ՆՐԱՆՔ ԿՎԵՐԱԿԱՆԳՆԵՆ ԴԻԶԱԿԻ ՆԱԽՇԵՐԸ…
Սիրվարդ ՄԱՐԳԱՐՅԱՆ
Հադրութի մանկապատանեկան ստեղծագործական կենտրոնը երկու տասնամյակի կենսագրություն ունի։ Տարիների ընթացքում կենտրոնը հասցրել է ճանաչում ձեռք բերել ոչ միայն մեր հանրապետությունում, այլև նրա սահմաններից դուրս… 44-օրյա պատերազմը, սակայն, վերջակետ դրեց նրանց տարիների նպատակային ու քրտնաջան աշխատանքին, տարիների վաստակն, ինչպես ասում են, օրերի մեջ ջուրը թափվեց։ Բայց հադրութցին հեշտ հանձնվողներից չէ, նրան չեն կարող հուսահատեցնել ո՜չ անհաջողություններն ու ո՜չ էլ նենգ թշնամին։
Երևանում ժամանակավոր ապաստանած հադրութցիները հույս են փայփայում` մի օր վերադառնալ իրենց օջախները, իսկ մինչ այդ ձեռքերը ծալած չեն նստում։ Կենտրոնի տնօրեն Իրա Թամրազյանն իր անհանգիստ ու պրպտուն բնավորությամբ այստեղ էլ հնար է գտել ու ՀՀ-ում` Արցախի օպերատիվ շտաբի տեղակայման վայրում, փորձում է նորովի ստեղծել այն կորիզը, որի հիմքի վրա արմատավորվելու է ստեղծագործական նորացված կենտրոնը։ Նրանց հատկացված սենյակներում նվազագույն պայմաններ են ստեղծվել, և երեխաներն արդեն հաճախում են ոչ միայն կանոնավոր, այլև մեծ սիրով։ Տնօրենն ասում է՝ կողքից հաճախ ենք լսում, թե բա դրա ժամանա՞կն էր, իսկ մենք ասում ենք` հա« ժամանակն է, դեռ մի քիչ էլ ուշացել ենք։
Կենտրոն են հաճախում ոչ միայն Հադրութի, այլև Շուշիի, Քաշաթաղի, Մարտակերտի, Քարվաճառի երեխաները, մոտավորապես 120 հոգի արդեն ներգրավված են պարապմունքներին։ Օրերս բացվեց բռնցքամարտի խմբակը, որտեղ երեխաներին մարզում է Հադրութի լավագույն մարզիչներից մեկը։ Նա արդեն հավաքագրել է իր նախկին սաներին, որոնք ոչ հեռու անցյալում հանրապետությունում գրավել են առաջնակարգ տեղեր։ Նախատեսում են փետրվարի 20-ին՝ Շարժման օրը, զուսպ հանդիսավորությամբ բացել կենտրոնը` ցուցադրելով կատարած աշխատանքները։ Տարիներ շարունակ շփվել ու համագործակցել են ստեղծագործական տարբեր կենտրոնների հետ, և հիմա վերջիններս զանգում ու իրենց օգնությունն են առաջարկում: Իսկ պարի խմբակ բացել են ոչ միայն Երևանում, այլև Վանաձորում, որտեղ հարյուրից ավելի երեխաներ կան Արցախից։ Խմբակներ են բացվել նաև Մասիս քաղաքում։
Հետադարձ հայացք ձգելով անցած ճանապարհին, տիկին Թամրազյանն ափսոսանքով փաստում է, որ Հադրութում թողել են շուրջ 2 միլիոն արժողությամբ ձեռքի աշխատանքներ, գորգեր, կարպետներ, ասեղնագործ աշխատանքներ, ազգային գուլպաներ, իսկ Մեխակավանում՝ կավագործության թանկարժեք սարքն իր պարագաներով, որը նախքան չարաբաստիկ պատերազմը նվեր էին ստացել ակադեմիկոս Գրիգորի Գաբրիելյանցից։ Կենտրոնի տնօրենը, սակայն, չի վհատվում, ավելին` համոզված է` ժամանակի ընթացքում կվերականգնեն կորցրածն ու կշարժվեն առաջ… Եվ եթե Հադրութում իրենց կենտրոն հաճախել է 465 երեխա, ապա ներկա դրությամբ, եթե նույն տեմպերով շարունակեն ու հաջողեն, կունենան այդ քանակը, գուցե մի բան էլ ավելի։ Նա կարծում է, որ 5 ամիս հետո կունենան այն ամենը, ինչ թողել են հայրենիքում։ Իրենց մասնագետներն ունեն համապատասխան փորձ ու գիտելիքներ և կվերականգնեն Դիզակի նախշերն ու գույները, որոնք նրանք ուսումնասիրել ու տեղայնացրել են տարիների ընթացքում` ստեղծելով իրենց հավաքածուն։ Եթե լրիվությամբ էլ չհաջողեն, գոնե մասնակիորեն վերականգնելու են իրենց հավաքածուները։ Նրանց օգնում ու աջակցում են ՙՀադրութ՚ հիմնադրամը, ՙՆարեկացի՚ մշակութային կենտրոնը և մի շարք այլ կազմակերպություններ։ Տիկին Թամրազյանի համերաշխ կոլեկտիվի շնորհիվ հնարավոր է դառնում և՜ ազգայինը պահպանել, և՜ միաժամանակ այն հանրայնացնել։
Նրանք ունեցել են նաև ազգային տարազների խմբակ, ցավոք, այն ևս ցրվել է: Աշխատանքներ են տարվում ու հանդիպումներ կազմակերպվում ազգային տարազի մասնագետների հետ« և հույս ունեն Ղարաբաղի այայի տարազը, հարսանեկան տարազը ևս վերականգնել ու ցուցադրել փառատոների ու ցուցահանդեսների ժամանակ։ Ի. Թամրազյանը վստահ է, որ կհաջողեն և այս ոլորտում, որովհետև ունեն նախանձախնդիր սանիկներ ու խմբակավարներ։ Արվեստի գործեր ստեղծելու-արարելու ընթացքում նրանք ամոքում են իրենց կորուստը, վիշտն ու ցասումը, սակայն երբ գնում են ժամանակավոր կացարան, անցյալը, կորցրածը նրանց հանգիստ չի տալիս, հիշում-վերհիշում են իրենց ամենահայկական Հադրութի ամեն օրն ու ժամը ու լցվում են այն նորից կերտելու վճռականությամբ։ Ասում են` պարտավոր ենք ուժեղ լինել, պայքարել և աշխարհին հասցնել ճշմարտությունը։ Տիկին Իրան ցավով է նշում, որ այնտեղ են թողել նաև Արթուր Մկրտչյանի մասունքները, այսօր Երևանում և շրջաններում հանդիպում են նրան ճանաչողներին ու խնդրում իրենց փոխանցել Արթուրից մնացած որևէ հիշատակ` նպատակ ունենալով առայժմ փոքրիկ ցուցադրություն կազմակերպել Երևանում ու նախապատրաստվել հետագա ծրագրերի համար։ Ի. Թամրազյանը չի թաքցնում` տնից-տեղից հեռու փոքրիկ օջախ հիմնելու նպատակներից մեկն էլ այն է, որ հավաքվեն, շփվեն, խոսեն իրենց ՙՍ՚ ճյուղին պատկանող լեզվով և պահպանեն այն աչքի լույսի պես (նրանք մտավախություն ունեն հատկապես փոքրերի հարցում), մինչև որ մի օր կվերադառնան իրենց երազանքների Հադրութը։ Տիկին Թամրազյանի վկայությամբ` ովքեր գալիս են իրենց կենտրոն, իսկույն փոխվում են, տրամադրությունները բարձրանում է, երբ տեսնում են իրենց շրջանի մասունքները, մանրակերտերը, նկարները, ձեռքի աշխատանքները։ Տնօրենը լուրջ դեմքով ասում է` երբ մեր բարբառով շփվում ենք, բոլորիս ընկճվածությունն անցնում է։
Նրանք իրենց հիմնական զբաղմունքից զատ նաև հավաքում են տեղահանված արցախցիներից յուրաքանչյուրի պատմությունը։ Համագործակցում են նաև ՙՀանուն Հադրութի՚ հասարակական կազմակերպության հետ, և ձգտում են ամեն կերպ հավատարիմ մնալ իրենց ակունքին, մինչև Տերը տունդարձի դուռը կբացի նրանց առաջ։