ԱՍՏԾՈ ԳՈՅՈՒԹՅԱՆԸ ՀԱՎԱՏՈՒՄ Է ԱՆԳԱՄ ՍԱՏԱՆԱՆ
«Ազատ Արցախ» թերթի ընթերցողներն արդեն սկսել են ուղարկել իրենց հուզող հարցերը, որոնց կպատասխանեն ՀԱԵ օծյալ հոգևորականները։ Մեր ընթերցողների այսօրվա հարցերին պատասխանում է Տեր Արմեն քահանա Մելքոնյանը։
-Տեր Արմեն, հիրավի, ամենաբարդ հարցերից մեկն ենք ուղղելու ձեզ։ Ինչպե՞ս հասկանալ Սուրբ Երրորդության խորհուրդը։
-Սուրբ Երրորդության մասին բացատրության լավագույն օրինակը արեգակն է։ Ինչպես որ արեգակն ունի լույս, ճառագայթ և ջերմություն և այս միասնականության մեջ է արեգակ, ճիշտ այդպես էլ Հայրը, Որդին և Սուրբ Հոգին մեկ Աստվածության երեք անձերն են և երեքով միասին մեկ ամբողջություն։ Սա ապացուցում է նաև Հիսուս Քրիստոսը՝ նշելով երեք անձերին և ասելով, որ Հայրը մեկ այլ Մխիթարիչ պիտի ուղարկի՝ Սուրբ Հոգին, որը կուսուցանի առաքյալներին և կհիշեցնի Իր ասածները (Հովհ. 14.26)։ Քրիստոս Ինքը տվեց Սուրբ Երրորդության բանաձևը՝ ասելով. «Մկրտեցեք Հոր և Որդու և Սուրբ Հոգու անունով» (Մատթ. 28.19), երեքի համար գործածելով անուն բառի եզակի ձևը՝ ցույց տալով Երրորդության մեկ աստվածություն լինելը։ Եվ քանի որ որպես մեկ աստվածության Անձեր նշվում են երեքը, ապա այստեղից էլ հետագայում առաջացել է Երրորդություն տերմինը։ Սուրբ Երրորդության ներկայությունն առաջին անգամ երևում է Հիսուս Քրիստոսի մկրտության ժամանակ. երբ Քրիստոս մկրտվում էր, երկնքից լսվեց Հայր Աստծո ձայնը և Սուրբ Հոգին աղավնակերպ իջավ Քրիստոսի վրա։
-Տեր Հայր, ինչպես գիտենք սատանան ևս որոշակի զորություն ունի և կարող է նույնիսկ հրաշքներ գործել, ինչպե՞ս իմանալ հրաշքը սատանայից է, թե՞ ԱՍՏԾՈՒՑ։ Ինչպե՞ս չմոլորվել։
-Սատանայի կատարած հրաշքներից չմոլորվելու համար պետք է հետևել Հիսուս Քրիստոսի որդեգրած վարդապետությանը՝ ըստ Ավետարանի, երբ սատանան Նրան փորձում էր անապատում՝ քառասնօրյա ծոմից հետո։ Բոլոր փորձություններին ի պատասխան Հիսուս Քրիստոս մեջբերում կատարեց Ավետարանից, ասելով՝ գրված է։ Մենք պետք է Ավետարանը լավ իմանանք, քանի որ ամեն փորձության դիմաց Ավետարանը պատասխան ունի, ինչպես որ պատասխանեց սատանայի երեք փորձություններին։ Մեր կյանքի բոլոր փորձությունների հիմքում էլ այդ երեք փորձություններն են՝ նյութապաշտություն, հպարտություն և փառասիրություն։ Բոլոր մեղքերն ու փորձությունները ծնվում են այս խոշոր մեղքերից։ Խորագետ քրիստոնյան տեղյակ է փորձչից և փորձության ձեռագրից կարողանում է զանազանել, տվյալ փորձությունը չարի՞ց է, Աստծո՞ւց, թե՞ մարդուց։ Նույնը վերաբերում է նաև հրաշքներին։
-Իսկ ինչպե՞ս իմանալ ԱՍՏԾՈ կամքը։
- Որպեսզի իմանանք, թե որն է Աստծո կամքը, նախ պետք է իմանանք ո՞վ է Աստված, ինչի՞ համար աշխարհ եկավ, ո՞րն է Նրա նպատակը մարդու կյանքում, ինչպիսի՞ն է Նրա գործելաոճը։ Աստծուն հավատալ չի նշանակում ընդունել Աստծո գոյությունը։ Աստծո գոյությանը հավատում է նույնիսկ սատանան։ Աստծո բոլոր պատվիրանները մարդուն մեղքից զերծ պահելու և մարդու կյանքի փրկության համար են։ Աստծո կամքը մարդու կյանքում սա է, բայց Աստծո կամքը պայման ունի։ Քրիստոնյան պետք է պատվիրանապահ լինի ամենայն ազնվությամբ և ո'չ կեղծ բարեպաշտությամբ։ Այդ ժամանակ հաստատ կլինի իր որոշումների մեջ՝ ո՞ր ճանապարհը ընտրել՝ ա՞ջ, թե՞ ձախ։ Աստված հատուկ իր կամքը չի թելադրում մարդուն, այլ հարգում է մարդու ազատ կամքը, քանի որ արդեն մարդու համար տրվել են բոլոր բարոյական օրենքներն ու պատվիրանները։ Երբեմն մարդը ինքնախաբեությամբ փնտրում է Աստծո կամքը, բայց իր գործով իրականում գործում է իր սեփական կամքով, ինչը սխալ է։ Շատ հաճախ Աստծո կամքը հակառակ է մեր կամքին, որովհետև արգելք է մի բանի, որը մենք շատ ենք կամենում։ Մենք այդ ժամանակ անտեսում ենք Աստծո կամքը և հետևում ենք մեր ցանկություններին։ Իսկ Աստված նախապես տեսնում է մեր կամքի վերջավորությունը, դրա համար իր կամքը շատ հաճախ հակասում է մեր կամքին, որը մեծ մասամբ տանում է դեպի մեղք։
Սոֆի ԲԱԲԱՅԱՆ