ՀԱՎԱՏՔՈՎ ՄՈՏԵՆԱԼ ՓՐԿՉԻՆ
Անհավատներն ասում են՝ քրիստոնեությունը թույլերի կրոնն է։ Իրականում այս թյուր կարծիքն ունեցողներն անտեղյակ են քրիստոնեության անցած ուղուց. բազում չարչարանքներ, խիզախ մարտիրոսություններ, զրկանքներ՝ հանուն Քրիստոսի։ Մարմնավոր տառապանքներից բացի, քրիստոնյաներն ունեն շատ ավելի դժվար իրագործելի առաքելություն՝ հոգևոր պատերազմ։ Սրբերն ամենօրյա ճգնությամբ կեղեքել են իրենց անձը՝ ճնշելով մարմնական ցանկություններն ու պահանջմունքները՝ հանուն Քրիստոսի։
Այսօր էլ ճշմարիտ քրիստոնյաներն առավելագույնս ջանում են պահել սրբազան երկու ամենամեծ պատվիրանները՝ «Սիրիր քո Տեր Աստծուն քո ողջ էությամբ», «Սիրիր մերձավորիդ քո անձի պես»։ Թե՛ Աստծուն, թե՛ մերձավորին սիրելը զուտ զգացմունքներ չեն, այլ՝ գործ, ջանք, ինքնազրկանք, անհարմարավետություն և այլն։ Այսինքն՝ քրիստոնյան ամեն օր թե՛ հոգևոր, թե՛ մարմնավոր ճգնությունների մեջ է։ Ուստի քրիստոնեությունը համարել թույլերի կրոն՝ անմտություն է։ Եվ, եթե այսօր ոմանք որոշ ձախողումների համար մեղադրում են քրիստոնեությանը, ապա դա, մեղմ ասած, անարդար է։
«Ահա՜ւասիկ ես դռան առաջ եմ եւ բախում եմ. եթէ մէկը ականջ դնի իմ ձայնին եւ բաց անի դուռը, կը մտնեմ նրա մօտ եւ կ’ընթրեմ նրա հետ, եւ նա՝ ինձ հետ» (Հայտն. 3։20),- ասում է Հիսուս Քրիստոսը։ 19-րդ դարի անգլիացի նկարիչ Ուիլյամ Հանտի «Աշխարհի լույսը» կտավը պատկերում է Քրիստոսին՝ փշե պսակով, կանթեղը ձեռքին, տան մոտ կանգնած դուռը բախելիս։ Դուռն այդ ամբողջովին մոլախոտերով է պատված և, ըստ երևույթին, հազվադեպ է բացվել։ Հիսուսի ձախ ձեռքի կանթեղն ընդգծում է շրջապատող աշխարհի մռայլությունը։ Դուռը խորհրդանշում է «փակ սիրտը», որը վաղուց չի բացվել, ինչի մասին վկայում են մոլախոտերը։ Իսկ դուռը միայն ներսից ունի բռնակ։ Այսինքն՝ մարդն ինքը կարող է միայն իր սրտի դուռը բացել Տիրոջ առջև։ Որպեսզի հանդիպումը կայանա, անհրաժեշտ է մաքրել դուռը /սիրտը/ մոլախոտերից և մեղքից։ Ինչպես մեկ այլ տեղ է ասվում՝ Երանի՜ սրտով մաքուրներին, որովհետև նրանք Աստծուն պիտի տեսնեն (Մատթ. 5։8)։
Վերջին փորձությունները ստիպեցին, որ մեր հայրենակիցներից շատերը սթափվեն, հասկանան, որ զուտ աշխարհիկ կյանքով ապրելն այլևս բավարար չէ։ Սկսեցին հաճախակի մտնել եկեղեցի, մոմ վառելու սովորությունից անցում կատարելով սբ Պատարագներին, Ժամերգություններին, միասնական աղոթքներին մասնակցություն բերելով։ Փաստորեն, փորձությունները ստիպեցին, որ զգայուն մարդիկ լսեն իրենց սրտի դռան առջև կանգնած Քրիստոսի ձայնը։ Գուցե սա ժամանակավոր է...
-Տեր Անդրեաս, լավատեսորե՞ն եք տրամադրված։ Թե՞, կարծում եք, եթե Աստծո ողորմությամբ հաղթահարենք մեր ազգի առջև ծառացած այս փորձությունները, մեր Աստվածադարձ հայրենակիցների սրտերը կրկին կպատվեն «մոլախոտով»։
- Ես միշտ լավատես եմ եղել ու կամ։ Բոլորս գիտենք, որ մոլախոտը կարիք չունի խնամքի և առատ աճում ու խանգարում է բարի բույսերին։ Լավ մշակի շնորհիվ արմատախիլ արված մոլախոտը այլևս չի աճի, ուստի քրիստոնեական ճշմարիտ հավատքով ու համոզումով ապրող մարդը Երանելի Հոբի պես միշտ գոհություն է հայտնում Աստծուն։
-Տեր Հայր, միասնական աղոթքների Ձեր պատգամներից մեկում ասել եք, որ մեր մեջ նոր հավատք է ձևավորվում։ Ի՞նչ նկատի ունեիք։
-Նոր հավատք ասելով նկատի չունեի հավատքի նոր տեսակ, այլ՝ նոր որակ, տառապանքի, զրկանքի և կորստի պայմաններում ձևավորված։ 12 տարվա հիվանդությամբ տառապող կնոջ պես, անտեսելով բոլոր խոչընդոտներն ու դժարությունները, ամեն կերպ փորձում ենք մոտենալ Փրկչին։
Սոֆի ԲԱԲԱՅԱՆ