ԱՄԵՆԱԳՆԱՑ ՄԵՔԵՆԱՆԵՐ ՀԱՄԱՅՆՔՆԵՐԻՆ
Ամանորի նախօրեին Քաշաթաղի շրջանի 3 համայնքներ ԼՂՀ կառավարության կողմից անչափ անհրաժեշտ նվեր ստացան՝ ամենագնաց ՙՈՒԱԶ՚ մակնիշի մեքենաներ:
Դեկտեմբերի 29-ին շրջվարչակազմի շենքի մոտից մեքենաները Ձմեռ Պապի և Ձյունանուշի ուղեկցությամբ ուղևորվեցին Ծիծեռնավանքի, Արտաշավիի գյուղական և Որոտանի քաղաքային համայնքներ:
Շրջվարչակազմի ղեկավարի տեղակալ Արտուշ Մխիթարյանի հետ մեկնում ենք Որոտան: Շրջանի 4-րդ քաղաքային համայնքը վերջերս է կազմավորվել: Զինվորականների բազմահարկ շենքի մոտ Ձմեռ Պապին ու Ձյունանուշին էին սպասում քաղաքի մի խումբ երեխաներ։ Սկզբում Ձմեռ Պապն ու Ձյունանուշը բաժանում են երեխաների համար նախատեսված նվերները: Մանուկներից շատերը հանդես են գալիս ասմունքով, երգով և արժանանում ծափերի ու նվերի: Ներկաներին Ամանորի առթիվ շնորհավորեց շրջվարչակազմի ղեկավարի տեղակալ Արտուշ Մխիթարյանը և տեղեկացրեց, որ համայնքին հատկացվել է ավտոմեքենա, որը նվերներով լի բերել է Ձմեռ Պապը: Անձամբ Ձմեռ Պապն էլ համայնքի ղեկավար Կոմիտաս Դավթյանին հանձնեց մեքենայի բանալիները՝ մաղթելով, որ այն անփորձանք ծառայի բնակչությանը: Համայնքի ղեկավարը, որ նախկին զինվորական է, եղել է գումարտակի հրամանատար, շնորհակալություն հայտնեց և շնորհավորեց տոների առթիվ՝ մաղթելով, որ 2014-ը բերի միայն ու միայն բարիք ու հաջողություն: