ՀԻՆԳ ԺԱՄ ԵՎ ԸՆԴՄԻՇՏ ԱՐՑԱԽԻ ԿՈՂՔԻՆ
Ընթացիկ տարվա դեկտեմբերի 10-ին Արցախում նախատեսվում է դրամահավաք-հեռուստամարաթոն՝ 5 ժամ տևողությամբ, որը կհեռարձակվի հայկական և օտարերկրյա տարբեր հեռուստաալիքների կողմից։
Հանգանակված ամբողջ հասույթը կտրամադրվի ahimnadram.com հարթակում տեղադրվող բիզնես ծրագրերին։ Այս մասին ԶԼՄ ներկայացուցիչների հետ հանդիպմանը տեղեկացրեց ՙԲարձր տեխնոլոգիաների և ռազմավարական պլանավորման կենտրոն՚ հիմնադրամի տնօրենի օգնական Հակոբ Ավանեսյանը՝ հավելելով, որ հիմնադրամը՝ ՙԿանգնիր Արցախի կողքին՚ կարգախոսով, համայն հայությանը կոչ է անում ձեռք մեկնել և օգնել Արցախի տնտեսության վերականգնմանը։
Հակոբ Ավանեսյանի խոսքով՝ հիմնադրամի գործունեության առաջնային սկզբունքը թափանցիկությունն է, որի ապահովման նպատակով ստեղծվել է համայն հայությանը միավորող և ներդրող-հիմնադրամ-շահառու անմիջական կապն ապահովող ahimnadram.com օնլայն հարթակը։
-Կայքը հնարավորություն է ընձեռում տեղադրել բիզնես գաղափարը և ստանալ աջակցություն այն իրագործելու համար։ Շահառուն առանց որևէ խոչընդոտի կարող է հետևել ծրագրի ֆինանսավորման ամբողջ ընթացքին։ Պոտենցիալ ներդրողին կայքը հնարավորություն է տալիս ծանոթանալու Արցախում առկա բիզնես և startup գաղափարներին և աջակցել նախընտրած ծրագրին,- մանրամասնեց Հ. Ավանեսյանը՝ հավելելով, որ հիմնադրամի նպատակն Արցախի սոցիալ -տնտեսական վերականգնումն է, տեխնոլոգիապես զարգացած և մարտահրավերներին դիմակայող երկրի կառուցումը։
Հիմնադրամի՝ Սփյուռքի և միջազգային կառույցների հետ կապերի բաժնի պետ Էմմա Պետրոսյանը, կարևորելով ստեղծված իրավիճակում ծրագրերի նպատակային ու համակարգված իրականացումը, ընդգծեց, որ ԲՏՌՊԿ հիմնադրամն Արցախի հետպատերազմյան հիմնախնդիրների լուծմանը միտված համակարգ է, որի առաքելությունը նաև տեղահանված մեր հայրենակիցներին Արցախում ապագա կառուցելու հնարավորություն ընձեռելն է ու ընդգրկումը՝ հանրապետության զարգացմանն ուղղված իրատեսական և նորարարական տարբեր ծրագրերում։
ԲՏՌՊԿ հիմնադրամն իր ծրագրերն իրականացնում է 3 հիմնական ուղղություններով՝ բարեգործություն, startup և բիզնես գաղափարների աջակցություն, բարձր տեխնոլոգիաների ներդնում Արցախի տնտեսության զարգացման գործում։
Շահառու կարող է հանդիսանալ ցանկացած ֆիզիկական կամ իրավաբանական անձ, ով Արցախի սոցիալ-տնտեսական իրավիճակի բարելավմանն ու զարգացմանն ուղղված իրատեսական ծրագիր ունի, ինչպես նաև համայնքային կամ տեղական խնդիրների լուծմանը միտված ծրագրեր ունեցող պետական կառույցները։ Առաջնահերթությունը տրվելու է գյուղատնտեսության, արտադրության և արդյունաբերության ճյուղերին։
Հիմնադրամի բարեգործական և ինվեստիցիոն ծրագրերի ռազմավարական պլանավորման բաժնի պետ Բելլա Սարգսյանը, ներկայացնելով ընթացակարգը, շեշտեց, որ բիզնես ծրագրերի դեպքում գումարը՝ մինչև 20 միլիոն դրամ, տրամադրվում է նպատակային անտոկոս փոխառության ձևով՝ 10 տարի մարման ժամկետով։
Սարգսյանի պարզաբանմամբ՝ 2 մլն դրամից ավելի գումար պահանջող ծրագրերի համար անհրաժեշտ է նաև ներկայացնել գրավ կամ երաշխավորություն, որոնք հանդիսանում են փոխառության մարման ապահովագրություն ու ռիսկերի մեղմացման հանգամանք։