ՓՈՔՐ ԹԻՖԼԻՍ ԱՐՑԱԽՈՒՄ.ԲՈԼՈՐ ԺԱՄԱՆԱԿՆԵՐԻ ԴԵՐՁԱԿՆԵՐԻ ԲՆԱԿԱՏԵՂԻՆ
Աննա ՊԵՏՐՈՍՅԱՆ
Արցախի Սզնեքն է ժամանակին նաև փոքր Թիֆլիս անվանվել:
Մի բնակատեղի, ուր հաստատվել էին արհեստավորներ, որոնք պատկանում էին Հայոց պատմության, լեգենդների ու հեքիաթների ամենահայտնի հերոսների դասին` դերձակներ։ Նրանց սերունդներն են այժմ բնակվում Սզնեքում։ Այստեղ այցելելով, առօրյայի մասին տեղեկություններից բացի, պետք է պարզեինք, թե ինչու՞ էր գյուղը նաև Փոքր Թիֆլիսի համարում ունեցել։ Ինչու՞ են սզնեքցիները հայտնի որպես հմուտ դերձակներ։
Մեզ պետք է դիմավորեր համայնքի ղեկավար Էդվարդ Մուսայելյանը։ Դեռ չէր մոտեցել, երբ գյուղամերձ բլուրներից թշնամու դիրքերից կրակոցներ լսվեցին։
Գյուղապետի համոզմամբ՝ այդպես փորձում են գյուղացիներին իբր վախեցնել։ Փոքր-ինչ հեռվում, սակայն, բլրի լանջին, գյուղի տրակտորը շարունակում էր հերկել հողը։
Գյուղապետը մեզ ուղեկցեց հանդիսությունների սրահ, քանի որ համայնքապետարանի շենքում վերանորոգման աշխատանքներ էին ընթանում։
Ջերմացա գյուղացիների հոգատար ու տաք ընդունելությունից։ Նրանց զարմանքն ու ուրախությունը խառնվել էր. կարծես կարևոր լուր էին սպասում։
Օրեր շարունակ մտորումներիս առիթ դարձած հարցիս՝ թե ինչու՞ են Սզնեքը կոչել ՙՓոքր Թիֆլիս՚, ակամայից փոխարինեց ՙինչպե՞ս են կարողանում կրակոցների տակ այդքան հանգիստ լինել՚։
Սզնեքցի մանկավարժ Շահեն Մարգարյանը, երևի փոքր-ինչ գունատ հայացքիցս կռահեց հարցս.
-Թշնամին թող անգամ չերազի։ Եթե գնալու ցանկություն լիներ, վաղուց կհեռանայինք։ Մենք գյուղից երբեք չենք հեռանալու։ Նույնիսկ պատերազմի ժամանակ ավելի անվտանգ վայրեր տեղափոխվելու փոխարեն, մենք գերադասել ենք մնալ և դիմադրել։
Գյուղում ցանկություն ունեն ինչ-որ արհեստագործական արտադրամաս ունենալ, հատկապես՝ կարուձևի, որպեսզի դրանով նպաստեն ներգաղթին, ինչպես նաև՝ բնակիչների զբաղվածության խնդիրը լուծվի։
-Մենք չենք սիրում անընդհատ ինչ-որ բան խնդրել, նույնիսկ վիրավորվում ենք, երբ մեզ օգնություն են տալիս։ Մենք ստեղծող և աշխատասեր ժողովուրդ ենք, պետք են միայն պայմաններ, որ աշխատենք։ Որոշ մարդիկ հեռվից սիրուն տողեր են գրում, ոգեշնչում, բայց դա գործին չի օգնում. մեզ գործնական քայլեր են պետք,-ասում է Շահեն Մարգարյանը։
Հավաքված սզնեքցիները, հաստատելով ուսուցչի խոսքը՝ ավելացրին, որ առաջին հերթին ցանկանում են ապրել խաղաղ երկնքի տակ, որպեսզի գյուղի երեխաները վերադառնան։
Համայնքի ղեկավարը պատմելով գյուղի առօրյայի ու հոգսերի մասին, ասաց, որ բնակելի տներից երևում են թշնամու դիրքերը։ Բայց դա չի խանգարում, որպեսզի սզնեքցիներն իրենց բանջարանոցները մշակեն, վարուցանքսը ժամանակին կատարեն։
Երկու ժամ էր, ինչ Սզնեքում էի, մինչդեռ ջերմ զրույցը մոռացնել էր տվել, որ պետք է հանդիպեի նաև գյուղի պատմությունը հավերժացրած մանկավարժի հետ։ Արդեն շտապում էի նրա տուն, հավաքված կանանցից մեկն ասաց.
-Այսօր կմնաս մեր տանը, որ զգաս ամենօրյա մեր ապրումները, տեսնես, թե ինչ պայմաններում ենք ապրում։
Այնքան էի տարվել հետաքրքիր պատմություններով, որ նրանց առօրյա հոգսերը նաև իմն էին դարձել։ Անգամ մոռացել էի հարցնել մարդկանց անունները։ Ասես, տարիների ծանոթներ էինք, ավելի ճիշտ՝ հարազատներ։
Ճանապարհին հասցրեցի ուսումնասիրել ՙԿարմիր խաչ՚-ի տրամադրած փոքր ջերմոցներից մեկը։ Տպավորություն է, որ, ինչպես մինչ այդ հանդիպած սզնեքցիները, այնպես էլ ջերմոցում աշխատող կինը, չէր էլ լսում կրակոցների ձայնը։
Ասաց, որ ջերմոցներից ստացած բերքն իրենք են օգտագործելու, իրացնելու մասին դեռ չեն մտածել։ Հասա զրուցակցիս բակը։ Մոտ 5 տարեկան երեխա էր խաղում այնտեղ։ Մինչ այդ ասել էին, որ գյուղում միայն մի երեխա կա, ում լրագրողները հասցրել էին ՙխոսեցնել՚։ Շտապեցի նրա հետ զրուցելու՝ մտածելով, որ նույն երեխան է։ Համայնքապետն ասաց Արտյուշա Միքայելյանի՝ փնտրված զրուցակցիս թոռն է. եկել է պապիկին ու տատիկին տեսության։ Արտյուշա Միքայելյանը հաստատեց, որ սզնեքցիները հայտնի են որպես հմուտ արհեստավորներ. խորհրդային տարիներին կարի ֆաբրիկա կար գյուղում։
Սզնեքը հնագույն գյուղ է, ստեղծվել է 16-րդ դարում։ Մեր զրուցակցի հաղորդմամբ՝ Ղևոնդ Ալիշանն իր 12 գավառների պատմության մեջ նշել է մի շարք գյուղերի անուններ, դրանց թվում՝ Շուշիից դեպի արևելք գտնվող գյուղինը, որը Սիզնիխ է կոչվում։ Պատմեց, որ Սզնեքը հայտնի է որպես դերձակների գյուղ։
Սզնեքցիները ժամանակին համահունչ, արհեստագործական վարպետության ու բարեկեցության այնպիսի առաջադեմ աստիճանի էին հասել, որ այցելուները գյուղը հաճախ փոքր Թիֆլիս էին անվանում։
Այցելեցինք նաև համայնքապետի տուն։ Այն բավականին մոտ էր թշնամու դիրքերին. ավելի պարզ էին լսվում կրակոցները։ Տանտիկինը պատմեց, որ պատերազմի ժամանակ իրենց տունը նույնպես հրետակոծվել է, որի հետևանքով մարդիկ են զոհվել։ Ցույց տվեց բեկորներից առաջացած հետքերը։ Դրանք ամենուր էին։
Շփոթությունն էր պատճառը, որ չհասցրի հարցնել՝ եթե Սզնեքում կարի արտադրամաս բացվեր, երբեմնի հմուտ ու արհեստավարժ դերձակների այսօրվա սերունդները կկարողանայի՞ն ներկայիս պահանջներին համապատասխան հագուստներ ստեղծել։