ՍՈՒՐԲ ԳԻՐՔ ԵՎ ՍՐԲԱԶԱՆ ԱՎԱՆԴՈՒԹՅՈՒՆ
Աստվածաբանությունը ճշգրտություն է պահանջում, հենվում ընդունված և վստահելի աղբյուրների վրա։ Որպես ավանդական եկեղեցի, մենք պահպանողական ենք, դուրս չենք գալիս մեր Հայրերի կողմից հաստատված սահմաններից։ Ունենք «Հավատամք», ինչին անվերապահորեն հավատում ենք, որին հակասող ամեն միտք, գաղափար անընդունելի է Հայ Առաքելական եկեղեցու կողմից։ Մեր հավատքը կառուցված է Սուրբ Գրքի և «Եկեղեցական ավանդության» վրա։ Ցավոք, կան քրիստոնեական շատ ուղղություններ, որոնք ուղղափառ հավատքի այս հիմքն են փորձում խարխլել իրենց «Sola scriptura» (միայն Աստվածաշունչ) համոզմամբ։ Այս խնդրի մասին է այսօրվա մեր զրույցը Տեր Սերոբ քահանա Ազարյանի հետ։
-Օրհնեցեք, Տեր Հայր։ Այլ վարդապետություններով առաջնորդվող մեր ոչ ավանդական եկեղեցիների եղբայրներն ու քույրերը երբեմն չափազանց խիստ են արտահայտվում Եկեղեցական ավանդության դեմ՝ համարելով այն ոչ հավաստի, հետևաբար նաև՝ անընդունելի։ Նրանք համոզված են, որ միայն Աստվածաշունչն է Աստծո մասին հավաստի գիտելիքներ փոխանցում, որից դուրս ամեն ինչ հորինվածք է։ Կցանկանայինք պարզել, թե որքանով է երաշխավորված սբ Ավանդության ճշմարտացիությունը։ Արդյո՞ք, այն իսկապես չի հակասում Աստվածաշնչին։ Հատկապես, երբ հիշում ենք Պողոս առաքյալի զգուշացնող հորդորը Գաղատացիներին (1։8-9) ուղղված թղթում. «Եթէ նոյնիսկ մենք կամ երկնքից մի հրեշտակ աւետարանի ձեզ աւելին, քան այն, որ մենք աւետարանեցինք ձեզ, նզովեա՛լ լինի»։
- Եկեղեցու աւանդութիւնը ոչ թէ հակասում է Աստուածաշնչին, այլ լոյս է սփռում եւ արժէք է ընծայում այն բոլոր գրքերին ու նամակներին, որոնք գտնւում են Հին ու Նոր կտակարաններում։ Առանց հայրերի մեկնութեան, մարդ կը մոլորուի նշանակութեան, իմաստի, պատմագրութեան եւ բազմահազար այլ մանրամասնութիւնների առումով։
Յիշատակեցիք Պօղոս առաքեալի նամակն ուղղուած Գաղատացիներին, երբ նա խստիւ զգուշացնում է նրանց այցելող ու մտքեր խառնող «այլ աւետարանիչներից»։ Յիշենք, որ առաքեալների աշխատանքն Աւետարանը տարածելու գործում, մեծապէս խանգարւում էր այլ «աւետարանիչների» կողմից, ովքեր դնում էին գնոստիկեան, երեւութական, ալկասայական, էբիոնական, նիկողայոսական ու այլ աղանդների հիմքերը։ Եկեղեցին հիմնաւորելու, ճշդելու ու նրա ուղին ցոյց տալու համար, հոգեւոր հայրերը, առաքեալները նահատակուեցին իրենց առաքելութեան ճամբին։ Ո՞վքեր պիտի շարունակէին նրանց սրբազան ուղին։ Ո՞վքեր պիտի վերցնէին հոգեւոր այդ քաղցր լուծը եւ ապրեցնէին Եկեղեցու կեանքը։ Բնական է, որ նրանց աշակերտները, ինչպիսիք են սուրբերը՝ Իգնատիոսն ու Պօղիկարպոսը, Իրինէոսն ու Յուստիոսը, ու նրանց հետեւորդները, աշակերտները, հետնորդները, Կղեմէս Աղեքսանդրացին, Եփրեմ Ասորին, Աբրահատը, Աթանասիոսը, Ոսկեբերան Յովհանը, Կիւրեղը, Կիպրիանոսը, Օգոստինոսը, Անտոնն ու անապատի բազմաթիւ հայրերն ու Կապադովկիայի հայրերը։ Աստուածաշնչի ջատագով հերձուածող մեր եղբայր-քոյրերը պէտք է հարց տան, թէ ով է իրենց գրկում դրել հենց ԱՅ՛Դ Աստուածաշնչի գրքերը, եւ ոչ թէ ասենք, Մարիամի աւետարանը, Թովմասի աւետարանը, Պետրոսի յայտնութիւնը եւ այլ գրքեր։ Ինչո՞ւ չորս աւետարաններ ունենք եւ ո՞վ է որոշել, որ հենց այդ աւետարանները պէտք է լինեն Նոր Կտակարանում։ Իհարկե՝ Եկեղեցին։
Հայրերն են որոշել Եկեղեցու ներքին կեանքը, թէ ով է եպիսկոպոսը, քահանան կամ սարկաւագը ու նրանց պաշտօնները։ Հայրերն են գծել եկեղեցու ուղղափառ ուղին չարափառ կամ հերետիկոս ճանապարհներից հեռացնելու համար։ Չի կարելի պարզամտօրէն ասել «միայն Աստուածաշունչ ու վերջ»։ Այդ Աստուածաշունչը տէր ունի, հեղինակ ունի, որոշող ու հաստատող ունի, ու դա ԵԿԵՂԵՑԻՆ է, եւ ոչ թէ ինչ որ մի փողոցից յայտնուած «այլ աւետարանիչ»։ Պօղոսի, Պետրոսի, Յակոբոսի, Յուդայի, Հովհաննեսի նամակներն Աստուածաշնչի մէջ ներառողը ԵԿԵՂԵՑԻՆ է՝ իր հայրերի Հոգեշունչ որոշումներով, ու սա անժխտելի իրականութիւն է։ Իսկ Աստուածաշունչը հաստատողն ու կանոնականացնողը նոյնպէս ԵԿԵՂԵՑԻՆ է՝ հայրերի ԱՒԱՆԴՈՒԹԵԱՄԲ։
-Տեր Սերոբ, ինչպես գիտենք սկզբում եկեղեցին է ձևավորվել, հետո միայն գրի առնվել Աստվածաշունչը, ինչին նույնպես կասկածանքով են վերաբերվում մեր բողոքական եղբայրները։ Կա՞ն այս տեսակետը փաստող հավաստի աղբյուրներ։
- Իհարկէ կան։ Եկեղեցու պատմութիւնը գրի է առնուել մի քանի անգամներ, որոնցից շատերը կորսուել են դարերի հալածանքների ընթացքում, բայց ունենք պահպանուած ու մեզ հասած պատմութիւններ, ինչպէս Յուստինոս Նահատակի, Տեղտուկիանոսի, Օրոգինէս ու մանաւանդ Եւսեբիոսի Եկեղեցու պատմութիւնը (The History of the Church)։ Ուր հինգ բաժիններով ներկայացւում է Եկեղեցու պատմութիւնը։ Այլ հայրերի գրութիւններով, մեկնութիւններով ու պատմագրութեամբ ունենք տասնեակ հազարաւոր էջերով հաւաքածոյ, որոնք բաժանւում են երկու ժամանակաշրջանի, Նախա-նիկիական (Ante-Nicene) եւ Յետ-նիկիական (Post-Nicene) գրականութեանց։ Այդ գրութիւնները լաւագոյն վկաներն են Եկեղեցու ապրած ուղուն, ճանապարհին, առաջին դարու վերջաւորութիւնից մինչեւ վեցերորդ-եօթներորդ դար ժամանակաշրջանները։ Իհարկէ, Հայաստանեայց Եկեղեցին ունի նաեւ իր պատմագրութիւնը, որ իր վերելքը ապրեց Ս. Մաշտոցի գրերի գիւտից ետք ու ոսկեդարեայ գրականութեամբ, ու Եկեղեցու վերելքով, սկսած Հինգերորդ դարից։
-Իզուր չէ Պողոսը Տիմոթեոսին ուղղված երկրորդ նամակում ասում. «Եւ ինչ որ լսեցիր ինձնից բազում վկաներով, աւանդի՛ր այն հաւատարիմ մարդկանց, որ կարող լինեն ուրիշներին էլ ուսուցանել» /2։2/։ Կան շատ բաներ, որոնց մասին չի գրվել, այլ բանավոր է փոխանցվել եկեղեցիներին, կարծում եմ՝ հենց դրա մասին է վկայում այս համարը...
-Տիմոթէոսին գրուած այդ նամակը առաքելական «աւանդութեան մի մասն է», երբ առաքեալն իր յորդորն է տալիս Եկեղեցու երէցին։ Ի յաւելումն այդ համարին, որը նշեցիք (Բ. Տիմ. 2։2), առաքեալը գրում է Թեսաղոնիկէի համայնքին, «Ուրեմն, եղբայրնե՜ր, հաստա՛տ մնացէք եւ պի՜նդ պահեցէք այն ԱՒԱՆԴՈՒԹԻՒՆՆԵՐԸ, որ սովորեցիք թէ՛ խօսքով եւ թէ՛ մեր թղթով» (Բ. Թես. 2։14)։ Իր առաքեալների բերնով Տիրոջ հաստատած Եկեղեցին հաստատում է, որ աւանդութեան ԴԷՄ ՉԷ՛։ Եկեղեցին ՏԳԻՏՈՒԹԵԱ՛Ն դէմ է։ Որովհետեւ նոյն այդ աւանդութիւնն է, որ տարածում է Տիրոջ խօսքը ու կեանքը ամէն ազգի, լեզուի, մշակոյթի եւ երեւոյթի մէջ։ Իսկ տգիտութիւնն է, որ սահմանափակում եւ կործանում է բոլոր նրանց, ովքեր Եկեղեցուց առնում են միայն մի մաս՝ թողնելով նրա այլ կարեւոր ու մեկնաբանող մասերը։ Եթէ Աստուած աւանդութեան դէմ լինէր, ապա 2000 տարի Ս. Հոգին չէր առաջնորդէր այդ նոյն Եկեղեցին։
Դրա համար է, որ գոյութիւն ունեն բազմահազար «եկեղեցիներ» (որ չեն), ու հազարաւոր աղանդներ, քանի որ ամէն ոք մեկնում է Աստուածաշունչը իր ցանկացած ձեւով, ինչպէս որ բանսարկուն էլ Աստուծոյ խօսքը մեկնում է իր ցանկացած ձեւով (Ղուկ. 4)։
Այլ ուղիների, ոչ ուղղափառ, հերձուածող կամ աղանդաւոր մեր եղբայր-քոյրերին ես հրաւիրում եմ, որ կարդան Հայրերի գրութիւնները, Եկեղեցու պատմութիւնը։ Զարգացնեն իրենց միտքն ու հոգին։ Որեւէ մատեան իր արժէքը լիիրաւ ստանում է, երբ իմանում ենք նրա ամբողջական պատկերը, անցեալը, պատմութիւնը եւ յետագայ զարգացումները, եւ ոչ թէ գիտակցաբար անձը կտրել պատմական ճշմարտութիւնից։
Սոֆի ԲԱԲԱՅԱՆ