ՙՆԵՐԿԱՅԱՑՆԵԼ ՏԱՐԱԾԱՇՐՋԱՆՈՒՄ ԽԱՂԱՂՈՒԹՅԱՆ ՊԱՀՊԱՆՄԱՆՆ ՈՒՂՂՎԱԾ ՄԵՐ ԱՌԱՔԵԼՈՒԹՅՈՒՆԸ՚
Էվիկա ԲԱԲԱՅԱՆ
Ռուսական խաղաղապահ զորակազմի (ՌԽԶ) զինծառայողները Երևան քաղաքից օրերս 10 տոննա հումանիտար բեռ տեղափոխեցին Արցախ։ ՌԽԶ ներկայացուցիչ Դմիտրի Տուսիդիի խոսքով` դրանք առաջին անհրաժեշտության առարկաներ են՝ տաք հագուստ և կոշիկ երեխաների համար, դպրոցական ու կենցաղային պարագաներ, ինչպես նաև ջեռուցման սարքեր, որոնք կբաժանվեն բազմազավակ ընտանիքներին, պատերազմից տուժած բնակիչներին ու հարկադիր տեղահանվածներին։ Խաղաղապահ զորակազմի շարասյանն ուղեկցել են Ռուսաստանի և Հայաստանի բարեգործական հիմնադրամների ներկայացուցիչները։ Տվյալները հավաքագրելուց ու մշակելուց հետո, ՌԽԶ հումանիտար արձագանքման կենտրոնի մասնագետներն Արցախի հեռավոր բնակավայրերի բնակիչներին կտրամադրեն մարդասիրական օգնություն։
Խաղաղապահ զորակազմի հումանիտար արձագանքման կենտրոնի զինծառայողները երեխաների հայրենասիրական դաստիարակության ծրագրի շրջանակներում շարունակում են Արցախի հանրակրթական հաստատություններում անցկացնել խաղաղության և անվտանգության դասեր։ Օրերս ռուս սպաները Ստեփանակերտի Խ. Աբովյանի անվան համար 1 դպրոցում անց են կացրել պարապմունք։ Ավելի քան 100 աշակերտ ներկա էր միջոցառմանը։ Ռուսաստանի Դաշնության խաղաղապահ ուժերի զինծառայողներն անդրադարձան Հայրենական մեծ պատերազմի տարիներին խորհրդային ժողովրդի սխրանքներին ու մարտական փառապանծ ավանդույթներին։ Այնուհետև կազմակերպվեց վիկտորինա` ՙՖաշիզմի դեմ տարած հաղթանակի գործում մեծ ներդրում ունեցած Խորհրդային Միության հերոսները, Հայրենական մեծ պատերազմի մասնակիցները՚ թեմայով: Աշակերտներն ակտիվ մասնակցություն ունեցան վիկտորինային։ ՙԱրցախի դպրոցներում անց են կացվում արիության, խաղաղության դասեր, հերոսությանը, սխրանքներին ու քաջությանը նվիրված պարապմունքներ։ Մենք զրույցներ ենք անցկացնում նաև դպրոցների ուսուցիչների հետ՝ նրանց ծանոթացնելով Արցախում գտնվող խաղաղապահ զորակազմի գործունեությանը։ Ներկայացնում ենք մեր առաքելությունը, որի նպատակը տարածաշրջանում խաղաղության ու անդորրի պահպանումն է՚,-պատմում է Ռուսական խաղաղապահ զորակազմի ներկայացուցիչ, փոխգնդապետ Սերգեյ Լ.-ն։
Հոկտեմբերի 18-ին Հումանիտար արձագանքման կենտրոնի սպաները Շուշիի շրջանի Եղցահող գյուղի դպրոցում անց են կացրել ՙԱրիության դաս՚, պարապմունքին մասնակցել է 62 աշակերտ։ Իսկ հոկտեմբերի 19-ին ռուս սպաները Մարտակերտի շրջանի Կիչան գյուղի դպրոցի աշակերտների հետ անցկացրին ՙՀայրենական մեծ պատերազմի հերոս օդաչուները՚ թեմայով դաս:
Ռուսական խաղաղապահ զորակազմը շարունակում է առաջնագծամերձ տարածքներում գյուղատնտեսական և վերանորոգման աշխատանքների անվտանգության ապահովմանն ուղղված իր առաջադրանքները։ Այսպես, հոկտեմբերի 16-ին ռուս խաղաղապահներն ապահովեցին Մարտունու շրջանի Կարմիր շուկա բնակավայրում գյուղատնտեսական աշխատանքների անվտանգ ընթացքը. հավաքվել է խաղող 3 հա տարածքից, իսկ հոկտեմբերի 18-ին ՌԽԶ զինծառայողներն ապահովեցին Մարտունու շրջանի Մաճկալաշեն գյուղում ջրատար խողովակի անցկացման աշխատանքների անվտանգությունը։ Ռուսական ինժեներասակրավորային խմբերը շարունակում են տեղանքի և օբյեկտների ականազերծման, ինչպես նաև չպայթած ռազմամթերքի վնասազերծման աշխատանքները։ Ընդհանուր առմամբ, մինչ օրս ստուգվել է 1937 շինություն, ավելի քան 683 կմ ճանապարհ, մաքրվել է 2310 հա տարածք, հայտնաբերվել և ոչնչացվել է 26059 պայթյունավտանգ առարկա։
Ստեփանակերտում ՌԽԶ քաղաքացիների ընդունման կենտրոնն ստացել է 4870 զանգ` տեղի բնակիչների կողմից։ ՙԹեժ գծին՚, ընդհանուր առմամբ, դիմել է Արցախի 2041 քաղաքացի։ Հիշեցնենք` ՙթեժ գծի՚ հեռախոսահամարը՝ (047) 94 61 94։