Մեծ Թաղեր գյուղի ինքնապաշտպանությանը մասնակցած գյուղացիները գյուղի անկումից հետո եղել են Թաղավարդի դիրքերում։ Գյուղում քաղաքացիական երեք զոհ է եղել։
Զավենն Արցախից դուրս է եկել նոյեմբերի 11-ին. եկել, Երևանում միացել է ընտանիքին։
ՙԵրևանում դժվար էր վարձով տուն ճարել, վարձն էլ բարձր է, երկար մնալ չէինք կարող։ Վանաձորում տների վարձն ավելի մատչելի է. ծանոթի միջոցով այստեղ տուն են գտել, տեղափոխվել։ Նախկինում երբևէ չէինք եղել Վանաձորում։ Սկզբից որոշ ժամանակ ապրեցինք մեր ծանոթի տանը, սակայն այդպես երկար հնարավոր չէր, ու տեղափոխվեցինք վարձով ապրելու՚։ Վարձով տունը համեմատաբար մատչելի է, հաշվի առնելով այն, որ տունն ինչ-որ չափով կահավորված է ու օգտագործելու իրեր կան. ընտանիքի ողջ գույքը մնացել է Մեծ Թաղերում։
Ջուլիետան կարոտով է պատմում հայրենի գյուղի մասին։ ՙՄոտավորապես 1500 բնակչություն ուներ Մեծ Թաղերը։ Հադրութի շրջանի ամենամեծ գյուղն էր։ Շատ սիրուն գյուղ էինք սարքել, ճանապարհները, փողոցները բարեկարգ էին, տեսարժան շատ վայրեր ունեինք։ Մնում էր միայն ապրել ու վայելել...՚։
Ընտանիքի չորս երեխաներից մեկը չափահաս է, մյուսները՝ դպրոցական։ Ավագ աղջիկը՝ Մանուշը, Ստեփանակերտի բժշկական քոլեջի ուսանողուհի էր, սակայն ստիպված է եղել կիսատ թողնել ուսումը։ ՙՄենք այստեղ ենք, նրան մենակ չենք կարող Ստեփանակերտ ուղարկել՚,- ասում է մայրը։ Վանաձորի պետական բժշկական քոլեջում ուսումը շարունակել չի ստացվել՝ տեխնիկական որոշակի հարցերի պատճառով։ Մանուշն այժմ վարսահարդարման դասերի է հաճախում։
Ընտանիքի մյուս երեխաները՝ Մարիաննան, Աննան և Արսենը, դպրոցականներ են։ Երեխաները գրեթե ամբողջությամբ բաց են թողել դասապրոցեսի երկու ամիսը. Երևանում միայն մի քանի օր են դպրոց գնացել, այն էլ՝ նոյեմբերի 9-ի հայտարարությունից հետո։ ՙԴրանից առաջ վստահ էինք, թե հետ ենք գնալու, և մի քանի օրվա համար չէի ուզում երեխաներին դպրոց ուղարկել՚։ Նոյեմբերի 25-ին Վանաձոր տեղափոխվելուց հետո, հենց հաջորդ օրը, երեխաներն ընդունվել են Վանաձորի թիվ 30 դպրոցը։ Ընդունելությունից ու վերաբերմունքից շատ գոհ են։ ՙԹե՜ տնօրենը, թե՜ փոխտնօրեններն ու ուսուցիչները ջերմ են ընդունել, երեխաներին նաև օժանդակել են գրենական պիտույքներով՚։ Նշենք, որ այս պահին Վանաձորի թիվ 30 դպրոցում սովորում է արցախցի 8 աշակերտ։ Ուսումնական գծով փոխտնօրեն Արմինե Պապիկյանի խոսքով՝ արցախցի երեխաներն ինտեգրվելու խնդիր չեն ունեցել, կանոնավոր հաճախում են դասերին։
Այնուամենայնիվ, երեխաների միտքն Արցախում է, հայրենի Մեծ Թաղերում։ Դասընկերների հետ կապ են պահում, մշտապես խոսում են միմյանց հետ։ Մարիաննան Տողի արվեստի դպրոցի սան էր։ Նկարել է սիրում, ձեռագործով զբաղվել։ Այս տարի ավարտում է հիմնական դպրոցը։ ՙԱվագ դպրոց կուղարկենք, իսկ հետո որևէ մասնագիտություն կսովորի։ Անորոշության մեջ ենք ապրում, չենք ուզում, որ ինքն էլ ուսումը կիսատ թողնի՚,- ասում է հայրը։
Արցախ վերադառնալու մասին ընտանիքն այժմ մտածել չի կարող։ Իրենց բոլոր հարազատներն ու ամբողջ ունեցվածքը Մեծ Թաղերում էին։ ՙԹե՜ իմ, թե՜ Զավենի հարազատները նույն գյուղում էին ապրում։ Հիմա ամենքը մի տեղ են տեղավորվել, չկա թեկուզ մեկը, ում մոտ կարող ենք գնալ։ Ո՜չ Մարտակերտում, ո՜չ Մարտունիում, ո՜չ Ստեփանակերտում գնալու տեղ չունենք՚,- ասում է Ջուլիետան։
Զավեն Լալայանը վստահ է՝ ՙԱրցախ կվերադառնանք, եթե մեր գյուղը մերը լինի՚։
;