ՓՈՐՁՈՒՄ ԵՆ ԼՈՒԾԵԼ ՏԵՂԱՀԱՆՎԱԾՆԵՐԻ ԽՆԴԻՐՆԵՐԸ
Նունե ՀԱՅՐԱՊԵՏՅԱՆ
Պատերազմը և դրան հաջորդած իրականությունը գործադիր իշխանության բոլոր օղակներին ստիպել է սրբագրումներ անել ծրագրերի առաջնահերթություններում ու անելիքներում։ Տարածքային կառավարման և ենթակառուցվածքների նախարարությունը թերևս ամենածանրաբեռնված ռեժիմով աշխատող, բայց և տարհանված բնակչության կողմից ամենահաճախ քննադատության ենթարկվող գերատեսչություններից մեկն է: Սա էլ ինչ-որ տեղ բացատրելի է. բնակչությունը բաժանվել է տանտերերի ու տեղահանվածների, տուն առաջարկողի ու բնակարան որոնողի։ Վերջինները տարաբնույթ բողոքներով ու դժգոհություններով առաջինը վերոհիշյալ գերատեսչության դռներն են բախում՝ հաճախ չընդունելով, որ շատ հարցերի պատասխաններ նախարարության գործառույթներից դուրս են։
Դեռ նոյեմբերից սկսած ՏԿԵ նախարարությունն սկսել էր Ստեփանակերտի և ԱՀ շրջանների հյուրանոցներում տեղավորել սեփական տունը կորցրած քաղաքացիներին։ Ըստ նախարարության մամուլի խոսնակ Վաչե Վարդանյանի տեղեկատվության` մինչ այսօր հյուրանոցներում և հյուրատներում բնակեցվել է 1300 քաղաքացի: Այս գործընթացում ևս սահմանվել են առաջնահերթություններ. նախ կացարաններով ապահովվել են զոհվածների, հաշմանդամություն ձեռք բերած անձանց, զինծառայողների ու բազմազավակ ընտանիքները: Բոլոր հյուրանոցները չէ, որ լուծում են կենվորների սննդի հարցը, սակայն հյուրանոցներում կան ընդհանուր օգտագործման խոհանոցներ, լվացքատներ, առանձին լոգարաններ։ Նախարարությունը գործող տարբեր սոցիալական աջակցության ծրագրերի շրջանակներում փորձում է լուծում գտնել, որպեսզի հյուրանոցներում ապրող ընտանիքները կարողանան ինքնուրույն լուծել կեցության համար կարևոր խնդիրները։ Ներկա դրությամբ քաղաքացիներին բնակեցնելու գործընթացը ժամանակավորապես դադարեցված է, քանի որ հյուրանոցներում ազատ սենյակներ չկան: Չնայած դրան` նախարարությունում շարունակում են հերթագրել հյուրանոցի կարիք ունեցողներին: Ըստ Վ. Վարդանյանի՝ հյուրանոցներում ապրողներից շատերն ընթացքում տեղափոխվում են գյուղական համայնքներ, որոշում են ապրել հարազատների տներում, կան նաև, որ ինքնուրույն բնակարան են վարձակալում։ Ազատված սենյակները տրամադրվում են՝ հաշվի առնելով կարիքավորության աստիճանը։ Գերատեսչության պատասխանատուները նաև ազատ ու վարձակալության համար հարմար բնակարանների ու առանձնատների տերերի հետ են մշտական կապի մեջ՝ տեղահանված ընտանիքներին կացարաններով ապահովելու համար։ Ինչ վերաբերում է վարձավճարների փոխհատուցումներին, ապա մեր զրուցակիցը մեկ անգամ ևս շեշտեց, որ ծրագիրն իրականացնում է Արցախի կառավարությունը ու շահառու են նրանք, ովքեր տարհանվել են, կամ որոնց անշարժ գույքը Ադրբեջանի կողմից 2020 թ. սեպտեմբերի 27-ին սանձազերծված պատերազմի պատճառած ավերածությունների հետևանքով դարձել է ոչ պիտանի և այդ քաղաքացիները շարունակում են ապրել Արցախում:
Ծրագրի իրականացումն ուժի մեջ է մտնում տանտիրոջ հետ պայմանագիրը ստորագրելու օրվանից և գործում է անորոշ ժամկետով։ Շրջաններում այդ գործընթացն իրականացվում է վարչակազմերում, մայրաքաղաքում` ՏԿԵ նախարարության համապատասխան բաժիններում։ Ստեփանակերտում վարձավճարի փոխհատուցման չափերը կազմում են են 45-80 հազար դրամ՝ կախված սենյակների քանակից, իսկ շրջաններում՝ 30-70։ Պետության կողմից բնակարանների և բնակելի տների վարձավճարի փոխհատուցման ծրագիրը շարունակվում է: Բնակարաններ քաղաքացիները վարձակալել են ԱՀ բոլոր շրջաններում: Ըստ մեր զրուցակցի` վարձավճարների փոխհատուցման ուշացումները կապված են պայմանագրերի մեծ քանակի և քաղաքացիների կողմից կրկնակի պայմանագիր կնքելու հետ, որն ավելի է բարդացնում աշխատանքը: Ներկայում արդեն ամբողջությամբ ավարտված է ապրիլ ամսվա և շարունակվում է մայիսի վարձավճարների փոխհատուցումը։ Նախարարությունը պարբերաբար հիշեցնում է, որ պայմանագրերը լուծելու դեպքում առավելագույնը մեկ շաբաթվա ընթացքում պետք է ներկայանալ նախարարություն:
Նաև վարչակազմերից նախարարությունը ճշգրտել է տեղահանված այն քաղաքացիների ցուցակները, ովքեր պատրաստ են մշտապես բնակվել հանրապետությունում՝ հետագայում կառուցվող տներից նրանց հատկացնելու համար։ Համայնքների ազատ բնակարանային ֆոնդը քաղաքաշինության նախարարության հետ համագործակցության պայմաններում արդեն ճշգրտված է, դրանց մեծ մասն արդեն վերանորոգվել ու հատկացվել է առավել կարիքավոր խմբերին։ Լուրջ խնդիր է հեռավոր համայնքներում տեղավորելու գործընթացը։
Նախարարության իրավաբանական և վերահսկողական վարչության պետ Անուշ Մարտիրոսյանի տեղեկատվությամբ` նախարարությունը որոշակի աշխատանքներ է տանում նաև անբարեխիղճ տանտերերի կամայականությունների դեմ մեխանիզմներ կիրառելու ուղղությամբ: Տեղահանված ընտանիքին անհիմն տնից հանելու կամ գործող վարձավճարը բարձրացնելու դեպքում տանտերերը կարող են ենթարկվել 150 հազար դրամ կազմող տուգանային պատժի: Բացի այդ, շահագրգիռ գերատեսչությունների մասնակցությամբ ներկայում աշխատանքներ են տարվում նաև պատերազմի հետևանքով գույքային վնաս կրած ֆիզիկական և իրավաբանական անձանց աջակցության ծրագրեր գործարկելու ուղղությամբ: Նախատեսվում է վնասի փոխհատուցում հատկացնել այն անձանց, ովքեր պատերազմի հետևանքով կորցրել են հասարակական և արտադրական նշանակության շենք-շինություն, մարդատար և բեռնատար մեքենաներ, գյուղատնտեսական, շինարարական և այլ տեխնիկա, ձեռնարկատիրական գործունեության մեջ օգտագործվող հիմնական միջոցներ, կաթնատու և մսատու կենդանիներ, մեղվաընտանիքներ, պտղատու և խաղողի այգիներ:
Նախարարությունում այժմ ավարտվել է վերահսկողությունից դուրս մնացած տարածքներում ֆիզիկական անձանց կորցրած մարդատար ավտոմեքենաների մասին տվյալների հավաքագրումը` հետագայում դրանց շուկայական գնի ավելի քան կեսի չափով փոխհատուցում տրամադրելու համար: Վարչության աշխատակցի խոսքով այդ թիվը մոտ է 4 հազարին:
ՏԿԵ նախարարությունում նաև ակտիվ աշխատանքներ են տարվում մայրաքաղաքի հետ համայնքների տրանսպորտային կանոնավոր կապ ապահովելու ուղղությամբ` ընդգրկելով սահմանամերձ դարձած գյուղերը։ Վ. Վարդանյանի խոսքով` արդեն երկու նոր երթուղի է գործում՝ Ստեփանակերտ-ՆՆգի-Մարտունի-Կարմիր Շուկա-Ստեփանակերտ և Ստեփանակերտ- Սարուշեն-Կարմիր Շուկա-Մարտունի-Ննգի- Ստեփանակերտ ուղղությամբ։