ՁԵԶ ԵՎ ՄԵԶ ՄԵԾ ԱՎԵՏԻՍ
Սոֆի ԲԱԲԱՅԱՆ
Ճրագալույցի Սուրբ Պատարագ տարվա ընթացքում մատուցվում է երկու անգամ` Սուրբ Ծննդյան և Սուրբ Հարության տոներին: Ըստ ՀԱԵ՝ Սուրբ Ծննդյանը նախորդող մեկ շաբաթը պահոց շրջան է: Դեկտեմբերի 30-ից մինչև հունվարի 5-ի երեկո հավատացյալները պահք են պահում: Այդ ընթացքում օգտագործվում է բացառապես բուսական ծագում ունեցող սնունդ: Սուրբ Ծննդյան տոնը սկսվում է հունվարի 5-ի երեկոյան և շարունակվում կեսգիշերից հետո:
Այսօր երեկոյան Արցախի բոլոր եկեղեցիներում, այդ թվում նաև Ստեփանակերտի սուրբ Աստվածամոր Հովանի Մայր տաճարում մատուցվեց Ճրագալույցի Սուրբ Պատարագ: «Ճրագալույց» նշանակում է ճրագ՝ մոմ, վառել (լուցանել): Այս պահին հավատացյալները եկեղեցում վառած ճրագներն իրենց հետ տուն են տանում: Սա խորհրդանշում է աստվածային լույսն ու օրհնությունը:
Ճրագալույցը խորհրդանշում է նաև բեթղեհեմյան աստղի լույսը, որն առաջնորդեց մոգերին դեպի Հիսուս Մանուկը:
