ՏԵՂԱՀԱՆՎԱԾ ՁԵՌՆԵՐԵՑԸ ՏՈՒՆ է ԿԱՌՈՒՑՈՒՄ ՀԱՅՐԵՆԱԿԻՑՆԵՐԻ ՀԱՄԱՐ
Լուսինե ՇԱԴՅԱՆ
Շուշիից տեղահանված Էդգար Հայրապետյանն Արցախում վերագործարկել է շինարարության ոլորտում երկամյա փորձ ունեցող իր կազմակերպությունը։
Պատերազմից հետո շինարարության ոլորտում գործունեությունը շարունակելը նա պայմանավորում է երկրում ընթացող շինարարության լայն ծավալներով։ Մինչև Արցախյան երրորդ պատերազմը Շուշիում գործած նրա կազմակերպությունն այժմ առավել ծավալուն շինաշխատանքներ է իրականացնում:
-Շուշիում շինարարական կազմակերպությունը մեր եկամտի միակ աղբյուրը չէր: Շինանյութի խանութ և աշխատանք ունեի որպես «Արցախփոստ»-ի Շուշիի բաժանմունքի տնօրեն,- ասում է Էդգարը:
Պատերազմից հետո ստիպված էր ամեն ինչ սկսել զրոյից: Ուսերին բազմազավակ ընտանիքի հոգսն էր, իսկ աշխատելն Էդգարի կենսակերպն է:
- Անկախ հանգամանքներից միշտ պետք է առաջ նայել: Ներքին մի ուժ ինձ միշտ մղում է ստեղծելու, արարելու,-ասում է:
Նրա համոզմամբ՝ դժվարությունները կյանքի անբաժանելի, բայց և ժամանակավոր մասն են:
Ներկայում Էդգարը ձեռնարկատիրական գործունեություն է իրականացնում միայն շինարարության ոլորտում: Նրա խոսքով՝ գործը վերսկսելու համար նրան աջակցել է Արցախի Հանրապետության նախագահը:
Արդյունքում՝ Շուշիից բռնատեղահանված ձեռներեցի հիմնած «Ստաս Ստրոյ» շինկազմակերպությունն արդեն կանոնավոր ու համակարգված գործունեություն է ծավալում:
-Կյանքի փորձը ցույց է տվել, որ միայն աշխատելով ու չարչարվելով կարելի է ինչ-որ բանի հասնել,-համոզված է մեր զրուցակիցը:
Աշխատում են նոր կազմով, հայրենանպաստ գործունեության գիտակցումով: Շինարարական կազմակերպության բոլոր 8 աշխատակիցները նույնպես տեղահանված են՝ Շուշիից:
-Կառուցում ու վերանորոգում ենք՝ ձգտելով գոհացնել հասցեատերերին, թերությունների դեպքում էլ՝ տեղում շտկում ենք,-ասում է:
Բազմազավակ ընտանիքի հայրն աշխատելու, արարելու մեծ էներգիա ունի: Դժվարություններ հաղթահարելու նրա բանաձևը համբերատարությունն է, կյանքի սկզբունքը՝ երբեք չընկրկելը:
Պատերազմից հետո Հայրապետյանների ընտանիքում ծնված 5-րդ զավակը՝ Սոֆիան, ընտանիքի ներքին ուժն ու անկոտրում ոգու խորհուրդն է, կյանքի նոր սկիզբը...