ՉԿՏՐՎԵՆՔ ՄԵՐ ՊԱՏՄՈՒԹՅՈՒՆԻՑ, ԱՐՄԱՏՆԵՐԻՑ
Էմմա ԲԱԼԱՅԱՆ
Վերջերս գնացել էի Մարտակերտի շրջանի Առաջաձոր գյուղ, որը բավականին հին բնակավայր է՝ հետաքրքիր պատմություններով և նշանավոր մարդկանցով։ Արցախյան 2-րդ պատերազմի ցավալի հետևանքները հուշում են, որ պետք է հնարավորինս շատ անդրադառնալ մեր գյուղերի պատմությանը։ Ծանոթանանք Առաջաձորի հիշարժան էջերին՝ դպրոցի տնօրեն Նելլի Աթանեսյանի ասածների հիման վրա։
Գյուղը հիշատակվում է 10-րդ դարից, տեղակայված էր այժմյան վայրից ավելի բարձր տեղում՝ անտառի մեջ։ Պահպանված են 2 գյուղատեղիների ավերակները, որոնք կրում են Փլուսանց (ամենայն հավանականությամբ՝ տոհմի անունով) շեն և Տկատեղ (տակի թաղ) անվանումները։ Գյուղատեղերի մոտ՝ Խաչեր տեղանքում, պահպանված են նաև խաչքարեր։ Այժմյան գյուղի տարածքում գտնվել են 13-րդ դարից թվագրված խաչքարեր, շրջակայքում՝ երկու ժայռափոր եկեղեցի` երկու քարակոփ խաչարձաններով (12-րդ դար), որտեղ կան գիտնականների կողմից ուսումնասիրված արձանագրություններ։ Նրանց հավաստմամբ՝ այդտեղ նշված են Առանշահիկների տոհմին պատկանող անձանց անուններ։ Ենթադրվում է, որ գյուղը հիմնվել է այդ ժամանակաշրջանում, այն միշտ կրել է Առաջաձոր անունը (ենթադրվում է, որ բարձունքից իջնելով, բնակվել են 1-ին հանդիպած ձորում)։ Սակայն, ամենայն հավանականությամբ, այդ տեղանքը բնակեցված էր հինավուրց ժամանակներից, քանի որ գյուղի մատույցներում հայտնաբերվել են մ.թ.ա. 3-րդ հազարամյակի դամբարաններ։ Գյուղում պահպանվել է Սուրբ Աստվածածին եկեղեցին (17-րդ դար), որտեղ մինչև 19-րդ դարի վերջը պահպանվել էին երկու նշանավոր ձեռագրեր, որոնք այժմ գտնվում են Մատենադարանում։ Պատմությունը վկայում է, որ գյուղը երբեք ուրիշների տիրապետության տակ չի հայտնվել։
Երևի քչերը գիտեն, որ Վահան Տերյանի կինը՝ Անահիտ Շահիջանյանը, արմատներով Առաջաձոր գյուղից է։ Տերյանի աղջիկը՝ Նվարդը, իրենց տոհմի կենսագրականում գրում է, որ մայրական պապը գերազանց ավարտել է Առաջաձոր գյուղի դպրոցը և 1883թ. շարունակել ուսումը Բաքվում, ապա Դերբենտում, որտեղ հիմնել է կտորեղենի բավականին մեծ խանութ։ Աղջկան՝ Անահիտին, ուղարկել է Մոսկվա՝ ուսումը շարունակելու։ Վերջինս Մոսկվայում անցել է աշխատանքի Ազգությունների կոմիսարիատում, որտեղ և աշխատում էր Տերյանը։ Գյուղի քահանա Տեր-Գրիգորյանի զավակները դարձան նշանավոր գիտնականներ, հասարակական գործիչներ. լեզվաբան Ահարոն Գրիգորյան, բժիշկ Արամայիս Գրիգորյան, գյուղատնտեսության նախարարի տեղակալ Արեգ Գրիգորյան։ Այսօր էլ առաջաձորցի Լեոնիդ Թելյանը դասախոսում է ԵՊՀ-ի լեզվաբանության և գրականության ամբիոնում, բանասիրական գիտությունների թեկնածու է, ՙՀայոց լեզվի շտեմարանի՚ հեղինակ։
Ցարական Ռուսաստանի կողմից 1902 թվականին բացված առաջին պետական դպրոցը տեղակայվել է թիֆլիսաբնակ մեծահարուստ Մարկոս աղա Դոլուխանյանի երկհարկանի ամառանոցում, որը կառուցվել էր 1842թ. և ծառայել մինչև 1976 թվականը, երբ հիմնվել է նոր տիպային դպրոց՝ 250-300 աշակերտի հաշվարկով։ Սակայն 44 տարվա ընթացքում այն հայտնվել է անմխիթար վիճակում՝ լի բազում խնդիրներով։
Ինչպես Արցախի բոլոր գյուղերը, Առաջաձորն էլ է 1988-ից լծվել Արցախյան ազգային-ազատագրական շարժմանը, երկրամասի ինքնապաշտպանական գործողություններին։ 1989 թվականին ստեղծվել է ջոկատ՝ Մ. Ալավերդյանի հրամանատարությամբ, ազատամարտիկները հետագայում ներառվել են ՊԲ ստորաբաժանումներում և մասնակցել Մարտակերտի, Աղդամի, Ասկերանի և այլ շրջանների ինքնապաշտպանական ու ազատագրական մարտերին? Առաջաձորից զոհվել է 29 ազատամարտիկ, որոնց հիշատակի համար կառուցվել է հուշարձան։
Չկտրվենք մեր պատմությունից, արմատներից, դասեր քաղենք անցյալի սխալներից, քանզի դա է մեր իղձերի իրականացման և ապագա կառուցելու ճանապարհի գրավականը։