ԽԱՉՎՈՂ ՃԱՄՓԱԲԱԺԱՆՆԵՐՈՒՄ…
Դուք տեսե՞լ եք Ցավը Վրեժի վերածած, կյանքը նպատակ դարձրած ազատամարտիկին, տեսե՞լ եք կորստի ցավից ուժ առած Երկրի տիրոջը… Ես պատիվ եմ ունեցել ճանաչել նրանցից շատերին ու փորձել եմ քայլել նրանց քայլքին համահունչ։ Ես նրանցից ապրելու, պայքարելու, դիմանալ-դիմակայելու դասեր եմ առել՝ ողջ կյանքիս համար։ Վհատությանը, հուսալքությանը, պարտվողականությանը «ոչ» ասող մարդիկ, ըստ իս, մարդկային առաքինության դասական օրինակ են, ու նրանք ոչ թե պատմական, գեղարվեստական կերպարներ են, այլև մեր կողքին ապրող իրական հերոսներ, որոնք ճակատագրի բերումո՞վ, թե՞ նախախնամությամբ իրար հանդիպում են խաչվող ճամփաբաժաններում… Ես ճանաչել եմ նման մի աստղաբույլի ու այսօր էլ շարունակում եմ ճանաչել ու բացահայտել նրանց՝ փորձելով «վրձնել» յուրաքանչյուրի դիմանկարը…
…Հերթականը իմ հերոսներից Հարութ Մնացականյանն է՝ իր սկզբունքային պահվածքով ու ուրույն մտածելակերպով… Ծնվել է 1992թ. հուլիսի 27-ին՝ Ասկերանի շրջանի Ավետարանոց գյուղում, բայց այնտեղ ապրել է ընդամենը 3 տարի, որոշակի հանգամանքներով պայմանավորված՝ ընտանիքը տեղափոխվել է Իվանյան համայնք /հայրը՝ Գառնիկ Մնացականյանը ծառայության է անցել համայնքին հարակից զորամասում/։ Ի դեպ, Հարութի հայրը՝ Գ. Մնացականյանը, Արցախյան պատերազմի տարիներին 35-րդ գումարտակի կազմում մասնակցել է բազմաթիվ մարտագործողությունների… «Մինչև 2020 թվականը հայրս շատ քիչ էր պատմում իրենց «բաժին» պատերազմի մասին, 2020թ. իրադարձություններից և եղբորս կորստից հետո, նա սկսեց խոսել պատերազմից, իմանալով, որ մենք արդեն կարող ենք հասկանալ, թե ինչի մասին է խոսքը»,- վերհիշում է Հարութը։
Արցախյան առաջին պատերազմում Հարութի մորական պապից՝ Արկադի Գրիգորյանից առայսօր ոչ մի լուր չունեն։
Պատերազմական թոհուբոհում ծնված ու հասակ առած Հարութը 2012թ. բանակից զորացրվելուց հետո ԱրՊՀ ուսանողական խորհրդի նախագահն էր, իսկ 2014թ. նաև Արցախի ազատամարտիկների միության «Հայրենյաց պաշտպան» երիտասարդական կազմակերպության պատասխանատուն։ Նա ակտիվ մասնակցություն է ունեցել 2014թ. հուլիս-օգոստոսյան հայտնի դեպքերին, 2015թ. Տավուշ-Իջևան հատվածում «Հայրենյաց Պաշտպան»-ի առանձին ստորաբաժանումը մեկ մարդու պես կանգնեց առաջնագծում՝ կատարելով իր խնդիրը։ 2016թ. «Հայրենյաց պաշտպան»-ի ջոկատը, Հ. Մնացականյանի գլխավորությամբ, առաջին կամավորականների հետ նույնպես առաջնագծում էր։ «Պատանեկությունից սկսած չեմ հիշում այնպիսի մի դրվագ, որ ես, եղբայրս ու իմ ընկերները մարտական դիրքերում չլինեինք, իսկ Ապրիլյանին ավելի ակտիվ ենք մասնակցել։ Հետագայում մեր ներդրումն ենք ունեցել առաջնագծում ինժեներական աշխատանքների իրականացման գործում։ Եղբայրս՝ Գուրգենը, ժամանակին իր ժամկետային զինվորական ծառայությունն անց է կացրել «Եղնիկներում», հետախուզական դասակում։ Քսան ամիս ծառայելուց հետո հիվանդացել է, և ծառայության ավարտին 3 ամիս մնացած զորացրել են բանակից։ Առողջության պատճառով նա այլևս զորակոչի ենթակա չէր, սակայն դա նրան չի խանգարել 2014թ. սկսած` կամավոր ու շատ ակտիվ մասնակցել մարտագործողություններին։ Քանի որ ես ծառայել էի Մատաղիսում և տեղանքին լավ ծանոթ էի, 44-օրյա պատերազմի օրերին ընկերներով որոշեցինք օգնության հասնել Մատաղիսում կռվող մեր տղաներին։ Զորամասի շտաբում գրանցվելուց ու համապատասխան զենք-զինամթերք ստանալուց հետո մեկնել ենք դիրքեր, սակայն հոկտեմբերի 29-ին մենք կամավոր, 7 հոգանոց խմբով եկել ենք Քարինտակ, ճանապարհին մեզ է միացել եղբայրս, որից հետո մարտական գործողություններին մասնակցել ենք Քարինտակ-Շուշի հատվածում։ Եղբայրս զոհվել է հոկտեմբերի 30-ին Քարինտակի համար մղվող մարտերի ժամանակ՝ բառացիորեն իմ ձեռքերի վրա,-ցավը ներս արած ասում է զրուցակիցս, ու շարունակում,-ձախաթևյան հատվածում մենք մնացել էինք մենակ, նա մոտեցավ ինձ ու ասաց՝ խրամատում 2 ժամկետային զինծառայող կա, երկուսն էլ վիրավոր են, կապվիր հրամանատարության հետ թող շտապօգնության մեքենա ուղարկեն, իսկ ես գնամ նրանց հանեմ։ Ես կրակով նրան պահում էի, որ կարողանա մոտենալ տղաներին, քիչ անց առաջանալով տեսա, որ Գուրգենն էլ վիրավոր ընկած է տղաների կողքին։ Մոտ մեկ կիլոմետր նրան քաշելով հանեցի մարտի դաշտից, որից հետո մեքենան կարողացավ մոտենալ այդ հատվածին, որը գտնվում էր կրակային ճնշման տակ։ Մինչև հիվանդանոց հասնելը, ցավոք, եղբայրս մահացավ»։
Հարութի համար խաղաղություն կոչվածը միշտ էլ հարաբերական հասկացություն է եղել ու այսօր էլ մնում է որպես այդպիսին… Նրա կարծիքով՝ այս պահին Ազգի խնդիրը պիտի լինի պետականության պաշտպանությունը և ոչ թե ներքին տարաձայնությունները, որի համար այդքան ռեսուրս է ծախսվում։ Դեռևս նոյեմբերի 9-ին նա խորապես համոզված էր /այդ մասին սոցիալական հարթակներում բարձրաձայնել է/, որ ամեն ինչ տեղափոխվելու է հետխորհրդային տարածքի այլ հատվածներ՝ Միջին Ասիա, Անդրկովկաս, Ուկրաինա, փաստորեն, նրա կանխատեսումները ճիշտ դուրս եկան։ Հ. Մնացականյանի կարծիքով՝ վերջապես պետք է հասկանանք, որ գլոբալ աշխարհաքաղաքական պրոցեսների մեջ միակ ուժը, որն ի վիճակի է մեր շահերն ու պետականությունը պաշտպանել, մենք ենք, մեր բանակն է և մեր պետությունն է՝ իր բոլոր հնարավոր ռեսուրսներով։
ԱրՊՀ քաղաքագիտության ֆակուլտետը գերազանցությամբ ավարտած Հարութ Մնացականյանն այդպես էլ մասնագիտությամբ չաշխատեց, նա կա՛մ դիրքերում էր, կա՛մ հասարակական ակտիվ գործունեության ու պետական ծառայության մեջ։ Հետախուզական գումարտակի կազմում հատուկ պատրաստություն անցած Հարութի համար ուսումնասիրության նյութ է ոչ միայն քաղաքականությունը, այլև բանակի գրագետ, արհեստավարժ ռազմական պատրաստությունն ու պատրաստականությունը։
Ներկայումս Հարութ Մնացականյանն զբաղեցնում է Արցախի Հանրապետության նախագահի խորհրդականի պաշտոնը։ Նա գրեթե մեկ տարի եղել է Շահումյանի շրջանի վարչակազմի ղեկավարը, այդ տարի դեպի Հայաստան ճանապարհը նոր էր բացվել և նա երանությամբ է հիշում, թե ինչպիսի եռուզեռ ու ինչպիսի տնտեսական «իրարանցում» էր, օր չկար, որ մի քանի ընկերություններ նրան չմոտենային՝ իրենց բիզնեսն այնտեղ գրանցելու համար։ Շրջանը բավականաչափ ակտիվ զարգանում էր, և այսօր՝ տարիների հեռվից, նա ցավում է, որ այդքան մեծ ռեսուրսներ ներդրել են տեղի ենթակառուցվածքների զարգացման վրա, սակայն շատ քիչ ռեսուրսներ՝ այդ ամենի պաշտպանության համար։ Եղբայր ու բազմաթիվ մարտական ընկերներ կորցնելուց հետո Հարութի համար կյանքի իմաստը եղբոր ու մարտական ընկերների գործը շարունակելն է, առանց պաթոսի, առանց այլևայլության, առանց ավելորդ դաժանության, առանց թշնամու նկատմամբ բացասական վերաբերմունքի. «Դրված է նրանց և մեր գոյության հարցը և, բնական է, որ մարդ էակն ընտրում է իրեն… Եվ ես ընտրում եմ ինձ, իմ ընտանիքը, իմ ժողովրդին, ընտրում եմ եղբորս ու իմ մարտական ընկերների վրեժը և կյանքս այլևս ծառայեցնելու եմ այդ վրեժի իրագործմանը։ Այլ իմաստ իմ կյանքում չկա, երբեք չեմ ընդունել ու չեմ ընդունում այն տարբերակը, երբ բաժակ բարձրացնելով խաղաղության կենացն են խմում ու ոչինչ չեն անում խաղաղության համար։ Միակ բանը, ինչի համար ես ապրում եմ՝ հաջորդ պատերազմն է, որին մենք օր առաջ պիտի պատրաստ լինենք»,- բարձրաձայն մտորում է երեք դստեր հայրն ու իր ընտանիքին նվիրված ամուսինը, ով կնոջն համարում է իր գաղափարակիցն ու համախոհը։
«Օրերս իմ էջում մի փոքրիկ հայտարարություն եմ տարածել և խնդրել եմ Երկիրը լքողներին լուռ ու մունջ հեռանալ, չանիծել հայրենիքը, թուքումուր չանել, թե բա մեր արածը չեն գնահատել, չգիտեմ, այդ որ արածի մասին են խոսում, ինչն այդպես անգնահատելի է,- ասում է Հարութը,- հնարավոր է վատ իշխանություն, հասարակություն կամ վատ շրջապատ ունենաս, սակայն վատ հայրենիք չես կարող ունենալ, առավել ևս մեր արյունաքամ Հայրենիքը, որը բոլորիս ուշադրության, հոգածության ու գուրգուրանքի կարիքն ունի։ Ինձ համար ավելի լավ է իմ երկրում ամենավերջին գործը կատարեմ, քան ուրիշ երկրում մեծ պաշտոնների ու պատիվների արժանանամ։ Նյութական ոչինչ այս աշխարհում ինձ հետաքրքիր չէ, բացի իմ տանիքից, որտեղ ապրում է ընտանիքս։ Պապս միշտ ասում էր՝ ինչ էլ ուտես, մեկ է, մի քանի ժամից էլի սոված ես, այնպես որ, նյութականին պետք է շատ սառնասիրտ նայել և ապրել իմաստալից, ապրեցնող կյանքով։ Մեր ազգը հերոսների պակաս չունի, նրանք և նրանց նմանները մեզ համար ուղեկից աստղ պիտի լինեն, առաջնորդող աստղ… Գուրգեն Մնացականյան, Թովմաս Թովմասյան, Նարեկ Հովհաննիսյան, Բորիս Գասպարյան, նրանք այն տղաներն են, որոնք մեր ջոկատից են, մեր 8 հոգանոց ջոկատից, և որոնցից 4-ը արդեն անմահների շարքում են…Այդ ցանկը շարունակություն ունի, հարյուրավոր ընկերներ ունեմ, որոնք անմահացել են, չգիտեմ մեկ ուրիշին, որ այս պատերազմում այդչափ ընկեր ու հարազատ կորցրած լինի, որքան, որ ես եմ կորցրել… Արկադի Բաղդասարյան, Ալեքսանդր Հարությունյան, Արկադի Շահբազյան, շատ-շատերը, որոնց անձամբ եմ ճանաչել, նրանք այն մարդիկ են, որոնք ինձ համար հայրենասիրության, նվիրվածության խորհրդանիշ են։ Ողջերի մասին չենք խոսում, ողջ ենք՝ դա ավելի քան մեծ շնորհ է։ Յուրաքանչյուր հերոսություն իր բացահայտումն ունի, ըստ իս՝ հերոսությունը նախևառաջ գիտակցված որոշում կայացնելն է՝ ընդունել պատվով մահը, քան ապրել անպատվության մեջ… Եղբայրս որոշում է կայացրել, իրեն բոլորովին անծանոթ վիրավոր զինվորների հետևից գնալ՝ վտանգելով իր կյանքը, հերոսությունը դա է։ Երբ /Արցախի հերոս/ Թովմաս Թովմասյանը զարկվել էր, նրա մարտական ընկերը՝ Բորիսը /Գասպարյան/, որը տեղանքը լավ ճանաչելով հանդերձ կարող էր փրկվել, չհեռացավ վիրավոր ընկերոջ կողքից՝ ընտրելով պատվով մեռնելը, քան վիրավոր ընկերոջը լքելով փրկվելը, նրա պահվածքը մեկ անուն ունի… Նարեկ Հովհաննիսյանը /նույնպես Արցախի հերոս/, մեր ստորաբաժանման հրամանատարն էր և մինչև վերջին պահը հերոսաբար ղեկավարել է իր ստորաբաժանումը՝ միաժամանակ հակառակորդին անձամբ պատճառելով կենդանի ուժի ու զինտեխնիկայի մեծ կորուստներ։ Նա որոշում կայացրեց մինչև վերջին պահը մնալ Շուշիում և իր զինվորների հետ միասին պայքարել Շուշիի համար։ Ինձ համար հերոսությունը գիտակցված որոշումն է, և երբ ասում են հերոսներ, աչքիս առաջ նրանք են գալիս։ Եթե նախկինում հերոսություն ասվածը վերացական հասկացություն էր, հիմա հասկանում ես, որ դու իսկական հերոսների կողքին ես եղել, մեծերի կողքին մարտնչել, և քո արածը չնչին է այդ տղաների արածի համեմատ։ Այս պահին էլ մեր կողքին ապրում են մարդիկ, որոնք օրնիբուն պայքարում են իրենց երկրի համար, դա պարտք է՝ առաջին հերթին մեր իրական ու իսկական հերոսների հիշատակի առջև։ Ես ուրույն հերոսություն եմ համարում նաև մեր մանկավարժների ու բժիշկների գործը և բոլոր նրանք, ովքեր իրենց խնդիրը կատարում են գերազանց, անմնացորդ նվիրումով՝ Երկիրն ավելի հզոր դարձնելու համար, նույնպես հերոսներ են։ Ուժեղ Արցախն ինձ համար միայն մի տեսք ունի՝ ամբողջական Արցախն է՝ վերամիավորված Հայաստանի հետ, Արցախում մեկ միլիոն հայերի ներկայությունն է… Դա այն նպատակն է, որի համար ես ապրում եմ, գուցե իմ կենդանության օրոք ես դա դժվար թե տեսնեմ, սակայն մեր կյանքը պիտի պայքար դարձնենք ապագա նպատակների համար, անգամ եթե չենք տեսնելու այդ օրը։ Մենք չտեսնենք, կտեսնեն մեր զավակները, մեր թոռներն ու ծոռները, որոնք ապրելու են վաղվա Արցախում, և ուրեմն հանուն այն Արցախի, որ վաղն է գալու, մեր բոլոր ջանքերը պիտի նպատակ դարձնենք։
Սիրվարդ ՄԱՐԳԱՐՅԱՆ