ՌՈՒՍԱԿԱՆ ԽԱՂԱՂԱՊԱՀ ԶՈՐԱԽՄԲԻ ԶԻՆԾԱՌԱՅՈՂՆԵՐԸ ԿԱՏԱՐԵԼԱԳՈՐԾԵԼ ԵՆ ՙԹԱՓԱՌՈՂ՚ ԱԿԱՆԱՆԵՏՈՎ ԺԱՄԱՆԱԿԱԿԻՑ ՄԱՐՏ ՎԱՐԵԼՈՒ ՆՈՐ ՀՆԱՐՔՆԵՐԸ
Ռուսական խաղաղապահ զորախմբի (ՌԽԶ) զինծառայողները շարունակում են կատարել Լեռնային Ղարաբաղում կրակի և ռազմական գործողությունների դադարեցման պայմանավորվածությունների վերահսկմանը և դիտարկմանն ուղղված խնդիրները, ինչպես նաև ապահովում են շփման գծի մերձակայքում գտնվող բնակավայրերի ինժեներական ենթակառուցվածքների վերականգնողական աշխատանքների անվտանգ անցկացումը:
ՌԽԶ մամուլի ծառայության հաղորդմամբ, ռուսական խաղաղապահ հավաքակազմի զինծառայողները Լեռնային Ղարաբաղի Մարտունու շրջանի՝ սահմանազատող գծի մերձակայքում գտնվող հատվածներում ապահովել են ՙՋրմուղ-կոյուղու՚ աշխատակիցների անվտանգությունը ջրաբաշխիչ համակարգի կառուցման ժամանակ՝ մերձակա գյուղեր խմելու ջուր մատակարարելու համար:
Նախքան ջրհորի հորատումը, պոմպակայանի տեղադրումը և խողովակների անցկացումը, խաղաղապահ զորախմբի հումանիտար ականազերծման ստորաբաժանման սակրավորներն ականազերծել և մաքրել են ջրհորի համար նախատեսված տարածքը պայթյունավտանգ և չպայթած առարկաներից:
ՙԱյժմ մաքրում ենք ջրհորի մերձակայքը, որպեսզի ապահովենք հակահրդեհային անվտանգությունը: Տարանցիկ ջրամատակարարումը ջրով կապահովվի Կարմիր շուկա և Թաղավարդ բնակավայրերը: Միայն Թաղավարդ գյուղում ապրում է 1000 մարդ, նրանք կապահովվեն խմելու ջրով, Կարմիր շուկայում ապրում է գրեթե նույնքան մարդ՚, -ասել է ՙՋրմուղ-կոյուղու՚ ներկայացուցիչ Մխիթար Բաբայանը: ՙՀաջորդ շաբաթվանից ջուր կմատակարարվի այստեղից: Խաղաղապահներն, իհարկե, օգնում են մեզ, որպեսզի մենք աշխատենք անվտանգ պայմաններում, մենք` նրանց շատ շնորհակալ ենք դրա համար՚, - ասաց նա:
Ինժեներական համալիր աշխատանքների ավարտից հետո՝ ուղղված ջրակայանի կառուցմանը և ջրագծի անցկացմանը, Ստեփանակերտ քաղաքի մերձակա 10 բնակավայրերի շուրջ 5 հազար բնակիչ կապահովվի խմելու ջրով՝ արտեզյան ջրհորից:
Ամեն օր ռուս խաղաղապահները Մարտունու շրջանում սահմանազատող գծի մերձակայքում գտնվող հատվածներում անց են կացնում աշխատանքներ՝ ուղղված չպայթած ռազմամթերքի, արկերի և ականների հայտնաբերմանը: Հումանիտար ականազերծման ստորաբաժանման զինծառայողները կատարում են բնակավայրերի և գյուղատնտեսական նշանակության հողերի և արոտավայրերի մաքրման աշխատանքներ:
Վերջին երկու շաբաթների ընթացքում ռուս խաղաղապահները Խերխան գյուղում ավարտել են 32 հա տարածքի մաքրման աշխատանքները՝ պայթյունավտանգ առարկաներից, այդ թվում նաև սեփականություն հանդիսացող և գյուղատնտեսական կարիքների համար ծառայող տարածքներում: 12 շինությունների ստուգման ժամանակ խաղաղապահները հայտնաբերել և ոչնչացրել են 17 պայթյունավտանգ առարկա:
Ռուս սակրավորները ստուգել են ընդհանուր թվով 1920 շենք-շինություն (դրանց թվում սոցիալական նշանակության 31 օբյեկտ), մաքրել` ավելի քան 668,3 կմ ճանապարհ, 2231,5 հա տարածք, հայտնաբերել և ոչնչացրել են 25 781 պայթյունավտանգ առարկա:
Մարտական պատրաստության պլանային պարապմունքների շրջանակում, ՌԽԶ զինծառայողները կատարելագործել են ՙթափառող՚ ականանետով ժամանակակից մարտ վարելու նոր հնարքները Ստեփանակերտի զորավարժարանում:
Հրետանային հաշվարկները համազարկ են կատարել լեռներում բնական խոչընդոտների հետևում գտնվող չդիտարկվող թիրախների վրա՝ մեքենաների թափքերում տեղադրված զենքերից:
Ականաձիգները լեռնային տեղանքի պայմաններում կարճ ժամանակահատվածում խոցել են շուրջ 50 թիրախ, որոնք ընդօրինակում էին հակառակորդի զրահատեխնիկան, կենդանի ուժը և դիրքերը՝ 500-2000 մետր հեռավորության վրա:
ՙԱյսօր հատուկ պատրաստության շրջանակներում կատարելագործել ենք ականանետային հաշվարկների շարժական խմբերի գործողությունները: Հաշվարկների առաջադրանքը հետևյալն էր. հրաման ստանալուց հետո շարժվել դեպի ժամանակավոր դիրք, ճնշել թիրախը և առավելագույնս կարճ ժամանակում լքել դիրքը: Առաջադրանքի կատարման ժամանակը կրճատելու նպատակով 82-միլիմետրանոց ականանետերն արդեն տեղադրված են հաստիքային տեխնիկայի վրա, ինչը կրճատում է կրակային դիրքը զբաղեցնելու ժամանակը: Անձնակազմին հաջողվել է կատարել առաջադրանքը, այսօրվա համար ստանում են լավ և գերազանց գնահատականներ՚, - ասել է պարապմունքները ղեկավարող զինծառայող Անդրեյ Մոխովը:
ՙԹափառող՚ ականանետերի մարտավարությունը խաղաղապահների ականանետային հաշվարկներին թույլ է տալիս վայրկյանների ընթացքում հետ մղել պայմանական հակառակորդի գերազանցող ուժերի գրոհը և առավելագույնս արագ փոխել կրակակետերը` հակամարտկոցային պայքարի շրջանակներում:
ՌԽԶ զինծառայողներն ապահովել են Լեռնային Ղարաբաղի Ասկերանի շրջանի բնակիչների անվտանգությունը կողմերին սահմանազատող գծի մերձակայքում ընթացող հացահատիկային մշակաբույսերի բերքահավաքի ժամանակ:
ՙԱյսօր մեր խնդիրը բերքահավաքի աշխատանքների անվտանգ անցկացումն է: Բերքահավաքն Ասկերանի շրջանում կշարունակվի մինչև շաբաթվա վերջ: Աշխատանքներն ընթանում են սահմանազատող գծի մերձակայքում, ուստի մեր ներկայությունն անհրաժեշտ է՚, - ասել է ՌԽԶ ներկայացուցիչ Իգոր Սերգեևը:
Լեռնային Ղարաբաղի հեռավոր շրջաններում ցորենի բերքահավաքն սկսվել է ուշացումով, ռուս սակրավորների կողմից դաշտերը պայթյունավտանգ առարկաներից մաքրելուց և ականազերծելուց հետո:
ՙՀավաքում ենք ցորենի բերքը, դաշտերը քիչ են, բայց մշակում ենք այն, ինչ մնացել է: Շնորհակալ ենք ռուս խաղաղապահներին: Շուտով կսկսվեն աշնանացանի աշխատանքները, հուսով ենք, որ այսուհետև էլ խաղաղապահները մեզ կօգնեն՚, -ասել է Ասկերանի շրջանի բնակիչ Սուրեն Բաբայանը:
Լեռնային Ղարաբաղում բերքահավաքը գրեթե ավարտված է, բայց տեղի բնակչությունն արդեն դիմում է Հումանիտար արձագանքման կենտրոն, որպեսզի չխաթարվեն ցանքսի աշխատանքները:
Ընթացիկ շաբաթ ՌԽԶ զինծառայողներն այցելել են Ստեփանակերտի Երեխաների խնամքի և պաշտպանության թիվ 1 գիշերօթիկ հաստատություն: Ներկայումս գիշերօթիկ հաստատությունն ունի 18 սան, նրանք հիմնականում 7-ից 18 տարեկան երեխաներ են՝ սոցիալապես անապահով ընտանիքներից: Ռուս խաղաղապահները գիշերօթիկ հաստատությանն են փոխանցել շուրջ 1 տոննա հումանիտար բեռ, մասնավորապես խաղալիքներ, գրքեր, գրենական պիտույքներ, խոհանոցային պարագաներ, պարենային ապրանքներ: իշերօթիկ հաստատությունում անց է կացվել ՙՊատանի խոհարար՚ խորագրով մրցույթ, որի ժամանակ դպրոցի սաներն իրենց հմտություններն են փորձել տնային կարկանդակների պատրաստման խոհարարական արվեստում:
ՙՄենք ամեն շաբաթ ենք միջոցառումներ կազմակերպում: Մինչ այդ անց ենք կացրել պիցցայի պատրաստման մրցույթ: Մենք շատ ուրախ ենք, որ մեզ հյուրընկալվել եք: Հուսով ենք` համագործակցությունը կլինի շարունակական: Կարծում եմ, որ միասին կկարողանանք բարելավել մեր սաների կյանքն ու կենցաղը՚, - ասել է Երեխաների խնամքի և պաշտպանության գիշերօթիկ հաստատության տնօրեն Համեստ Սիմոնյանը:
Ռուս խաղաղապահները ժյուրիի կազմում համտեսել և գնահատել են կարկանդակների արտաքին տեսքը և համային որակները, ինչպես նաև պատրաստման ընթացքում պատանի խոհարարների թիմային աշխատանքի համակարգվածությունը: Այսօր Ստեփանակերտի Երեխաների խնամքի և պաշտպանության թիվ 1 գիշերօթիկ հաստատության տնօրենը մեզ հրավիրել է որպես ժյուրի մասնակցելու ՙՊատանի խոհարար՚ մրցույթին: Մրցույթին մասնակցել է 12 երեխա՝ գիշերօթիկ դպրոցի սաները՚, - ասել է ՌԽԶ ներկայացուցիչ Դմիտրի Տուսիդին: ՙՄասնակցել է ընդհանուր թվով 3 թիմ, որոնք այսօր մրցել են թխվածք պատրաստելու գործում: Արդյունքներով նրանց հանձնվել են պատվոգրեր և քաղցր նվերներ՚, - ասել է նա:
ՌԽԶ սպաները Թաղավարդ գյուղի դպրոցականների հետ անց են կացրել ՙԽաղաղապահ՚ խորագրով ինտերակտիվ դաս: Սկզբում նրանք պատմել են Լեռնային Ղարաբաղում և ընդհանրապես ամբողջ աշխարհում խաղաղապահ ստորաբաժանումների գլխավոր առաքելության մասին, ինչպես նաև ներկայացրել են Ռուսաստանի խաղաղապահ ուժերի ստեղծման պատմությունը: Այնուհետև ռազմական բժիշկները և սակրավորները դպրոցականներին բացատրել են, թե որքան վտանգավոր կարող է գտնվել այն տարածքներում, որտեղ ավելի վաղ ընթացել են մարտական գործողություններ, քանի որ այնտեղ կարող են լինել մեծաքանակ պայթյունավտանգ առարկաներ, ինչպես նաև ցույց են տվել առաջին բուժօգնության ցուցաբերման կանոնները:
Երեխաները սեփական աչքերով տեսան սակրավորի հանդերձանքը տարածքն ականազերծելու և պայթյունավտանգ առարկաներից մաքրելու կարգը` ժամանակակից ռազմական տեխնիկայի, սարքավորումների, հանդերձանքի կիրառմամբ և ականազերծման ծառայության վարժեցված շների օգնությամբ:
ՙԱԱ՚